Read pokomo Upfenuo wa Yohana 15 Bible Online

Upfenuo wa Yohana 15 - pokomo bible

Upfenuo wa Yohana 15

¹Kisa niona dzambo ḍingine kuu ḍya mafara ḍihendekeyeḍyo mbinguni. Niona malaika wafungahe weokuwa na haya mabigo mafungahe ya mwiso yadzeyoikamilisha hi ngoro ya Muungu.

²Niona kintu kikaiyecho dza ḅahari ya kiyoo itsanganyijweyo na moho. Na geri[15] ye ḅahari kusumama wantu wagijiyeo vinuḅi wavipfegejwevyo ni Muungu. Hawa ni hawaḍe wantu wamushindiyeo huyuḍe binensa, wadziziyeo kuiyomba hi sanamuye na wakidziza kubigwa muhuri we namba ya hiḍi sariḍye.

³Hawa hawa wantu wekikwimba wiya wa huyu Mwana Mbuzi na Musa muhumisi jwa Muungu. Hu wiya unakwamba, “E Ḅwana Muungu mwenye nguvu zonse, mahendoyo ni makuu na ya kumakisa! Wewe wiye Haju jwa vyeet̯i na vyeet̯i,[16] njiazo zonse nza hachi na nza ḍugha!

⁴E Ḅwana, jwa kutsakushooga wewe ni ga? Ambu ni ga jwa kutsaḍikuzya sariḍyo? Wewe ndiwe Mudheru wewe heket̯u. Kwa kwamba haya mahendoyo ya hachi yanaonekana wazi tswee, vyeet̯i vyonse vinakuvunzia nkuhi.”

⁵Wepfokwimba wakisa, nikidzanikihea matso niiona hi *Hekalu ya Muungu hukuḍe mbinguni, yani hiḍi hema ḍya kuyanga kuwapfo kwakwe ḍipfenujwa![17]

⁶Na hawaḍe malaika wafungahe weokuwa na haya mabigo mafungahe wayawa na humuḍe Hekaluni. Wewa wavwaa nguo safi zizokuwa nyeupe pee, na ḅagwini mwao wewa wadzifunga mikanda ya dhahaḅu.

⁷Kisa mumodza jwa hiviḍe viumbe vyoone kawapfa ḅaakuli mfungahe za dhahaḅu hawa malaika wafungahe. Hizi hizi ḅaakuli ziwa zidzaa hi ngoro ya huyu Muungu eyenaishi maishi na maishi.

⁸Iyo saa hi Hekalu idzaa mosi kwa dzambo ḍya nguvu na marembo ya Muungu yeyokuwapfo. Na ntaku yuḍejwonse awezeye kunjia humuḍe Hekaluni mumpaka saa ya hayaḍe mabigo mafungahe yayehejweyo ni hawaḍe malaika wofungahe yadzepfoyakisia.