Read pokomo Upfenuo wa Yohana 16 Bible Online

Upfenuo wa Yohana 16 - pokomo bible

Upfenuo wa Yohana 16

¹Kisa nisikia saut̯i nkuu kuyawa humuḍe Hekaluni ikinena na hawaḍe malaika wafungahe ikyamba, “Haya, endani lumwenguni mukazikakanye hizo ḅaakuli mfungahe ze ngoro ya Muungu!”

²D̯ubva malaika jwa d̯ura kenda kaikakanya hi ḅaakuli yakwe lumwenguni. Iyo saa hawaḍe wonse wabigijweo muhuri wa huyuḍe binensa na wakiiyomba hi sanamuye, wapatwa ni kipfupfu cha virango vizuka vizuka.

³Malaika jwa pfii kanuka kenda kaikakanya hi ḅaakuli yakwe ḅaharini. Iyo saa hi ḅahari ipfyehuka dza mwazi wa muntu afwiye, na kula kintu chichokuwa mojo humuḍe madzini kifwa.

⁴Malaika jwa hahu kenda kaikakanya hi ḅaakuli yakwe dzuu ya matsana na sehemu zingine zonse ziizo na madzi, na iyo saa madzi yonse yahalawa mwazi.

⁵Kisa nimusikia huyu malaika eyenasumamia mambo ya madzi akyamba, “E Ḅwana wiye Mudheru! Kuhenda hachi kaḅisa kuhukumu dzevyohivyo! Wewe ndiwe wiyekuwapfo na wiyepfo maishi.

⁶Hawa wanaad̯amu wawayaga wadheru wako na wakwiha myazi ya manabii wako. Nawe kuhenda hachi kaḅisa kuwapfa mwazi wanwe, koro wanamala kuhendegwa dzevyo!”

⁷Kisa nisikia idzwi ḍiyawiyeḍyo na hapfaḍe madhabahuni ḍikyamba, “Ndivyo ḍugha! Hakika wewe Ḅwana Muungu mwenye nguvu zonse, hukumu zako nza hachi!”

⁸Huyu malaika jwane kenda kaikakanya hi ḅaakuli yakwe dzuu ya hiḍi dzuwa, naḍyo ḍipfegwa mamulaka ya kutsoma wantu na moho.

⁹Wantu wabigwa ni dzuwa ḍya mwangango, na wanjia kumukufuruni huyu Muungu eye na mamulaka dzuu ya haya haya mabigo. Ela ntawakupfyehuza mama na wala ntawakumushad̯a Muungu.

¹⁰Huyu malaika jwa tsano kenda kaikakanya hi ḅaakuli yakwe dzuu ya hiki kiti cha kihaju cha huyuḍe binensa jwa d̯ura. Na iyo saa uhajuwe wonse unjia kiza cha go. Wantu wakunta d̯ina mumpaka wanjia kudziumani nyiimi zao

¹¹kwa dzambo ḍya hu tsungu wa hivi virango weowakisikia. Ela vivyo wamukufuru Muungu eye mbinguni, na wala ntawakupfyehuza mama.

¹²Huyu malaika jwa handahu kenda kaikakanya hi ḅaakuli yakwe dzuu ya hi tsana nkuu iyonahanwa Efurati. Iyo saa hi tsana ikuma ḍama gu, kuyahendeza haya mahaju ya nsi za mbo yaweze kuvuka na asikari wao pfasipfo d̯ina.

¹³Kisa niona mpepfo nzuka ntahu zikaiyezo dza vyuya. Modza iyawa na humu kanwani mwa hiḍiḍe ḍyoka, ingine iyawa na humuḍe kanwani mwa huyuḍe binensa jwa d̯ura, na ingine iyawa na humuḍe kanwani mwa huyu *nabii jwa nsuwe, yani huyuḍe binensa jwa pfii.

¹⁴Hizi mpepfo nzuka ni ruhu ziizo na uwezo wa kuhenda mafara ya kumakisa. Zinayendea mahaju yonse ya lumwengu ili ziyat̯ut̯aise pfamodza na asikari wao kujwana viha na Ḅwana. Ela hiyo hiyo nsiku inawa ndiyo hi nsiku ya Ḅwana Muungu mwenye nguvu zonse ya kujuhukumu lumwengu.

¹⁵“T̯asikiani! Mimi nakudza dza mwivi, saa musiyokuwa kuniindiani. Kadzawa na tsekea iyodze, huyuḍe adzeewa matso na avwaiye nguoze t̯ayari ili atsekudzatsumpa vivi aajae!”

¹⁶D̯ubva haya mahaju na asikari wao wat̯ut̯aiswa pfantu pfepfonahanwa Arimagedoni kwa lugha ya Kieburania.

¹⁷Huyu malaika jwa fungahe kenda kaikakanya hi ḅaakuli yakwe humu angani dzuu. Kisa nisikia saut̯i nkuu kuyawa hapfaḍe pfe kiti cha kihaju chicho humuḍe mwe *Hekalu ya mbinguni. Hi saut̯i yamba, “Visakusiya!”

¹⁸Iyo saa kugunga maḅaḅat̯u, mpepfe na muhehemo mukuu wa nsi. Wiwa muhehemo mukuu wa mafara usiodzaonekana hangu kuumbwa kwa lumwengu.

¹⁹Huḍe mudzi mukuu wa Babeli uḅaika sehemu ntahu, na hi midzi mikuu ingine ya humu lumwenguni ihoromoka mutsangani tswee. Muungu nkakuyaarerwa haya mazuka yahendejweyo ni mudzi wa Babeli. Kauhendeza ukinwe hichi chikombe che mvinyo ye ngoroye nkali.

²⁰Hi nsi ipfohehema, vilulu vyonse vyaara na ntaku murima uonekaniyeo kawii.

²¹Wantu wabigwa ni mvuya ya mawe makuu makuu ikakanyikiyeyo kuyawa mbinguni. Kula iwe modza ḍiwa na uziho wa chima cha kilo miyongo mine. Na wantu wamukufuru Muungu kwa dzambo ḍyeḍihiḍi bigo, koro ḍiwa zuka muno.