Read pokoot TOWUNÖT 27 Bible Online

TOWUNÖT 27 - pokoot bible

TOWUNÖT 27

¹Otini kiyosit Isak akiköryö konyïn tömökïsïwïyi kïgh, kïkur werïnyi Esau nyo wow akïlenchï, “Werïnyu.” Kïlö weri, “Anyï ani.”

²Kïlenchï, “Sïwene lö, kyayositwan amonkïtönye, asis nyo omeghan.

³Nyo karam ye nyu chenga kariku, kotiku nko kwantingu aiwö wölnö le wuw isökosï panya tyonkïn.

⁴Aingwïn ighwanïn omisyö nyo anyïn nyo lata nyo ochöman aipï, tosoyöninyi kïtomö ameghan.”

⁵Kilïmöy Repeka otini kingölonchini Isak werïnyi Esau. Kïkany otini kimi wuw pö sakas,

⁶kïlenchï Repeka werïnyi Yakopo, “Kalïman papongu kïlenchini werïnkwa Esau,

⁷‘Wïyö ipunö pempö tyompö wuw aigh omisyö nyo anyïn taman tosoyönïn ompö wölo mi ECHOTYON kïtomö arapasan.’

⁸Kïlenyona werïnyu, tere ngalechan airïp ngal cho omwowunyi.

⁹Wïyö panete wölnö le achey, airewanïn wara ngaror cho le odeny cho karamach, toghchan papongu omisyö nyo anyïn nyo lata nyo chömöy nyinte.

¹⁰Atepchinönyi papongu tökwam tökusoyöninyi kïtomö kïrapas nyinte.”

¹¹Wölo kïlenchï Yakopo kame Repeka, “Nyini sapul werïncha Esau akwanyï melö sapul portönyan.

¹²Nkït ngo töptoy tötöpanïn paponyan akïsïwa lö ochan lïsin, onyorwan nyu chïpöt nyinö kötö onyoru kisoyönöt.”

¹³Kïlenchï kame, “Nya kïtöpö parakunyan chïpengu, werïnyu, teranyi kutinyan kïpoto, aiwö nyu irewï warechoni.”

¹⁴Kïlenyona, kïwö Yakopo akurewï warechay wölo mi kame, kwigh kame omisyö nyo anyïn nyo lata nyini chömöy paponyi.

¹⁵Atolapay kïcheng Repeka sïro pö werïnyi nyay wow le Esau cho karamach cho kimi kö akulokyï Yakopo werïnyi nyo mïnïng.

¹⁶Akïrötyï ewunechi nko katïnyi wölo kimelö sapul, sïro chay pö wara ngaror.

¹⁷Akutö kame ewuneko werïnyi Yakopo panyechoni onyïnech nko makatyan nyo kökakwigh nyinte.

¹⁸Kïlenyona, kïwö Yakopo wölo mi kwanta akïkur lö, “Papo,” kïngitön lö, “Ooy! Ichinyi ngo nya, werïnyu?”

¹⁹Kïlenchï Yakopo kwanta, “Ochan werïngu Esau nyay le poretyengu. Kaghan kïle wölaye kemwowaninyi kaykay ngeta aitöpö ngwïny atama tïkuchan chï pkono sakas atesoyönante.”

²⁰Wölo kïtep Isak werïnyi ngat lö, “Akenyorunyi lö ne lawel nya, werïnyu?” Kïlö, “Ompöwölo köyonwanïn ECHOTYON Tororötïngu.”

²¹Atolapay kïlenchï Isak Yakopo, “Kaykay nyone rikuna werïnyu atatatapïn lö eichinyi werïnyan Esau anta ewo.”

²²Kïrich Yakopo wölini kimi kwanta, kïtatap atolapay kïlö, “Pö kuti Yakopo, wölo pö ewune Esau.”

²³Amelö kinkïtï nyinte, ompöwölo kisöpulöch ewunechi kïle cho pö werïngwa Esau. Kïlenyona kïmach kusoyön nyinte.

²⁴Akïtep ngat lö, “Ichinyi werïnyan Esau nyoman nya?” Kuyokyï lö, “Owöy ochan.”

²⁵Kïlenyona kïlenchï kwanta, “Ipunö wölo omitan ataman panyechini kesökoswaninyi werïnyu tosoyönïn.” Kïlenyona kwipchï Yakopo omisyonay, kwam nyinte, kwipchï kumi sapipun tïkwïl kïgha.

²⁶Atolapay kïlenchï Isak Yakopo, “Nyonö yi lekït werïnyu, tarokanïn.”

²⁷Kïlenyona kïwö Yakopo kïrich kwanta akïtaroch, kïnguchï nyinte kïmïs pö sïrokachi, kusoyön nyinte kïlö, “Lentöy ne kïmïsto werïnyan! Lenye kïmïs pö par, nyo kesoyön ECHOTYON!

²⁸Nya kïkonïn Tororöt röyönto yïm akïkonïn okwoghyo ngwïny nko chongïn pö pagh nko dipay.*

²⁹Nya kïpöghisyewun pich akïkïtïngchin puntonï. Ilïkwï echotyonto werkökwa aikany kïkïtïngchin werko yongu, akïchïpo chi anka tïkwïl nyo chïpinyi, ikany kusoyönö chi anka tïkwïl nyo soyöninyi!”

³⁰Otini lawel kiwang Isak kusoyön Yakopo, otini kitökïwegho Yakopo wölo mi kwanta, kwitï werïngwa Esau nyo kingwïno sakas.

³¹Kwigh Esau tïkwïl omisyö nyo anyïn akwipchï kwanta akïlenchï, “Ngeta paponyu, tyama pany cho kepunö werïngu sakas, atesoyöno!”

³²Kïtep kwanta lö, “Ichinyi ngo nya?” Kïlö, “Ochan poretyengu, Esau.”

³³Kïpotan Isak akïmïgh akïlö, “Kï ngo nyu nyay kengwïna sakas akwipkanïn pany cho kaman otini kötomönye itunanyi? Akwanyï kyosoyönön nyinte, owöy akikusoyönö nyinte?”

³⁴Nyini kilïm Esau ngaleko kwanta, kïloch ompö ngwonïn nyo wow akïlenchï kwanta, “Soyönante tïkwïl, we papo!”

³⁵Wölo kïlenchï, “Kengwïn werïnkwa ompö lïs, akïcheng kisoyönötengu.”

³⁶Kïlö Esau, “Kikïmïnchï kaynenyi kuten lö Yakopo![23] Ompöwölo kalïsanïn ye kïnyïl odeny. Kisarenanïn wowïnto yiyenyu, akwanyï ye kasarenanïn kisoyönötenyan.” Atolapay kïlenchï, “Metukwanïnyinye kisoyönote nyo le kite?”

³⁷Kuyokyï Isak lö, “Kyaghan Yakopo kïlïkwï echotyontengu tönön werkökwa lapay kïlïkwï mötworichi. Kotönön nyinte pagh nko kumi sapipun. Tökïne nyo towunyi ye nyu nya werïnyu?”

³⁸Kïlenchï Esau kwanta, “Nyo metïngetenönyinye kisoyönöt nyo le ompö akonga so papo? Soyönante tïkwïl, we paponyu!” Atolapay kutegh Esau akïrir.

³⁹Kuyokyï Isak lö, “Rose, lowitu möngengu nko okwoghyo ngwïny akïlowitunö röyön nyo ngwïno yïm.

⁴⁰Aisöponyi chokengu, aipöghisyechinyi werïngwo, wölo ato lilinyi kïgh, ityaka kegh morichi.”

⁴¹Kïwöch Esau Yakopo ompöwölo kisoyön paponyi nyinte, kïlö Esau ompö mïkulöwunyi, “Karich osiswö cho kïriröy ompö megha paponyan, ataparan nyu werïnyo Yakopo.”

⁴²Nyini kilïm Repeka ngala poretyenyi Esau, kïyonta chi kïwö kïkur Yakopo werïnyi nyo mïnïng, otini kingwïn kïlenchï, “Ne köny, mi werïnkwa Esau kukolyönöy kegh akïmi kunonöy lö opörinyi.

⁴³Kïlenyona werïnyu tere ngalechan, ngeta airïp wölo mi werïncha Lapan nyo möngöy wölnö le Aran.

⁴⁴Aiwö itöpö wöloni nko nyinte osis cho ngörï ntökïtenö kuwonyö ngwonïnto werïnkwa.

⁴⁵Otini kakuwonyeghö werïnkwa nörekyö ompö nyi, akïwutyeghö kini kighchinyi nyinte, oyokwan nyu chi kïkureninyi wöloni. Pö ne owonyeghenanïkwa kwodeny ompö asis akonga?”

⁴⁶Atolapay kïlenchï Repeka Isak, “Motïngetanye ngörekyö nyonikïny ompö mïkulöwunyu osiswechete ompö tipichï pö pipö Ititi. Ato töp Yakopo ntökïlö opöy työ nyo pö tipichï pö pipö Ititi chï karkegh nko tipichï pö koronï, kïtö kunyiwu ne söpontönyan nya?”