Read pokomo Upfenuo wa Yohana 11 Bible Online

Upfenuo wa Yohana 11 - pokomo bible

Upfenuo wa Yohana 11

¹Kisa nipfegwa yuhi jwa kupimia na nyambigwa, “Enda ukaipime hi *Hekalu ya Muungu na haya *madhabahu. Na wat̯ale hawa weonayomba humu Hekaluni.

²Ela hiḍi ua ḍya huku nze ye Hekalu nkudzoḍipime, ḍiyatse. Ḍiḍyo ḍiyatsijwa hawa wantu wa vyeet̯i vingine. Nao wanauranga-ranga mudzi wa Muungu kwa muḍa wa myezi miyongo mine na miwii (nsiku 1,260).

³Ela kunawa mashaahiḍi wangu wawii. Wao nawapfa uwezo wa kuyavya unabii kwa huo muḍa wa hizo nsiku elefu modza na magana mawii na miyongo mihandahu. Nao wanayavya unabii wakiwa wavwaa nguo za magunia.”[9]

⁴Na hawa mashaahiḍi wowii ni hi mihi myowii ya mizeituni na hi mihi myowii ya kupfatsikia tsaa, isumamiyeo usoni kwa Ḅwana jwa lumwengu yuzima.

⁵Nyabva jwao yuḍejwonse adzeyeḍema kuwahendea mazuka, anatsomwa ni hu moho wiwonayawa humu manwani mwao. Ndookomu kula adzeyeḍema kuwahendea mazuka, nae ni had̯i anayagwa dzevyo.

⁶Hawa mashaahiḍi wowii, wapfegwa uwezo wa kuzifunga hizi mbingu ili kutseenya mvuya kwa hu muḍa weokuyavyani hu unabii wao. Wapfegwa na uwezo wa kuperuya madzi yawe mwazi na kuyeha kula aina ya bigo zuka lumwenguni dza watsakiyevyo.

⁷Ela wakiyavya unabii wao wakyendawakisa, huyu binensa eyenayawa na humu mwa hiḍi simo ḍisiḍyo mwiso, anajwana nao na anawashinda, kisa anawayaga.

⁸Na mii yao inafat̯ulwa ḅasi humu mwa hi njia nkuu yo mudzi mukuu, mudzi wa huyu Ḅwana jwao apfatsikijweo. Hu mudzi uhanwa “Sod̯oma,” na “Misiri,” kimafumbo.

⁹Na kwa nsiku ntahu na nusu, mii ya hawa mashaahiḍi wowii inayojwa ni wantu wa kula nsi, na kula kyeet̯i na kula lugha. Na ntaku adzeyeruhusijwa kuizika.

¹⁰Walumwengu wonse wanatsekea kwa dzambo ḍya hivi vifo vya hawa wantu wowii. Wanasherehekea na kupfana nt̯unu, kwa kwamba hawa manabii wekiwahangaisha.

¹¹Ela ḅaad̯a ya hiziḍe nsiku ntahu na nusu, Muungu kawangiza nsoho za kuwahendeza wawe mojo, nao wasumama. Na kula awaoneye kanjijwa ni oga mukuu muno.

¹²Kisa hawaḍe mashaahiḍi wowii wasikia saut̯i nkuu kuyawa mbinguni ikiwamba, “Nzoni huku dzuu!” Nao wenda mbinguni na wingu huku nyabva wao wakiwayowa.

¹³Na iyo saa kugunga muhehemo mukuu wa nsi, na sehemu modza ya kumi yo mudzi igwa. Kufwa wantu elefu mfungahe. Na hawaḍe wapfoneyeo wanjijwa ni oga muno na wamushad̯a Muungu eye mbinguni.

¹⁴Hiḍi bigo ḍya pfii sasa ḍisakusia. Ela manyani, bigo ḍya hahu ntaḍikwaa kuye.

¹⁵Kisa huyu malaika jwa fungahe kabiga hi t̯arumbet̯a yakwe. Na nisikia saut̯i nkuu mbinguni zikyamba, “Uhaju wa huju lumwengu uhenda uhaju wa Ḅwana jwehu na Mutsanwa jwakwe. Nae anat̯awala maishi na maishi.”

¹⁶Na hawaḍe wazee miyongo miwii na wane weonakaa viti vyao vya kihaju usoni kwa Muungu, wamugwiya Muungu na wamuyomba

¹⁷wakyamba, “Hunakuyaviza ḍuḍa wewe Ḅwana Muungu mwenye nguvu zonse. Wewe wiwapfo na upfo maishi. Hunakuyaviza ḍuḍa, kwa kwamba sasa kwakuyangani uwezowo mukuu na kwakut̯awalani.

¹⁸Walumwengu wewa na ngoro nawe, ela sasa wakati wa kuyanga ngoroyo ufika. Wakati ufika, wako wa kuwahukumu wafu, na kuwapfa t̯ubvo wahumisiwo manabii, na wadheruwo wonse weonaḍihila sariḍyo, hangu wakuu hat̯a wachuchu. Na wakati ufika, wako wa kuwesa hawaḍe wonse, wajunangiyeo huju lumwengu.”

¹⁹Kisa Hekalu ya Muungu iyo mbinguni ifungujwa, na hiḍi sand̯uku ḍya ḍamano ḍikionekana humuḍe kuzimu. Na kugunga maḅaḅat̯u, mpepfe na muhehemo mukuu wa nsi. Na kugwa mvuya nkuu ya mawe.