Read pokomo Upfenuo wa Yohana 22 Bible Online

Upfenuo wa Yohana 22 - pokomo bible

Upfenuo wa Yohana 22

¹Kisa huyuḍe malaika kaniyanga tsana iyo na madzi masafi yeyonapfa wantu maisha ya kuunga na yuungo. Haya madzi yewa meupe pee, na yekingara dza kiyoo. Hi tsana iyawa na hapfaḍe pfe kiti cha kihaju cha Muungu na huyu Mwana Mbuzi.

²Ivuha kuchiiya na kahikahi ye njia nkuu ya humuḍe mudzini. Kula yombe jwe tsana, kwiwa na hu muhi wiwonapfa wantu maisha ya kuunga na yuungo. Hu muhi wikivyaa matunda myeedha kumi na miwii kwa mwaka, kula mwezi ukivyaa mweedha mumodza.[22] Na haya magombaye ni d̯awa ya kuwapfonya wantu wa vyeet̯i vya humu lumwenguni.

³Humuḍe mudzini ntakuwe na kiḍechonse kiḍuijwecho ni Muungu. Hiki kiti cha kihaju cha Muungu na huyu Mwana Mbuzi chaa humuhumuḍe mudzini, na hawa wahumisiwe wadzamuhumikia.

⁴Wadzamuona uso kwa uso, na hiḍi sariḍye ḍinawa ḍyoregwa vidhangoni mwao.

⁵Hukuḍe ntakuwe siku, na hawaḍe weo humuḍe mudzini ntawahit̯aḍyi muyanga wa tsaa wala wa dzuwa, koro Ḅwana Muungu jeje mwenye anawa ndiye hu muyanga wao. Nao wadzat̯awala dza mahaju maishi na maishi.

⁶Kisa huyu malaika kanyamba, “Hivi ni vyuuwo vya kuhikizika na mvya ḍugha. Ḅwana Muungu ndiye eyenawawezesa hawa manabii kuyavya maagu yao kuchiiya na kwa huyu Ruhu jwakwe. Nae ndiye amuhumiye malaika jwakwe adzeawayange wahumisiwe haya ya kwamba ni had̯i yahendeke si hat̯a kae.”

⁷Kisa Ḅwana Yesu kamba, “T̯ayowani, nyakudzani si hat̯a kae! Kadzawa na tsekea iyodze huyuḍe avigijie hivi vyuuwo vya unabii vyorejwevyo humu chuoni!”

⁸Mimi Yohana, ndimi niyasikiiye na nikiyaona haya haya mambo yonse. Na nipfoyaona nikyendanikisa, nimugwiya maguuni huyuḍe malaika ayaniyangiye ili nimuyombe.

⁹Ela kanyamba, “Moro nkudzohende hivyo! Mimi ni muhumisi jwa Muungu dzawe na manabii wenziwo na hawaḍe wonse wadzeoyagija haya yorejweyo humu chuoni. Nkudzonivunziye nkuhi mimi, muvunziye nkuhi Muungu.”

¹⁰Kisa kanyamba, “Manya utseviweka siri[23] hivi vyuuwo vya unabii vyorejwevyo humu chuoni, koro vijwakuhendeka si hat̯a kae.

¹¹Huyuḍe eyekuhendani mazuka, nagije kuhenda mazuka. Huyuḍe eyekuhendani mambo machafu machafu, nagije kuhenda mambo machafu machafu. Ela huyuḍe eyekuhendani hachi, nagije kuhenda hachi. Na huyuḍe eye mudheru, nagije kuwa mudheru.”

¹²Kisa Ḅwana Yesu kamba, “T̯ayowani, nyakudzani si hat̯a kae! Na nidzamuipfa kula mumodza kuuḅana na mahendoye.

¹³Mimi ndimi Ḍabvu na Mwiso,[24] jwa d̯ura na jwa mwiso. Ndimi niyenaḍabvisa mambo yonse na ndimi niyenayesa.”

¹⁴Wadzawa na tsekea iyodze hawaḍe wayafwiiyeo mavwazi yao. Hao wadzawa na hachi ya kuunjia huḍe mudzi na kuḍya haya matunda ya hu muhi wiwonapfa wantu maisha ya kuunga na yuungo.

¹⁵Ela weonahendeka dza machughe, watsawi, wantu weonahenda uḅari, wayaji, weonayomba masanamu na wonse watsakiyeo nsuwe, hao ntawawezi kunjia humuḍe mudzini.

¹⁶“Mimi Yesu ndimi nimuhumiye malaika jwangu adze amwambiye nyonse mwiwo matsanganikoni dzuu ya haya haya mambo. Mimi ni kit̯ukut̯uku cha haju D̯aud̯i na niyawa chunoni mwakwe. Nami ndimi huyu eyenahanwa Nyoha ya Magura.”

¹⁷Huyu Ruhu na huyu Ḅiḅi Harusi wamba, “Nzoo!” Na yuḍejwonse avisikiiye hivi hivi nambe, “Nzoo!” Yuḍejwonse eye na nchiu nadze! Atsakiye madzi yeyonapfa wantu maisha yasiyosia, nadze anwe ḅure!

¹⁸Nyakumukanyani kula adzeevisikia hivi vyuuwo vya unabii vyorejwevyo humu chuoni. Yuḍejwonse adzeekwongeza dzambo, nae Muungu anamwongezea haya mabigo yorejweyo humu chuoni.

¹⁹Na yuḍejwonse adzeefuta kiḍechonse kahi ya hivi vyuuwo vya unabii vyorejwevyo humu chuoni, nae Muungu anamupfoka hizi mvoni zyorejwezo humu chuoni. Anamupfoka hi hachiye ya kuunjia huḍe mudzi mudheru, na hi hachiye ya kuḍya haya matunda ya huḍe muhi wiwonawapfa wantu maisha ya kuunga na yuungo.

²⁰Huyuḍe avilalabviye hivi hivi kamba, “Hakika, nyakudzani si hat̯a kae!” Amina. Ad̯o nzoo Ḅwana Yesu!

²¹T̯ei ya Ḅwana jwehu Yesu naiwe pfamodza nanywi nyonse. Amina.