Read pokomo Upfenuo wa Yohana 17 Bible Online

Upfenuo wa Yohana 17 - pokomo bible

Upfenuo wa Yohana 17

¹Mumodza jwa hawaḍe malaika wafungahe wakakanyiyeo hiziḍe ḅaakuli mfungahe kanidzia kanyamba, “Nzoo nikuyange hi hukumu idzeyopfegwa hiḍiḍe shudha kuu ḍikaiyeḍyo dzuu ya madzi menji.

²Kula haju jwa lumwengu kayaa naḍyo. Ḍiwahendeza wantu wonse wa lumwengu wahendeke dza kwamba waruma mvinyo, kwa kuuḅa haya mahendoye machafu machafu.”

³D̯ubva huyu malaika kaniyongowa Ruhuni kanipfiika yuwandani, nyendeekonikiona muke akaiye chihako dzuu ya binensa jwa ranji ya zazi. Huyu binensa ewa na vitswa vifungahe na mpembe kumi. Mwiini mwakwe ewa koregwa masari menji na menji ya kukufuru.

⁴Huyu muke ewa kavwaa nguo za ranji ya zazi na zambarau, na ewa kadzifayat̯a na vija vya dhahaḅu, lulu na mawe yangine ya thamani. Mukononi mwakwe ewa kagija chikombe cha dhahaḅu chidzaiyecho haya mamboye machafu machafu ya ushudha eohenda.

⁵Hapfa kidhangoni pfakwe koregwa sari ḍya kind̯uro ḍyambiyeḍyo, “Mudzi Mukuu wa Babeli. Mama jwa Mashudha Yonse na Kula Aina ya Mambo Machafu Machafu ya Huju Lumwengu.”

⁶Kisa niona kwamba huyuḍe muke ewa karuma mwazi wa hawa wantu wa Muungu wayagijweo kwa dzambo ḍya ushuhuḍa wao dzuu ya Yesu. Mimi nipfomuona huyuḍe muke nimaka t̯u.

⁷Ela huyuḍe malaika kaniuza kanyamba, “Unamaka una? Nakwambia maana ya huyu muke na huyu binensa jwa vitswa vifungahe na mpembe kumi uoneye.

⁸Huyu binensa uoneye, d̯ura ewa ka mojo ela sasa kafwa. Na si hat̯a kae kadzayawa na humuḍe mweḍi simo ḍisiḍyo mwiso, ela ananangwa-nangwa. Na wantu wonse wa huju lumwengu wadzamaka muno wadzepfomuona huyuḍe binensa eyeyagwa akifufuka. Na wadzeomaka ni hawaḍe ambao hangu kuumbwa kwa lumwengu, ntawakworegwa masari yao kuzimuni mwa Chuo cha maisha.

⁹Na kuviimuka hivi kunatsaka akili. Maana ya hiviḍe vitswa vifungahe vya huyuḍe binensa umuoneye, ni mirima mifungahe iyokut̯awaligwani ni huyuḍe muke. Na pia vina maana ya mahaju mafungahe.

¹⁰Mahaju matsano kahi yao yesakugwa. Huyu haju jwa handahu kakut̯awalani hi hii saasambi na huyu jwa fungahe nkadzaḍabva kut̯awala. Ela uhajuwe udzepfokudza, ni had̯i at̯awale kwa kit̯emo kifufi t̯u.

¹¹Huyuḍe binensa eyekuwa mojo kisa akifwa, yani huyuḍe jwa ranji ya zazi uoneye, maanaye ni mumodza jwa hayaḍe mahaju mafungahe adzekudzat̯awala mweedha wa pfii. Huyu anawa ni haju jwa nane, ela nae pia kadzanangwa-nangwa.

¹²Hizi mpembe kumi za huyu binensa, maanaye ni mahaju kumi yasiyodzaḍabva kut̯awala. Ela nayo yadzapfegwa mamulaka ya kut̯awala pfamodza na huyuḍe binensa kwa kit̯emo cha saa modza t̯u.

¹³Haya haya mahaju kumi yadzawa na lengo modza. Yani yonse yadzakuḅaliana kumumpa huyuḍe binensa hizi nguvu zao na mamulaka yao yonse.

¹⁴Yadzaungana pfamodza nae kujwana viha na huyu Mwana Mbuzi. Ela huyu Mwana Mbuzi na wantuwe kadzawashinda wonse, koro jeje ni Haju jwa mahaju na ni Ḅwana jwa maḅwana wonse. Na hawaḍe wonse weo wakwe ni wantu awatsaniyeo na akiwahana kuwa wakwe, na ni wahikizika.”

¹⁵Kisa huyu malaika kanyamba, “Huyuḍe muke shudha kumuona kakaa chihako dzuu ya madzi. Na maana ya haya madzi ni gumi ya wantu wenji na wenji. Ni wantu wa kuyawa kula nsi, kyeet̯i na lugha zonse za humu lumwenguni.

¹⁶Huyuḍe binensa pfamodza na hiziḍe mpembe kumi, yani hayaḍe mahaju kumi yadzeyokudza, yadzamukeva huyuḍe muke shudha. Yadzamupfoka kula kintu echonacho na yamuyatse vivi. Yadzamuḍya kisa haya masaza ya hizi nyamaze wadzayangiza mohoni.

¹⁷Muungu jeje mwenye ndiye akiyahendeza haya haya mahaju yaut̯imize mupangowe. Kayahendeza yawe na mat̯aro mamodza ya kumumpa huyuḍe binensa haya mamulaka yao ya kihaju. Na yanahenda hivi ili hiviḍe vyonse vya Muungu aneneevyo viweze kut̯imiya.

¹⁸Na huyuḍe muke shudha uoneye, ni huḍe mudzi mukuu wiwokuyat̯awalani mahaju yonse ya lumwengu.”