Read pokoot TOWUNÖT 2 Bible Online

TOWUNÖT 2 - pokoot bible

TOWUNÖT 2

¹Kïlenyona, kwighisyö yïmwöy nko ngwïny nko tïkwïn löwïr cho mi oringwa.

²Otini kitïta asispa mut nko odeny, kuwany Tororöt ighisyenyi nyo kighöy akumuny ompö ighisyewutkachi löwïr.

³Kusoyön Tororöt asispa mut nko odeny akïngot kïlïkwï asis nyo tïlil ompöwölo asisoni nyini kimuny Tororöt ompö ighisyenyi nyo pö towunöt.

⁴Lenye nyï wölo kikida yïmwöy nko ngwïny. Otini kigh ECHOTYON Tororöt yïmwöy nko ngwïny,

⁵kimöminye ket cho kimi ngwïny akimöminye kösïgh cho kipit, ompöwölo kitomönye kïropönchï ECHOTYON Tororöt ngwïny akimöminye chi nyo kingor ngwïny.

⁶Wölo kïngetunö kapuret ngwïny akupïs kor kïmïkul.

⁷Atolapay kwigh ECHOTYON Tororöt chi ompö nyïngwïtyan akumungchï sörunöyichi söpon, kïlïkwï chichay ighan nyo satate.

⁸Atolapay kwigh ECHOTYON Tororöt par ompö Eden, wölo kile kongasis akutö wöloni chichay kigh nyinte.

⁹Akwigh kïpita wöloni ket anka tïkwïl nyo karam nyo yiyu akwa cho karamach cho mïchini kïlïkwï omisyö. Kimito kwenu paranoni ket pö söpon nko ket nyo kinkïtuno kïgh nyo karam nko nyo gha.

¹⁰Kimi lalwa wölini le Eden nyo kiyinchini paranay, kïchagh kegh lalwanay kïlïkwï angwan.

¹¹Kïkuro nyo pö tagh Pisyon, kiyinta lalwanoni kuwit koro Apila kïmïkul.

¹²(Kimi koltinö cho pïchighöch wöloni akimito mwowöy tïkwïl cho ngutoy cho pö töngönchin, cho mömicha walaka cho lata choni nko koghïn cho pö olyot nyo wow.)

¹³Kekurö lalweto odeny Kion, kiyinta lalwanoni kuwit koro Kus.[1]

¹⁴Kekurö lalweto sömök Tikris, kiyinta lalwanoni kutang okumpö kongasis nyo pö koro Asirya. Kekurö lalweto angwan Yuparet.

¹⁵Atolapay kutö ECHOTYON Tororöt chichay paranay pö Eden tökïyap akïrip.

¹⁶Kïlenchï ECHOTYON Tororöt chichay, “Imukenyi ntyam akwa löwïr cho pö ket anka tïkwïl nyo mi paranï,

¹⁷wölo meam akwa ketay kinkïtuno köromnyö nko ghöyityö, ompöwölo imeghenyi asisini kyamanyi akwechoni.”

¹⁸Atolapay kïlö ECHOTYON Tororöt, “Melö mïchini kïtöpö chi onkït. Oghchinan nyinte kingörokin nyo mïchini.”

¹⁹Kïlenyona, kïchenga ngwïny nyïngwïtyan akwigh tyonkïn löwïr nko törit löwïr, atolapay kwipï chichay kura tökïmïnchï chane kaynötut akï kaynat anka tïkwïl nyo kimïnchï chichay tïkuchoni le ighan, kï choni cho kilïkwï kaynötutkökwa.

²⁰Kïlenyona, kïmïnchï chichay kyak cho kïpöghöy kaynötut lapay nko törit nko tïpö wudïn wölo kimöminye nyo le ompö akonga nyo kimïchï kïlïkwï kingörokintenyi.

²¹Atolapay kwigh ECHOTYON Tororöt chichay kïsïch rïwön nyo nïkis akwotini kimi rïwön, kïcheng karasyanta chichay nyo le akonga akuyenö peny otini.

²²Kwigha ECHOTYON Tororöt korka karasyantanay, akwipchï chichay.

²³Kïlö nyu chichay, “Nyoman! Anyï nyu kowo koyechan, akï pempö pentönyan. Kïkuro nyinte ‘Korka,’ ompöwölo kakïchengunö nyinte mïrön.”[2]

²⁴Nka nyay pïstoy chi kwanta nko kame akïtuyö nko korkenyi akïlïkwï chane por akonga.

²⁵Kichïrut chichoni nko korkenyi, wölo kimasïwacha lalïyanat.