Read pokoot TOWUNÖT 23 Bible Online

TOWUNÖT 23 - pokoot bible

TOWUNÖT 23

¹Kitöpö Sara könyis 127.

²Kïröpösyï Sara Kiryatarpa, nyoni kï Epron nyo mi koro Kanan. Kungwïn Apraam kïloch kïrirchï Sara.

³Kïweghö Apraam atoni kimegha korkenyi akïwö kïlenchï pipö Ititi,

⁴“Ochan rutoghin nyo owestegho kwenunkwa. Oltewante par kite ompö korenkwa otïpchan korkenyu.”

⁵Kuyokyï pïchay pö Ititi Apraam lö,

⁶“Terwecha, we echotyon ichinyi wow nyoman ompö kwenuncha. Tïpchinö mïntïrïchengu pïrïm nyo kekïlanyi ompö pïrïmpoticha, möminye chi ompö acha nyo muköy kïgheteninyi pïrïmpenyi tömetïpchï mïntïrïchengu.”

⁷Kïnget Apraam akungïrukyï pipö Ititi ompö konyït,

⁸akïlenchï, “Ato kochömwanïkwa otïpön mïntïrïchenyu, kïkaram osomwante Epron wero Soar,

⁹kwoltewanïn köpönenyi nyo mi Makpela sörömuto parenyi, aghan kïlïkwï parsïkontönyan, otöninan nyinte ye ropïyeni cho mïchini.”

¹⁰Kitöpö Epron tïkwïl kwenuto pikökwa pipö Ititi. Kïlenchï Epron Apraam kïlïmöy pipö Ititi, cho kituyeghö kukanay pö kanasyan,

¹¹“Ewo, echotyontenyu, terwante. Okoninyi pare kïmïkul nko köpöne nyo mi orinyi. Kokonwan kïsïwïyi piköchan. Tïpchinö mïntïrïchengu wöloni.”

¹²Kungïrukö Apraam ngat ompö konyït ompö tawuto pïchay pö koronay,

¹³akïlenchï Epron kïlïmöy pïchay pö koronay, “Terwante, ato ichömenyi. Okoninyi olyeto parengu kïmïchï, nyo osoghinyi ye lö tacha ropïyenichï atowan otïpchï mïntïrïchenyu wölini.”

¹⁴Kuyokyï Epron Apraam lö,

¹⁵“Echotyontenyu, tere köny, kikongityot nko ne ompö nyi nko ani par nyo kyolo ropïyeni silpa cho le 400? Tïpö mïntïrïchengu.”

¹⁶Kïcham Apraam ngalechoni pö Epron, kupimchï ropïyenichay le 400 kökimwa nyinte ompö tawu pipö Ititi, le nyo kipöghisyegho mïnchïrïs osiswechoni.

¹⁷Lata nyoni wölo kisïktö Apraam para Epron nyo kimi Makpela okumpö kongasis pö Mamre. Kïlïkwï nyenyi pare kïmi nko köpöne nyo kimi orinyi nko keti tïkwïl cho kiwit paranoni,

¹⁸kikitö Apraam choni löwïr kïlïkwï tïkuchi ompö tawu pipö Ititi nko ompö tawu pich lapay cho kilïtöy tawu kuketo kanasyantenyi.

¹⁹Kïkany kuwonyö, kïtïpchï Apraam Sara korkenyi köpöno para Makpela kïparta wölnö le Mamre (nyoni kï Epron) nyo mi koro Kanan.

²⁰Kïlenyona, kikyolchï Apraam paranay kipö pipö Ititi, kïmi nko köpöne kïlïkwï nyenyi nyo tïpchini pich.