Read pokoot TOWUNÖT 34 Bible Online

TOWUNÖT 34 - pokoot bible

TOWUNÖT 34

¹Kïwö asistanka Dina chepö Yakopo nyo kiyichï Lea kïtuyö nko koruko korononi.

²Nyini kisïwa Syekem wero Amor nyo kile chi pö Ipiti, aki nyinte nyo kirwokyini korononi, kïnam chepay akïpatal nyinte ompö owesyö. Kïlenyona, kutö arasï nyinte.

³Wölo kïlö aros kipïchighit nyoman Dina. Kïwechï kïchamacham chepay pö Yakopo.

⁴Kïwö kïlenchï kwanta, “Kaykay weghwante aloto ka Yakopo topön cheptanyi.”

⁵Kunkïtï Yakopo lö kikusïmnyon Syekem cheptanyi Dina, wölo kimeghnye kïgh ntökïtenö kïpka werkachi, ompöwölo kitökïmi chane achey.

⁶Kïwö Amor papoto Syekem aloto ka Yakopo,

⁷kipkono achey werpö Yakopo panoni. Nyini kilïm ngalechoni, kïngwonchï nyoman, ompöwölo kighchï chichoni pipö Israel ghöyityö nyo wow otini kinam chepö Yakopo ompö owesyö, kïgh nyo kimelö kikïchömöy keghöy.

⁸Wölo kïngalan Amor nko chane lö, “Kicham werïnyan Syekem cheptönkwa nyoman nyo osoghokwa lö opïsinö kwip nyinte.

⁹Akanya kechomnyechinö ngala kensyö. Okonecha tipikwa kepö, opökwa chicha.

¹⁰Kimukechanyu kemöngisyenö tïkwïl. Omukekwa omönge wop anka tïkwïl nyo kamachakwa, ompurö atagha mïnchïrïsnön atalïkuna monkor ompö wölete.”

¹¹Atolapay kïlenchï Syekem papoto Dina nko werkökwa, “Kaykay achama kïgh nyo kaghan, tö ato mi kïgh nyo omwowanïkwa, omukan oghöy.

¹²Otörwokwa kanyoy cho tenö chini komökekwa nko ropöw, otini kokonanïkwa kïnye cheponi opön.”

¹³Kuyokyï werpö Yakopo Syekem nko kwanta Amor ompö lïs, ompöwölo kökikusïmnyon cheptöngwa Dina.

¹⁴Kïlenchï, “Melö kimukecha keyilchine cheptönyo chi nyo le somchon. Lïku nyoni arasï ompö acha.

¹⁵Kimukecha kechomnyenö nko akwa ato arïpakwa otöptöncha nyo mötïnye, kemutöy pich löwïr cho le mïrön ompö kwenunkwa.

¹⁶Atoni nyu ato kïpïswokwa opö tipicha akepöcha tipikwa aketïpicha nyu nko akwa akelïkwï pich akonga.

¹⁷Wölo ato machamakwanye lenyoni, kemïtecha cheptönyo.”

¹⁸Kïsïwa Amor nko werïnyi Syekem lö karamach ngalechoni.

¹⁹Kurïpchï rotwö panini weray mïnïng ompöwölo kichomnyö nyoman nyinte nko chepö Yakopo. Aki weroni nyo kikonyïtote tya ompö katangwa.

²⁰Kïlenyona, kïwö Amor nko werïnyi Syekem kutang areto kanasyantengwa akïngölonchï pich cho kimi kanasyantanay lö,

²¹“Achï pich cho le kongot. Kepïsyinö chane kïmöngisyö akwigh mïnchïrïsnön, ompöwölo mïchinecha koronete nko chane tïkwïl, tökepöcha tipikwa, kwip chane tipicha.

²²Wölo muköy pïchoni kïcham kïmang nko acha tökelïkuna pich akonga ato kïchamacha kemuta ompö kwenuncha monïng lapay cho le wor kïkarkegh nko chane.

²³Mölïkucha so kyakikwa nko tïkukwa kïmïkul chicha? Akanya pat kechömchinö chane tökïmöngisyö nko acha.”

²⁴Kïcham piko kanasyantanay kïmïkul ngala Amor nko Syekem. Kïlenyona kemut mïrön anka tïkwïl.

²⁵Ato mi asisto sömök, otini kitökuchiryot pïchay kikïmut, kïcheng chokonikwa werpö Yakopo odeny, Simion nko Lawi cho tupchö nko Dina, kïpa kïlïtöy kanasyantanay ompö nyakanat akïpar mïrön löwïr.

²⁶Kïpara chok Amor nko werïnyi Syekem akumïtuna Dina kö pö Syekem, kïpechï kegh pïchay.

²⁷Nyini kiwonyö pörchonay, kïpa werpö Yakopo walaka kïlïtöy kanasyantanay akïcheng tïkwïn, tökutak arasito cheptöngwa.

²⁸Kïpörï kechir nko tïch nko sïkïröy nko kïgh anka tïkwïl nyo kimi kanasyan anta nyo kimi wuw.

²⁹Kïcheng tïkukwa löwïr, monïng nko korukwa nko kïgh anka tïkwïl nyo kimi korikwa.

³⁰Atolapay kïlenchï Yakopo Simion nko Lawi, “Kokonanïkwa kömpölelyö ompöwölo ghöchinanïn pipö Kanan nko pipö Peris, pïchini möngöy koronete akwanyï kïchicha ngörï, kïkany atotuyö kegh chane kïporyeghenanïn, kumuköy chane kuwuranïn nko piko konyu.”

³¹Wölo kuyokyï chane lö, “Kichö mïchini so kwida nyinte cheptöncha chepkartayan?”