Read pokoot TOWUNÖT 14 Bible Online

TOWUNÖT 14 - pokoot bible

TOWUNÖT 14

¹Kituyö osiswechoni pöytoghï angwanï, Amrapel nyo pö Papilonia nko Ariok nyo pö Elasar nko Kedorlaomer nyo pö Elam nko Tidal nyo pö Koyim,

²akïtat ngala poryot nyo kiporyeghö Pera pöytoghinto Sodoma nko Pirsya pöytoghinto Komora nko Syinap pöytoghinto Adma nko Syemeper pöytoghinto Sepoim nko pöytoghinto Pela, nyoni kï Soar.

³Kituyechï pöytoghichoni kï mut pikökwa cho pö lïk mpöghoghyo Sidim (nyoni kï nanampa Paryan).

⁴Kimi chane kiterchini pöytoghinto Kedorlaomer ompö könyis taman nko odeny, wölo nyini kilïkwï könyito taman nko sömök kïtagh nyinte.

⁵Ato mi könyito taman nko angwan, kungwïn pöytoghinto Kedorlaomer nko pöytoghichay kimi tuyot tïkwïl nko askarinekwa akïrïnta pipö Repaim ompö Asterot Karnaim nko pipö Susim ompö Am nko pipö Emim ompö mpöghoghyo Kiryataim

⁶nko pipö Ori ompö kutïng pö Seir, kïyon chane ntökwit Elparan, wölini lekïto sörömu surkwen.

⁷Atolapay kïmïlonchö kutöngwï Kades (kikïkuro osiswechoni Enmispat). Kunor koro Amalek kïmïkul, akïrïnta pipö Amori cho kimöngöy Asason Tamar.

⁸Atolapay kïnopchï kegh poryot pöytoghi Sodoma nko Komora nko Adma nko Sepoim nko nyo pö Pela (nyoni kï Soar) tökïporyeghö ompö mpöghoghyo Sidim

⁹nko Kedorlaomer pöytoghinto Elam nko Tidal pöytoghinto Koyim nko Amrapel pöyoghinto Papilonia nko Ariok pöytoghinto Elasar, kïporyeghö pöytoghï angwanï pöytoghï mut.

¹⁰Kinyïghï lam mpöghoghyononi pö Sidim, kïkany otini kilentöy pöytoghi Sodoma nko Komora kïryöghöy otini kila poryot, kupïtyini lam ori wölo kupertoy cho le sömök kïpus kutïngkot.

¹¹Kïlenyona, kurit pöytoghichay le angwan tïkwïn löwïr cho kimi Sodoma nko Komora, ompö chini le omisyewut, akïpechï kegh.

¹²Kumït pungchay Lot nyo kile wero werto ompö Apram, nyo kimöngöy Sodoma kïmi nko tïkuchi löwïr.

¹³Kïchïwït chi akong akïwö kïmwochï ngalechoni Apram nyo kile chi pö Eprania, nyo kimöngöy ato kilekïtö keti Mamre nyo pö pipö Amori, werto ompö Eskol nko Aner cho kökikutuyö kegh nko Apram.

¹⁴Nyini kilïm Apram lö, kikenam werïngwa akemït kïlïkwï ratan, kïkur pipö lïk lapay cho kimi möngenyi, kilïkwï pïchoni lapay pich 318, kïyonota pöytoghichay le angwan ntökwit Dan.

¹⁵Nyini kitïta wöloni, kïchaghachagh pikachi kïtïpïyö ompö söpïchis akïporyeghö punkökwa oghö, kïrïnta akïyon ntökwit Opa nyo mi okumpö löt ompö Damaska.

¹⁶Kïlenyona, kïsörï Apram tïkwïn lapay cho kipar pung akïsörï werïngwa Lot nko tïkuchi kïmïkul, kïmi nko koruko pikö walaka.

¹⁷Otini kimïlegha Apram poryenyi nyo kirïnta pöytoghi Kedorlaomer nko pöytoghi walaka cho kimi tuyot nko nyinte, kïwö pöytoghinto Sodoma kïtaroch nyinte ompö mpöghoghyo Syawe (nyoni kï mpöghoghyo pöytoghin).

¹⁸Kwipchï Melkisedek pöytoghinto Salem nyo kile tïsinto Tororöt nyo Töror Tya Apram makatyan nko kumi sapipun,

¹⁹akusoyön Apram akïlenchï, “Nya kusoyön Tororöt nyo Töror Tya Apram, Tororöt nyo kigh yïm nko ngwïny!

²⁰Akïsala Tororöt nyo Töror Tya nyo keghïn rïntena punköku!” Kutö Apram Melkisedek kareran nyo pö taman nyo pö tïkwïn lapay cho le pöröw.

²¹Kïlenchï pöytoghinto Sodoma Apram, “Ipönyi tïku lapay, wölo kaykay yokwante pikachu.”

²²Kuyokyï Apram pöytoghintonay pö Sodoma lö, “Owolwolan ompö ECHOTYON, Tororöt nyo Töror Tya nyo kigh yïm nko ngwïny

²³lö, mochenganye ompö nyo le tasim anta törököwonto kweghyon anta kïgh anka tïkwïl nyo le nyengu, tömelö kaghan Apram kïsïch sïkönön.

²⁴Möminye kïgh nyo ochengan nyonikïny, kïpoto tïkwïn cho kikwam mïrön nko pich walaka cho kikïpecha tïkwïl. Wölo kanya kwip Aner nko Eskol nko Mamre cho le chikwa.”