Read pokomo Upfenuo wa Yohana 5 Bible Online

Upfenuo wa Yohana 5 - pokomo bible

Upfenuo wa Yohana 5

¹Kisa niona hu mukono kuyume wa huyu akaiye kwa hichi kiti cha kihaju ugija chuo. Hichi chuo[7] kiwa choregwa nze na kuzimu na kiwa kifungwa na mihuri mifungahe.

²Niona na malaika mwenye nguvu, akilalabva akyamba, “Ni ga eye na hachi ya kuivunza hi mihuri akifunguye hichi chuo?”

³Ela ntakwiwa na yuḍejwonse mbinguni, lumwenguni ambu kuyawa kwa lumwengu jwa wafu, eyekuwa na hachi ya kuchifunguya hichi chuo akiyowe.

⁴Nami kudzaona hivyo, ninjia kuiyani na tsungu muno, koro ntakwiwa na hat̯a mumodza eyekuwa na hachi ya kuchifunguya hichi chuo achisome.

⁵Ela mumodza jwa hawaḍe wazee miyongo miwii na wane kanyamba, “Yatsa kuiya! Huyu eyenahanwa Nsimba jwa kyeet̯i cha Yud̯a, eye kit̯ukut̯uku cha haju D̯aud̯i kashinda! Ndookomu jeje anaweza kuivunza hi mihuri akifunguye hichi chuo.”

⁶Kisa niona Mwana Mbuzi asumamiye hafufi na hiki kiti cha kihaju na akizunguukwa ni hivi viumbe vyoone na hawa wazee. Huyu Mwana Mbuzi kakaa dza kwamba ewa katsinzwa. Na ewa na mpembe mfungahe na matso mafungahe, ambayo ni hizi ruhu mfungahe za Muungu zizohumwa lumwengu yuzima.

⁷Huyu Mwana Mbuzi kenda kachihwaa hichi chuo kuyawa kwa hu mukono kuyume wa huyu akaiye hapfa pfa hichi kiti cha kihaju.

⁸Epfokihwaa, hiviḍe viumbe vyoone pfamodza na hawaḍe wazee miyongo miwii na wane wamugwiya maguuni. Kula mumodza jwao ewa na kinuḅi na ḅaakuli ya dhahaḅu. Haya maḅaakuli yewa yadzaa vumba t̯ipu ambaḍyo ni mayombo ya wadheru wa Muungu.

⁹Wamwimbia wiya mupfya wakyamba, “Wewe unamala kuchihwaa hichi chuo, uivunze hi mihuri yakwe. Koro wewe kuyagwa, na kwa mwaziwo, kumukombowea wantu Muungu. Wewe kumukombowea wantu, wa kuyawa kula nsi na kyeet̯i na lugha.

¹⁰Kuwahendeza wawe wantu wa Uhaju wa Muungu na wakohani wa kumuhumikia Muungu jwehu. Nao wanajut̯awala lumwengu.”

¹¹Nikidzanikihea matso kawii, nisikia saut̯i za malaika wenji na wenji wasiot̯alika waringiyeo hiki kiti cha kihaju, na hivi viumbe vyoone na hawa wazee.

¹²Hawa malaika wekikwimba na saut̯i nkuu wakyamba, “Huyu Mwana Mbuzi ayagijwe, anamala kushad̯wa kwa dzambo ḍya uwezowe mukuu, ujabvawe, mvidhyoye na nguvuze. Jeje anamala kukuzwa na kuhilwa.”

¹³Kisa nisikia viumbe vyonse, vivyo mbinguni dzuu na lumwenguni na nsii ya gaga ḍya lumwengu na madzini kuzimu, vikikwimba wiya. Vikwimba vyamba, “Huyu akaiye dzuu ya kiti cha kihaju, pfamodza na huyu Mwana Mbuzi, nawashad̯we na kukuzwa, na kuhilwa na kuwa na nguvu maishi na maishi.”

¹⁴Na hiviḍe viumbe vyoone vyamba, “Amina.” Na hawaḍe wazee miyongo miwii na wane wamugwiya Muungu na huyu Mwana Mbuzi kuwayomba.