Read pokoot TOWUNÖT 28 Bible Online

TOWUNÖT 28 - pokoot bible

TOWUNÖT 28

¹Kïlenyona kïkur Isak Yakopo tökuperur akuyomis akïlenchï, “Metöp lö opöy chepö pipö Kanan.

²Ngeta aiwö Mesopotamia, kö pö kukötöngu Petuel, papoto yongu. Atepchinö kegh korkengu ompö wöloni kïngetunö tipö Lapan nyo tupchö nko yongu.

³Nya kuperurinyi Tororöt Kimuktoghin akwigh piko yiyengu kïtösisyö, atelïkuna pipö punton cho chang.

⁴Nya kïkoninyi nko moneku perur nyo lata nyay kitö Apraam atemïlanyi koronete imitenyi iwestegho kïle ato ichinyi ton, koronini kitö Tororöt Apraam!”

⁵Kïlenyona, kïyonta Isak Yakopo, kïwö ntökwit Mesopotamia wölo mi Lapan, wero Petuel chi pö Sirya werto ompö Repeka, yoto Yakopo nko Esau.

⁶Kïsïwa Esau lö kikuperur Isak Yakopo akïyonta kïwö Mesopotamia, kïwö kïkensyö ompö wölini, akinkïtï lö otini kisoyön Isak nyinte, kuyomis lö, “Mepchï kegh korka ompö tipö Kanan.”

⁷Akunkïtï lö kilïmchï Yakopo kwanta nko kame ngalekwa akïwö kutang Mesopotamia.

⁸Kïlenyona kunkïtï Esau lö, kitagha kwanta Isak tipö Kanan,

⁹kïwö nyu Esau wölo mi Ismael akwip Maalat chepto ompö Nepaiot, chepö Ismael wero Apraam, kïtas kegh nko koru walaka cho kökikwip nyinte.

¹⁰Kïweghö Yakopo Persyepa kutang Aran.

¹¹Otini kit ato syom, kïrï atoni ompöwölo kökikïröytö asis. Kïchenga atoni kogh akïtighö mötïnyi, kunuk akïrï.

¹²Kurwotïtö, kïsïwa ompö kirwotïtoghoni lontöwon nyo kikigh kughyongö ngwïny akwitïta waltanyi yïm akimito malaykeni Tororöt kïlongöy akïrökuno lontöwontonay.

¹³Akimito ECHOTYON kughyongo parakuto lontöwontononi[24] akïlö, “Ochan ECHOTYON, Tororöt pö papongu Apraam, achï Tororöt pö Isak. Okoninyi koronete irïwenyi kïlïku nyengu töninan piko yiyengu.

¹⁴Chongitu asïyech piko yiyengu le terïtyo ngwïny, aighömunyi woptin löwïr, wölnö le ta nko kongasis nko wölnö ketang okumpö löt nko wölnö ketang okumpö tagh, akeperuröy pipö ngwïny kïmïkul ompö nyi nko ompö piko yiyengu.

¹⁵Omitan nko nyi arïpotoninyi ompö wop anka tïkwïl wölo iwetenyi amïtunyi ato le asïyech ntengwïn koronete ngat, ompöwölo mopïstoninyinye ntökïtenö awunyi ngalechini tïkwïl koyomisunyi.”

¹⁶Atolapay kïngeta Yakopo rïwöntenyi akïlö, “Mi ECHOTYON yeteyi nyo pö nyoman amelö konkïtön!”

¹⁷Kuwagh Yakopo akïlö, “Wow kïtya kiwaghata nyo mi yi! Kö pö Tororöt yeteyi nyo mötïny, akïyete ato le kuka yïm.”

¹⁸Kïnget Yakopo otini le kiwasan akïcheng koghay kötigho nyinte mötïnyi akwigh kïlïkwï pchörï akïmïlchï mwagh parakunyi.

¹⁹Akïkurö atoni Petel,[25] wölo kikuro kaynata kanasyantanoni atokile tagh Lus.

²⁰Atolapay kuwalwal Yakopo akïlö, “Ato töp Tororöt ntökïmi nko ani, akïripotanïn ompö aranï owetan, akïkonanïn omisyö nyo omöy nko sïro cho oloköy,

²¹ntamïlan kato paponyan ompö kalya, kïlïku ECHOTYON Tororötïnyan,

²²akïlïkwï Kö pö Tororöt koghete kaghan kïlïkwï pchörï akoninyi nyoman kareran nyo pö taman nyo pö kïgh anka tïkwïl nyo ikonaninyi.”