Read pokoot TOWUNÖT 3 Bible Online

TOWUNÖT 3 - pokoot bible

TOWUNÖT 3

¹Ki ngöghom moroya kïsir tyompö wuw löwïr nyo kigh ECHOTYON Tororöt. Kïtep moroyonay kokonay lö, “Kelö kitaghenakwa Tororöt so lö mam akwa ket anka tïkwïl nyo mi par ori?”

²Kuyokyï kokonay moroyonay lö, “Kimukecha kyome akwa ket anka tïkwïl nyo mi par ori,

³wölo kitaghenecha Tororöt lö mam anta aswany akwa ket nyo mi par kwen tömomeghö.”

⁴Kïlenchï moroyonay kokonay, “Melö omeghsokwa!

⁵Kimwa Tororöt lenyoni ompöwölo nkït lö nyini kamakwa akweko ketoni, kïyotisyö mötöwekwa akarakwa kegh nko Tororöt nyo nkït kïgh nyo karam nko nyo gha.”

⁶Kïsïwa kokonay lö pïrchini kong ketay akïkaramach akwechi ompö omisyö akïmïchini kenyoruno kinkïtunöt. Kïpït akwe akwam. Atolapay kutö santenyi walaka, kwam nyinte tïkwïl.

⁷Panini lawel, kïyotisyö mötöwekwa, kunkïtï lö kïchï chïrutöch. Kïlenyona kïnap söko moköngwö tökuyenö kegh.

⁸Kïlïm chane ECHOTYON Tororöt kïwestegho paranini asisoni otini kimön, kïghïpa Adam nko korkenyi kwenu ket cho kimi paranoni tömasïwa ECHOTYON Tororöt chane.

⁹Kïkur ECHOTYON Tororöt chichay lö, “Imitenyi onö?”

¹⁰Kuyokyï lö, “Kalïminyi ompö par, anyakoritwan aghïpan, ompöwölo ochan chïrut.”

¹¹Kïlenchï Tororöt, “Ngo nyini kömwowunyi lö ichinyi chïrut? Kamanyi so okintonay pö ketay kyatagheninyi lö meam?”

¹²Kuyokyï chichay lö, “Kökonanïn kokonay kikonunyi kïtöpö nko ani okintononi, atolapay aman.”

¹³Kïtep ECHOTYON Tororöt kokonay lö, “Ompö ne teghanyi le nyï?” Kuyokyï lö, “Kilïsanïn moroya atolapay aman.”

¹⁴Atolapay kïlenchï ECHOTYON Tororöt moroyonay, “Kechïpenyi kïsir kyak löwïr nko tyonkïn löwïr cho pö wudïn, ompöwölo keghanyi le nyï. Ichutonyi kegh ngwïny aiyomenyi terït osisweku lapay otini tesöpenyi.

¹⁵Otöninan punyontön kwenungu nko kokonï nko kwenuto yiyengu nko yiyenyi. Tïghöy nyinte mötïngu lö körpïs isïrenyi nyinte kowo monion.”

¹⁶Kïlenchï Tororöt kokonay, “Otösan tya kichïrtangu pö lusyogh. Iyiyenyi monïng ompö ngwonïn nyo wow, wölo kïrkegh kïlenyoni, ipïrchinenyi chitöngu akïpöytoninyi nyinte.”

¹⁷Atolapay kïlenchï Tororöt Adam, “Ompöwölo keterchinyi korkengu, aiyamanyi okinto ketay kyatagheninyi, köchïpö ngwïnya, ompö nyi. Omenyi kighotiku osisweku löwïr ompö ngwïny.

¹⁸Pito ratak nko kato ngwïny, aiyomenyi tïkwïn cho pito ngwïny.

¹⁹Omenyi kighotiku, ntökïtenö mïlenanyi nyïngwïny ompöwölo kingwïnenyi nyïngwïny imïlonenyi wölini kingwïnenyi.”

²⁰Kïkurö Adam korkenyi Awa, ompöwölo nyinte nyo kilïkwï yoto pich löwïr.

²¹Atolapay kïnöpchï ECHOTYON Tororöt Adam nko korkenyi sïro pö kyak akulokyï chane.

²²Atolapay kïlö ECHOTYON Tororöt, “Kakarkegh ye nyu chi nko acha, kenkïtï tïkwïn cho karamach nko cho ghach. Melö mïchini kechömchï kwam okin nyo ngwïno ket pö söpon, tömösöp kokay!”

²³Kïlenyona, kutulö ECHOTYON Tororöt chichay paranay pö Eden, tökïngor nyïngwïtyan wölini kikigha nyinte.

²⁴Otini kikitulö chichay paranay, kutö kerupim* paranay pö Eden wölnö le kongasis akutö chok nyo lata lyopöt nyo kiwöghöko wölnö nko wölnö kïrïpöy or nyo töngöy wölo mi ket pö söpon.