Read pokomo Upfenuo wa Yohana 7 Bible Online

Upfenuo wa Yohana 7 - pokomo bible

Upfenuo wa Yohana 7

¹Ḅaad̯a ya hayo, niona nzozi ingine. Niona malaika wane wasumamiyeo mpembe zoone za huju lumwengu. Wazigija hizi mpepfo zoone za huju lumwengu ili zitsebiga nsi guba, ḅaharini ambu mihini.

²Kisa niona malaika yungine ayawiye muyao dzuwa. Ewa katsukuya muhuri wa Muungu eye mojo. Kawakelelea hawaḍe malaika woone weopfegwa uwezo wa kuinanga hi nsi ne ḅahari, kawamba,

³“Namutseinanga nguzi hi nsi wala hi ḅahari ambu hi mihi, mumpaka wahumisi wonse wa huyu Muungu jwehu huwabige muhuri humu vidhangoni.”

⁴Kisa nisikia hesaḅu ya hawaḍe wabigijweo muhuri wa Muungu. Wewa ni wantu gana na miyongo mine na wane elefu, kuyawa kwa vyeet̯i vyonse vya Isiraeli.

⁵Na kula kyeet̯i kwiwa wantu elefu kumi na mbii wabigijweo muhuri. Kyeet̯i cha Yud̯a kwiwa wantu 12,000, kyeet̯i cha Rubeni wantu 12,000, na kyeet̯i cha Gadi wantu 12,000.

⁶Kyeet̯i cha Aseri kwiwa wantu 12,000, kyeet̯i cha Nafutali wantu 12,000, na kyeet̯i cha Manase wantu 12,000.

⁷Kyeet̯i cha Simioni kwiwa wantu 12,000, kyeet̯i cha Lawi wantu 12,000, na kyeet̯i cha Isakari wantu 12,000.

⁸Kyeet̯i cha Zabuloni kwiwa wantu 12,000, kyeet̯i cha Yusufu wantu 12,000, na kyeet̯i cha Benyamini wantu 12,000.

⁹Ḅaad̯a ya hayo, niona t̯ut̯a nkuu na nkuu ya wantu isiyot̯alika. Wewa ni wantu wa kuyawa kula nsi, na kula kyeet̯i na kula lugha. Wewa wasumama usoni ya hiki kiti cha kihaju na usoni ya huyu Mwana Mbuzi. Wewa wavwaa mavwazi meupe na wagija mahambi ya mintende mikononi mwao.

¹⁰Nao wekinena na saut̯i nkuu wakyamba, “Muungu jwehu eyenakaa kwa hichi kiti cha kihaju, pfamodza na huyu Mwana Mbuzi, ndiwo weo na uwezo wa kupfonya wantu.”

¹¹Na hawa malaika wonse weosumama kukizunguuka hiki kiti pfamodza na hawa wazee na hiviḍe viumbe vyoone, wamugwiya Muungu kumuyomba.

¹²Wamba, “Amina. Muungu jwehu anamala kushad̯wa kwa dzambo ḍya uwezowe mukuu, mvidhyoye na nguvuze. Jeje anamala kukuzwa na kuyavizwa ḍuḍa na kuhilwa maishi na maishi. Amina.”

¹³Kisa mumodza jwa hawaḍe wazee miyongo miwii na wane kaniuza kanyamba, “Awa wantu wavwaiyeo mavwazi meupe kuwamanya? Wayawa ku?”

¹⁴Mimi nimwambukuya nimwamba, “Sidzi ḅwana. Ndiwe umanyie.” Nae kanyamba, “Hawa ni hawaḍe wayawiyeo kwa hiḍe d̯ina nkuu. Wao wayafuya mavwazi yao na mwazi wa huyu Mwana Mbuzi, na yahenda meupe pee.

¹⁵Ndiyo maana wasumamiyeo usoni ye kiti cha kihaju cha Muungu, wakimuhumikia siku na musikahi Hekaluni mwakwe. Nae jeje akaiye kwa hiki kiti cha kihaju anawa pfamodza nao na kuwachinga.

¹⁶Nao ntawawezi kusikia nzaa wala nchiu kawii meshi. Ntawawezi kubigwa ni dzuwa kawii wala kutsomwa ni moho wa hiḍi dzuwa.

¹⁷Koro huyu Mwana Mbuzi eyenakaa kahikahi ya hiki kiti cha kihaju, anawa ndiye huyu mut̯unga jwao. Nae anawapfiika kuntu kwa matsana ya madzi ya mutsangani kuzimu yeyonapfa wantu maisha. Nae Muungu anawafuta mitsozi yao yonse.”