Read pokomo Yud̯a 1 Bible Online

Yud̯a 1 - pokomo bible

Yud̯a 1

¹Mimi Yud̯a ndugujwe Yakobo, niye muhumisi jwa Yesu *Kirist̯o, nyakumworeani nywinywi nyonse muhanijweo ni Muungu Baba muwe wantuwe. Jeje kamutsaka muno na mwakwamijwani ni Yesu Kirist̯o.

²Muungu namufwiye t̯ei na kumumpa nagheaye na matsakoye kwa winji.

³Watsakwa, gula ninkitsaka muno kwamba nimworeye dzuu ya hu mupfonyo huupatiyeo hwonse. Ela niona kwamba ni urembo nimworeye kwamba muyaheheye haya *Maagu Mema muyahikiziyeyo. Hi hachi ya haya haya Maagu Mema, Muungu kaiyavya kwa hawaḍe wonse weo wakwe na ntaiperuke meshi.

⁴Nyakunenani hivi kwa kwamba kuna wantu wangine wasiomumanya Muungu wadzinyeezeyeo-nyeezeyeo wakinjia kahi yenu. Hawa hawa wantu wakuyongweezani kwamba, at̯i hunaweza kugija kuishi maisha ya kuuḅa t̯amaa nzuka nzuka za kimwii koro Muungu anahufwiya t̯ei. Hukumu ya hawa hawa wantu iyavigwa hangu kae na kae, koro wamukana huyu Ḅwana jeje heket̯u hwiyenae, yani Yesu Kirist̯o.

⁵Natsaka kumukumbusya kwamba ingawa Ḅwana[1] ewa kakipfonya kyeet̯i cha Muisiraeli kuyawa Misiri, ḅaad̯aye kadza kawananga-nanga hawaḍe wonse wayatsiyeo kumuserefat̯a. Gula nimanya ya kwamba haya haya ni mambo muyamanyiyeyo urembo muno, ela nikitsaka kumukumbusya t̯u.

⁶Na pia natsaka kumukumbusya kwamba hawaḍe malaika wayayatsiyeo haya mamulaka ya Muungu awapfiyeyo, na wakikuyatsa hukuḍe kuntu kwao wapangiijweko kukaa, Muungu kawafunga-funga na minyoro isiyohunika meshi. Kisa kawangiza simo ḍya kiza wemokuindiiyani Nsiku ya kuhukumigwa.

⁷Kumbukani wantu wa midzi ya Sod̯oma na Gomora na hiḍe midzi ingine iyokuwa hafufi. Hawa hawa wantu wekihenda kula aina ya uḅari na kuyaana na njia isiyokuwa ya sawa, ndookomu Muungu kawananga-nanga na moho. Hihiiḍe midzi Muungu kaihenda dza hivihiviḍe nangere kuyanga namuna ya hawaḍe wonse weo wazuka wadzevyotsomwa na moho usiwosia.

⁸Hivi hivi ndivyo vya hawa waalimu wa nsuwe waivyo. Haya mandoho yao weyonayoha yanakaa na kuwahendeza wakaingiza mii yao kuhendani mambo machafu. Wanakaa na kunyira mamulaka ya Muungu na kuvitsola-tsola ḅasi viumbe vya mbinguni.

⁹Ḅela Mikaeli eye mumodza jwa hawa malaika wakuu t̯u, nkakusuḅut̯u kumutsola Shaat̯ani epfoakiḍaat̯iana nae dzuu ya hu mwii wa Musa. Ishinu kamwamba, “Ḅwana nakuhukumu!”

¹⁰Ela hawa waalimu wa nsuwe wanatsezea kula wasichokiimuka. Wanadzihendea mambo dza binensa pfasipfo kut̯ara na wakadzingiza mananzini wao wenye.

¹¹Hachi wadzawa na d̯ina nkuu muno! Koro wakuhendani dza hiviḍe vya Kaini amuyagiyevyo ndugujwe. Wao ni wantu watsakiyeo fwedha dza hiviḍe vya Balamu evyokuwa. Na kwa kwamba wamutsowea Muungu, wananangwa-nangwa dza hiviḍe vya Kora evyotsowa na akinangwa-nangwa.

¹²Wepfonakaa kuḍyani pfamodza nanywi dza wantu wa Ḅwana, wanamungiza t̯amba zuka kwa dzambo ḍya kwamba, wanakaiya kudzimuud̯amia wao heket̯u pfasipfo hat̯a yutswa. Hawa hawa waalimu wa nsuwe waa dza mawingu ya mvuya yeyonabigwa ni vut̯o ḅasi na yakatsayeha mvuya iḍeyonse. Waa dza mihi isiyovyaa matunda hat̯a ikiwa kwamba ni ngera ya kwamba iwe na matunda. Waa dza mihi ifwiyeyo na ikikujwa-kujwa na miziye.

¹³Haya mahendo yao mazuka mazuka yanadziyavya nze tswee dza hiviḍe vya mawimbi makali ya ḅahari yevyonabiga na kuyavya povu ḍya uchafu. Wao waa dza hiziḍe nyoha zizonadzichiiya ḅasi humu yuwinguni, yani hiziḍe nyoha zizonachia zikaariya kuntu kwa kiza cha go.

¹⁴Henoke eyeishi kivyazi cha fungahe ḅaad̯a ya Ad̯amu ewa kayavya unabii dzuu ya wantu dza hawa hawa epfokwamba, “T̯ayowa, Ḅwana kakudzani na maelefu na maelefu ya malaikawe.

¹⁵Kakudzani kuwahukumu wantu wonse weo lumwenguni. Kadzawahukumu wanabvise wonse wasiomumanya Muungu. Kadzawahukumu kwa dzambo ḍya haya mahendo yao mazuka yonse wahendeyeo pfasipfo hat̯a kumushooga Muungu. Na pia kadzawahukumu kwa dzambo ḍya hivi vyuuwo vizuka vizuka vyonse vya hawa hawa wantu waneneyevyo dzuu ya Muungu.”

¹⁶Hawa hawa waalimu wa nsuwe ao meshi kazi yao ni kuḅuguma-ḅuguma na kualat̯a wantu wangine. Wanakaa na kuuḅa hizi t̯amaa zao nzuka nzuka na kudziona kwinji, na wakashad̯a wantu ili waweze kuonegwa wema.

¹⁷Ela wandugu zangu watsakwa, ni had̯i mukumbuke haya ya hawa *ntumi wa Ḅwana jwehu Yesu Kirist̯o wamwambiiyeyo.

¹⁸Wamwamba, “Ngera za mwiso kudzawa na wantu weo na baladha weonat̯awaligwa ni t̯amaa zao nzuka nzuka pfasipfo hat̯a kumushooga Muungu.”

¹⁹Hawa hawa ndiwo weonaḅaa wantu vit̯aro vit̯aro. Wanat̯awaligwa ni hizi t̯amaa zao za kimwii t̯u, koro Ruhu jwa Muungu nkapfo kuzimuni mwao.

²⁰Ela nywinywi waḅamu zangu, ni had̯i mugije kuyambaka maisha yenu dzuu ya hu musinji we faro yenu iyawiyeyo kwa Muungu, na mugije kuyomba kuuḅana na hiviḍe vya Ruhu Mudheru evyonamuyongowa.

²¹Gijani kuishi kuuḅana na matsako ya Muungu, huku mukwakuindiiyani kupata haya maisha ya kuunga na yuungo mudzeyopfegwa ni Ḅwana jwehu Yesu Kirist̯o kwa dzambo ḍya hi t̯eiye eyonayo kwenu.

²²Ikaani mukiwafwia t̯ei hawaḍe weo na faro zizokutsakani kupfunguya.

²³Wangine wapfoweni muwapfonye kuyawana na haya makaa ya moho weyokutsakani kunjia. Kuna na wangine weo wanabvise mwiwonamala kuwafwiya t̯ei, ela chimizani watsekudzamuhendeza mugwe nabviseni munjie t̯amba zuka.

²⁴Na sasa Muungu ashad̯we. Jeje ndiye eyenaweza kumut̯unza mutsekudzagwa nabviseni na anamungiza maremboni mwakwe mukiwa na tsekea nkuu muno, koro munawa kwamba ntamu hat̯a kat̯amba ka nabvise.

²⁵Muungu eye Mupfonya jwehu jeje heket̯u ashad̯we kuchiiya na kwa Ḅwana jwehu Yesu Kirist̯o. Marembo, nguvu, uhaju na mamulaka, mvyakwe hangu ngera zichiiyezo, sasa, na hat̯a pfasipfosia. Amina.