Read pokomo Upfenuo wa Yohana 19 Bible Online

Upfenuo wa Yohana 19 - pokomo bible

Upfenuo wa Yohana 19

¹Huyu malaika epfonena akisa, nisikia saut̯i iyokuwa dza madzwi ya t̯ut̯a nkuu ya wantu iyoikyamba, “Ḅwana ashad̯we! Mupfonyo unapatikana kwa Muungu jeje heket̯u. Jeje ndiye mwenye nguvu na eyenamala kushad̯wa.

²Muungu anahukumu na hachi. Kamuhukumu huyuḍe muke shudha ajunangie huju lumwengu na ushudhawe. Muungu kamuipfa halo kwa dzambo ḍye myazi ya wantu wa Muungu ehiyeyo.”

³Makisa hi t̯ut̯a iḅaa madzwi kawii yamba, “Ḅwana ashad̯we! Mudzi wa Babeli wakufukani mosi usiozimika maishi na maishi!”

⁴Kisa niwaona hawaḍe wazee miyongo miwii na wane, pfamodza na hiviḍe viumbe vine wamugwiya Muungu na kumuyomba hapfaḍe kitini pfakwe pfa kihaju. Wamba, “Amina! Ḅwana ashad̯we!”

⁵Kisa nisikia saut̯i nkuu kuyawa hapfaḍe pfe kiti cha kihaju cha Muungu. Hi saut̯i yamba, “Mushad̯eni Muungu jwehu, nywinywi nyonse mwiwo wahumisi wakwe! Nyonse mwiwonamushooga Muungu, hangu wakuu hat̯a wachuchu, mushad̯eni jeje.”

⁶Kisa nisikia saut̯i zizokuwa dza madzwi ya wantu wenji zikaiyezo dza saut̯i ya mvuha ya madzi menji na maḅaḅat̯u. Hizi saut̯i zyamba, “Ḅwana ashad̯we! Koro Ḅwana Muungu jwehu mwenye nguvu zonse ndiye Haju!

⁷Kwa tsekea nyinji, nahumushad̯eni na kumukuzya jeje. Koro hi harusi ya huyu Mwana Mbuzi imafika, na huyu ḅiḅi harusi kesakudzielekanya kwe harusi.

⁸Kapfegwa vwazi safi dzeupe ḍya kuvwaa ḍielekanyijweḍyo na kit̯ambaa ghali.” (Hiḍi vwazi dzeupe safi ḍina maana ya haya mahendo mema ya wantu wa Muungu weyonahenda.)

⁹Makisa huyuḍe malaika kanyamba, “Ora hivi: Wana tsekea iyodze hawaḍe waalikijweo kwe karamu ye harusi ya huyu Mwana Mbuzi.” Kisa kanyamba, “Hivi ni vyuuwo vya ḍugha viyawiyevyo kwa Muungu.”

¹⁰Hapfo nimugwiya maguuni huyuḍe malaika kumuyomba. Ela kanyamba, “Moro nkudzohende hivyo! Mimi ni muhumisi jwa Muungu dzawe na wenziwo weonayavya ushuhuḍa dzuu ya Yesu. Koro hi hachi ya Yesu aiyanganyiyeyo ndiyo iyonawezesa wantu kuyavya maagu ya Muungu. Nkudzonivunziye nkuhi mimi, muvunzie nkuhi Muungu.”

¹¹Kisa niziona hizi mbingu zipfenuka, na niona farasi dzeupe. Huyuḍe aḍipfaiye anahanwa Muhikizika na jwa Ḍugha. Jeje anahukumu na kujwana viha na njia ya hachi.

¹²Haya matsoye yewa dza maḅiliḅili ya moho, na ewa kavwaa viyemba vinji vya kihaju. Koregwa sari ḍisiḍyomanyigwa ni yuḍejwonse, lamud̯a jeje heket̯u.

¹³Kavwaa vwazi ḍidzaiyeḍyo myazi t̯ipu, na sariḍye anahanigwa Chuuwo cha Muungu.

¹⁴Haya maḍyeshi ya mbinguni yekimuuḅa na nyuma. Wonse wavwaa nguo safi za kit̯ambaa ghali zizokuwa nyeupe pee, na wewa wapfaa mafarasi meupe.

¹⁵Kanwani mwakwe kwikiyawa yupfanga jwijokuwa na makai. Huju huju yupfanga ndijo atumiiyejo kuvishinda vyeet̯i vya lumwengu, na akivit̯awala na nsimbo ya chuma. Jeje ndiye jwa kuziminya hizi zabibu humuḍe mwa hiḍi simo ḍya kuelekanyia mvinyo. Anahenda hivi kuyanga hi ngoro nkali ya Muungu mwenye nguvu zonse.

¹⁶Na hapfa kiweoni pfakwe, hiḍi vwaziḍye ḍyoregwa hivi vyuuwo hivi: “Haju jwa mahaju na Ḅwana jwa maḅwana.”

¹⁷Kisa niona malaika kasumama dzuu ya hiḍi dzuwa. Kawalalabvia hawa nyuni wonse weonaguuka humu angani dzuu kawamba, “Nzoni nyonse kwe karamu ya Muungu ahendeeyo!

¹⁸Nzoni muḍye mifumbi ya mahaju, wayongozi wa asikari na majangina wa viha! Nzoni muḍye mifumbi ya asikari weonapfaa mafarasi na mafarasi yao. Nzoni muwaḍye wonse, hangu wahumwa na wasikwaa wahumwa, wakuu kwa wachuchu!”

¹⁹Kisa nimuona huyuḍe binensa kayat̯ut̯aisa mahaju ya lumwengu na asikari wao, ili yakajwane viha na huyuḍe apfaiye hiḍi farasi dzeupe na asikariwe.

²⁰Ela huyu binensa na huyuḍe *nabii jwa nsuwe wahwajwa maheka. Huyu nabii ni huyuḍe eyeakihenda mafara ya kumakisa usoni ya huyuḍe binensa. Kwa dzambo ḍya haya mafara ahendeeyo, kawaarya hawaḍe weobigwa muhuri wa huyuḍe binensa na wakiiyomba hiḍe sanamuye. Huyu binensa na huyu nabii jwa nsuwe, wafat̯ulwa wakiwa mojo humuḍe mwa hiḍi ziwa ḍiḍyonawaka moho wa maḅiliḅili.

²¹Hawa asikari wao wayagwa wonse ni huyuḍe apfaiye farasi. Kawayaga na huju yupfanga jwijonayawa na kanwani mwakwe. Ndookomu nyuni wonse wawaḍya na kudziit̯ait̯a.