Read pokomo Upfenuo wa Yohana 20 Bible Online

Upfenuo wa Yohana 20 - pokomo bible

Upfenuo wa Yohana 20

¹Kisa niona malaika akisuka kuyawa mbinguni. Mukononi mwakwe ewa kagija huju yufunguo jwa hiḍiḍe simo ḍisiḍyo mwiso na ewa kagija munyoro mukuu.

²Kaḍigija hiḍiḍe ḍyoka, yani iiḍe nyoka ya hangu kae na kae iyonahanwa Muzuka ambu Shaat̯ani, na kamufunga kwa myaka elefu modza.

³Kamufat̯ula humuḍe mweḍi simo ḍisiḍyo mwiso na kaufunga hu muḍyango wa kunjiiya, kisa kaubiga muhuri. Kamufunga kwa myaka elefu modza ili atsewaarya wantu kawii mumpaka hi myaka elefu modza isiye. Ela hi myaka ikisia, ni had̯i adzeafungujwe kwa muḍa mufufi.

⁴Kisa niona viti vya kihaju, na hawaḍe wavikaiyeo wapfegwa mamulaka ya kut̯awala. Niona ruhu za hawaḍe wakentejweo vitswa wakiyagwa kwa dzambo ḍya chuuwo cha Muungu na ushuhuḍa wao dzuu ya Yesu. Hawa ni hawaḍe wasiomuyomba huyuḍe binensa wala sanamuye, na wakidziza kubigwa muhuri vidhangoni mwao ambu mikononi mwao. Hawa wafufuka na wat̯awala dza mahaju pfamodza na *Kirist̯o kwa myaka elefu modza.

⁵Hawa ndiwo wafufwiijweo d̯ura. Hawaḍe wafu wangine ntawakufufujwa mumpaka ḅaad̯a ya hi myaka elefu modza.

⁶Wadzawa na tsekea iyodze hawaḍe weo watsanwa wa Muungu wapatiyeo kufufujwa d̯ura! Hao kufwa kwa pfii ntakuwezi kuwapata. Ela wadzamuhumikia Muungu na Kirist̯o dza wakohani, na wadzat̯awala dza mahaju pfamodza nae kwa myaka elefu modza.

⁷Hi myaka elefu modza ikisia, Shaat̯ani kadzafungujwa na humuḍe gerenzani afungijwemo.

⁸Anayawa na anaḍabva kuwaarya wantu wa vyeet̯i vyonse vivyo kula mpembe ya huju lumwengu, yani Gogu na Magogu. Kadzawat̯ut̯aisa pfamodza ili wende vihani. Wadzawa wantu wenji na wenji dza mutsanga wa ḅahari.

⁹Waid̯and̯a nsi nzima na wenda waizunguuka hi nkambi ya wantu wa Muungu, yani huḍe mudzi wa Muungu autsakiyeo. Ela kusuka moho kuyawa mbinguni na uwananga-nanga tswee!

¹⁰Huyu Shaat̯ani awaariye kafat̯ulwa humuḍe mwa hiḍi ziwa ḍiḍyonawaka moho wa maḅiliḅili. Humuḍe ndimo kufat̯ulijwemo huyuḍe binensa na huyu *nabii jwa nsuwe. Wadzakuntiswa d̯ina siku na musikahi, maishi na maishi.

¹¹Kisa niona kiti kikuu cheupe cha kihaju kikaijwecho ni muntu. Na iyo saa hizi mbingu na nsi zimud̯arama zyaara na wala ntazikuonekana kawii.

¹²Kisa niona wantu wafwiyeo, wakuu kwa wachuchu, wasumama usoni ya hikiḍe kiti cha kihaju na kufungujwa vyuo. Makisa kufungujwa hichi chuo chicho na masari ya hawaḍe wadzeopata maisha ya kuunga na yuungo. Na wafu wahukumigwa kuuḅana na haya mahendo yao yorejweyo humuḍe vyuoni.

¹³Hi ḅahari iyavya wafuwe. Kufwa na Lumwengu jwa Wafu navyo viyavya wafu wao. Na kula muntu kahukumigwa kuuḅana na mahendoye.

¹⁴Makisa Kufwa na Lumwengu jwa Wafu vifat̯ulwa humuḍe mwa hiḍi ziwa ḍya moho. Hiḍi ziwa ḍya moho ndiko huku kufwa kwa pfii.

¹⁵Na yuḍejwonse asiyekworegwa sariḍye kuzimuni mwa Chuo cha maisha, huyo kafat̯ulwa humuḍe mwa hiḍi ziwa ḍya moho.