Read pokoot TOWUNÖT 17 Bible Online

TOWUNÖT 17 - pokoot bible

TOWUNÖT 17

¹Otini kitïng Apram könyis 99, kuchumchï ECHOTYON akïlenchï, “Ochan Tororöt Kimuktoghin. Tekanïn aitöpö kïpuryö kigheghchin ompö ani.

²Oman muma nko nyi atatasan moneku kïchangit tya.”

³Kungïrukö Apram ntökwit tokochunyi ngwïny ompö konyït kïlenchï Tororöt Apram,

⁴“Oman ye muma nko nyi, ilïkunyi papo pö punton cho chang.

⁵Amelö tökekuro kaynengu ngat Apram, wölo kïkuro Apraam,[5] ompöwölo kaghinyi lïkuna papo pö punton cho chang.

⁶Oghinyi yiye monïng cho chang tya aghinyi lïkuna pipö punton akïpkono wölo imitenyi pöytoghï.

⁷“Okïninionan mumenyan nko nyi nko moneku cho rïpunyi nko pïnwöyikwa, tökïlïkwï muma nyo pö kokay, nyo poru lö olïkunan Tororötïngu alïkwan Tororöt pö moneku cho rïpunyi kokay.

⁸Okoninyi tönan moneku koronete kemitenyi imöngöy kïle chi nyo le ton koronete pö Kanan kïmïkul tökïlïkwï nyinkwa kokay atalïkwan Tororötïnkwa.”

⁹Atolapay kïlenchï Tororöt Apraam, “Parakungu tïkwïl ripö mumenyan, nyinte kegh nko moneku cho rïpunyi nko pïnwöyikwa lapay.

¹⁰Mïchinokwa löwïr nko pïnwöy cho pkonöy, achama kemut monïng anka tïkwïl nyo le weri.

¹¹Omutekwa onte nyo mi parak, lïku nyoni machey nyo pö mumenyan nko akwa.

¹²Omutekwa monïng anka tïkwïl nyo le weri otini ketïta osis mut nko sömök. Monïng anka tïkwïl ompö pïnwöy löwïr, ato kö sekeyon anta nyo kö pö kaw, anta nyo kalekwa ropïyen kïngetunö ton nyo melö pö yiyengu,

¹³nyo mötïny, kïmutöy anka tïkwïl. Nyoni nyo lïku mumenyan nyo mi porwöyikwa, muma nyo pö kokay.

¹⁴Kipesyot chi anka tïkwïl nko pikachi nyo le ngetat nyo tomönye kemut, ompöwölo kapeny mumenyan.”

¹⁵Kïlenchï Tororöt Apraam, “Melö mïchini ngat kurenönyi korkengu Saray, kurenö kaynenyi kïngata ye kutang tagh Sara.

¹⁶Operuran nyinte akoninyi monïng nyo le weri ompö nyinte. Operuran nyinte akïlïku yoto punton cho chang, akïpkono nyinte pöytoghi pipö punton.”

¹⁷Atolapay kupïtyï Apraam ngwïny ompö konyït akïror ompö mïkulöwunyi otini kinonöy lö, “Akumuko nyoman lö yiyöy chi monïng nyo pö könyis pokol? Akumuköy Sara nyo tïng könyis 90 ntökïyï?”

¹⁸Kïtep Apraam Tororöt lö, “Ompö ne tömeghanyi Ismael kïmïlanïn?”

¹⁹Wölo kuyokyï Tororöt lö, “Ewo! Sïkunyi korkengu Sara monïng nyo le weri nyo ikuronyi kaynenyi Isak.[6] Okïninionan mumenyan nko nyinte nko monechi cho rïpu nyinte kokay.

²⁰Kalïman somötengu nyo pörtoy okumpö Ismael, operuran nyinte atönön monïng cho chang nko pipö arenyi cho chang. Lïku Ismael papoto pöytoghï cho le taman nko odeny, oghan nyinte kïsïch pipö punton akonga nyo wow.

²¹Wölo okïninionan mumenyan nko Isak nyo yiyunyi Sara ato ngata ye könyinï ngwïnöy.”

²²Otini kiwany Tororöt kïngalan nko Apraam, kïwechï kegh.

²³Kutuyö Apraam werïnyi Ismael nko monïng cho kikïyichï konyi cho kipö sekey nko monïng cho kyala ropïyenichi, kïmut chane lapay asis akonga kïrïp kegh nko kiyomisöto Tororöt.

²⁴Kitïng Apraam könyis 99 otini kiwö tum.

²⁵Kitïng werïnyi Ismael könyis taman nko sömök otini kiwö tum.

²⁶Kemut Apraam nko werïnyi Ismael asisini le akonga.

²⁷Kikïmut nyinte nko pich lapay cho kikïyichï konyi nko cho kile to cho kikyala ropïyen.