Read pokoot TOWUNÖT 12 Bible Online

TOWUNÖT 12 - pokoot bible

TOWUNÖT 12

¹Kïlenchï ECHOTYON Apram, “Pïstenö korengwo nko pikökwo nko kato papongu aiwö itang kor nyo owetan oporunyi.

²Oghinyi lïkune pipö kor akonga cho chang tya. Osoyöninyi aghinyi rumtenö lasiny atelïkuna kisoyönöt.

³Osoyönan pich cho soyöninyi, wölo ochïpan chi nyo chïpinyi akesoyönöy pipö ngwïny kïmïkul ompö nyi.”

⁴Kïlenyona, kïwö Apram lenyini kimwochï ECHOTYON, kïwö Lot tïkwïl. Kitïng Apram könyis 75 otini kingetunö Aran.

⁵Kumït Apram korkenyi Saray nko Lot werto werïngwa, akwip tïkukwa löwïr cho kinyorchï korononi nko pich löwïr cho kinyorchï koro Aran, kïnget tökïpa kutang koro Kanan. Otini kitïta chane koro Kanan.

⁶Kïruto Apram kuwerata kwenu korononi ntökïtenö kwitïta Syekem, wölo kimi ket nyo tïlil ompö More. Kimöngöy pipö Kanan korononi osiswechoni.

⁷Kuchumchï ECHOTYON Apram akïlenchï, “Otöninan moneku koronete.” Atolapay kïtekyï Apram ECHOTYON ato kïpelo amöros.

⁸Atolapay kïweghö atoni ntökwit kutïng nyo kimi wölnö le kongasispa Petel akïpörtochï emenyi. Kitöpunö kwenu Petel okumpö ta nko Ai okumpö kongasis. Kïtekyï wöloni tïkwïl ato kïpelo amöros akïsagh ECHOTYON.

⁹Atolapay kïweghö Apram atoni akulet tagh kutang Kanan okumpö tagh.

¹⁰Kimito kömöy osiswechoni koro Kanan. Kingwan nyoman kömöyunoni nyo kigh Apram kïröyto ngat kutang okumpö tagh ntökwit koro Misri tökumï kïmang wöloni osis cho te.

¹¹Otini kirich kïlït koro Misri, kïlenchï korkenyi Saray, “Anyï ichinyi korka nyo pïchigh.

¹²Otini kasïwïnyi pipö Misri kunonöy lö, ichinyi korkenyan, atolapay kïpechï kïparanïn akïpïstinyi.

¹³Kïlenyona imwochï chane lö, ichinyi cheptöncha tökïpïstanïn akwighwanïn nyo karam ompö nyi.”

¹⁴Otini kilït Apram koro Misri, kïsïwa pipö Misri lö, kipïchigh Saray koko Apram nyoman.

¹⁵Nyini kisïwa opisatina Parao Saray wölini kipïchigh kïlïkwï, kïpa kïmwochï Parao, kemït kamanay wölini le kö pö Parao.

¹⁶Kwighchï pöytoghintonay Apram nyo karam akwompö Saray, akutö Apram kechir nko tïch nko kiru sïkïröy nko tamasay.

¹⁷Wölo kunyaril ECHOTYON Parao nko konyi kïmïkul ompö Saray nyo kile koko Apram.

¹⁸Kïkur nyu Parao Apram akïlenchï, “Ne kitö nyï keghwaninyi? Kölö ne tömemwowaninyi lö korkengu Saray?

¹⁹Ompö ne temwaghanyi lö cheptönkwa aipïswaninyi achengan nyinte kïlïkwï korkenyan? Anyï korkengu, mïta aiwechï kegh!”

²⁰Kuyomis pöytoghintonay pikachi kïpa kumït Apram kïngeta korengwa nko korkenyi nko tïkuchi löwïr cho kitïng.