Read pokoot TOWUNÖT 15 Bible Online

TOWUNÖT 15 - pokoot bible

TOWUNÖT 15

¹Nyini kiwonyö ngalechoni, kungwïn ngölyonto ECHOTYON wölo mi Apram ompö sïwïyagh nyo kilö, “Mewöghisyö Apram! Ochan longengu. Akoninyi ropöwon nyo wow tya.”

²Wölo kuyokyï Apram lö, “Nyi Echotyon TORORÖT, ne nyo ngörokanïn ropöwontononi ikonaninyi akwanyï motïngetanye monïng? Olentan Elieser nyay kingwïna Damaska nyo mïlanïn.

³Melö kekonaninyi mönïng, chi nyo mïlöy asïyech tïkuchan kï akonga ompö sekeyköchan.”

⁴Atolapay kïlenchï ECHOTYON Apram, “Melö lïku sekeyontonï le Elieser mïlintengu, werïngu kegh nyo mïlinyi.”

⁵Kumït ECHOTYON nyinte kïlït sany akïlenchï, “Topöne yïm köny aimukyï iyit kokel, ato imukenyi iyitöy! Lenye nyoni wölo chongitu moneku kïlïkwï!”

⁶Kughan Apram ECHOTYON, kïngarak ECHOTYON ompö nyinte akuyit lö, chi pö man.

⁷Atolapay kïlenchï Apram, “Ochan ECHOTYON nyo kyamïtuneninyi Ur nyo pö Papilonia atokoninyi koronete atemïla.”

⁸Wölo kïlö Apram, “Echotyon TORORÖT, onkïtunan lö ne lö omïlan koronete?”

⁹Kïlenchï ECHOTYON, “Ipkante mösör nko söpölyon nko makal, cho tïng könyis sömök löwïr nko chepïrïm.”

¹⁰Kwipchï Apram Tororöt tïkuchoni löwïr, kïkarer tyonchay löwïr kwen kïlïkwï odeny atolapay kïtat panyechay kakïkarer kïtopön kegh, wölo kimakarernye kwen chay le törit.

¹¹Akwotini kichörorchini mötongwö panyechay, kutul Apram.

¹²Akwotini kimach kïröyto asis, kwam Apram rïwönto nyo nïkis. Kuyen tuwïn nyinte nyo wow nko kiwaghat.

¹³Kilenchï ECHOTYON Apram, “Inkïtï nyo pö nyoman lö lïku moneku to ompö koro pich walaka, pöghisyechini chane ompö nyarïl piko korononi akïlïku sekey ompö wöloni könyis 400.

¹⁴Wölo orwokyinan pïchoni ighöy chane sekey, akwotini ngetuno chane korononi pö tontön, kïpkonöy nko sïkönöt nyo wow.

¹⁵Wölo itöponyi könyis cho chang airöpösenyi ompö kalya.

¹⁶Mïlonchot moneku koronete ato itïta pïnwöy angwan, ompöwölo tomönye kwitïta ghöyityo pipö Amori.”

¹⁷Otini kökiröytö asis akïtuwit, kuchumï ighot nyo kingwïno töro ma nko kitömöwon nyo kitïng lyopöt akuwer kwenu panyechay kakïkarer aketat.

¹⁸Kam ECHOTYON muma* nko Apram asisoni lö, “Otöninan moneku koronete kïmïkul, kïngata lalwa Misri ntökwit lalwanay wow kïkuro Yuparet.

¹⁹Kïmi nko koroswo pipö Kenin nko Kenis nko Kadmon nko

²⁰Ititi nko Peris nko Repaim

²¹nko Amori nko Kanan nko pipö Kirkasyi nko Yepusi.”