Read pokoot TOWUNÖT 37 Bible Online

TOWUNÖT 37 - pokoot bible

TOWUNÖT 37

¹Kïtas tagh Yakopo kïmang koronay pö Kanan kimi kwanta kïmöngöy kïle ton.

²Anyï wölo kirïpta kegh pipö Yakopo kïlïkwï. Kimi Yosep kuyokwïyi kyakikwa nko werkökwa, monïngo Pila nko Silpa cho le chemïnïngweni* paponyi. Kitïng Yosep könyis 17 osiswechoni. Kungwïn nyinte akïmwochï paponyi ngal cho ghach cho pö otöpto werkökwa.

³Kïcham Israel[46] Yosep kïsir monechi walaka löwïr ompöwölo kikïyï nyinte otini kiyosit Yakopo. Kïlenyona, kïnöpchï sïra nyo koghöch morïn.

⁴Kïkany kïsïwa werkökwa lö kicham papongwa Yosep kïsir chane kurey tya nyinte, amelö kitökïcham kïngalan tïkwïl.

⁵Kïwechï Yosep kurwotïtö oghe anka, kïkany kïlö omwochini werkökwa ngalechoni pö kirwotïtogh, kïtosisyö kïnörekyï nyinte tya.

⁶Kimi kïlenchini chane, “Atere kirwotïtogh nyo korwotïtan.

⁷Korwotïtan lö kakïmitecha wölnö le paren kerötöy rötut pö pagh, olan aros, kïnget rötutyenyan akughyö lö tök. Olan aros chikwa mito kïghömïtyini kegh kamasunyi akungïrukisyeghö tawuto nyinyan ompö konyït.”

⁸Kïlenchï werkökwa, “Nyo ilentenyi ye iwetenyi ipöytonecha so? Anta imukenyi wowitune ompö acha?” Kïtasa nyu tya kireyatengwa ompö kirwotïtoghtinechi nko ngalechi.

⁹Atolapay kurwotïtö ngat kirwotïtoghtö anka nyo kilenchï werkökwa, “Atere kirwotïtoghtö anka nyo korwotïtan. Korwotïtan asïwan asis nko arawa nko kokel cho le taman nko akonga cho kimi kïkïtïngchinanïn.”

¹⁰Wölo otini kimwochï paponyi nko werkökwa, kïsyölchï paponyi akïlenchï, “Ne kirwotïtoghtö nyoni kerwotïtenyi? Nyo ilentenyi nyoman ongwïnan okïtïngchininyi nko yongu nko werkökwa so?”

¹¹Kwipö werkökwa nyinte sikong, wölo kinana paponyi mïkulögh ngölyontononi.

¹²Kimi asistanka ato kipa werko ompö Yosep kutang okumpö Syekem kuyakwïy kechiryeko papongwa,

¹³kïlenchï Israel Yosep, “Olentan inkïtönyi lö yokwïyi werkökwa kechir wölnö lekïto Syekem. Nyonö oyokïn wölo mi chane.” Kïlenchï Yosep, “Owetan lenyoni.”

¹⁴Kïlenchï kwanta, “Wïyö aterosunö lö mito werkökwa nko ocheyi kechir nyo karam atenyonö mwowanïn.” Kïlenyona, kïyonta kwanta Yosep kïweghö mpöghoghyo Epron, kïnam or akïwö kutang Syekem.

¹⁵Otini kitïta Yosep Syekem, kïtuyö nko chi nyo kitep nyinte lö, “Imörenyi ne nya?”

¹⁶Kïlenchï, “Omöran werköcho cho yokwïyi kechir. Eimukenyi nteporwanïn wölo yokwïyo chane kyakikwa?”

¹⁷Kïlenchï chichay, “Kikïpa chane wölo low, ompöwölo kalïman atolentöy, ‘Kepe ketanga Dotan!’ ” Kïlenyona kïwö Yosep kïrïp werkökwa ato mi löt kïnyorchï chane Dotan.

¹⁸Kïnya kïsöchï nyinte wölo low, akïnyini kitomönye kwit wölini kimi chane, kïpechï kurwoch wölo pörtoy nyinte.

¹⁹Kïmwochinö lö, “Arose köny chichay pö kirwotïtogh mito kungwïnöy.

²⁰Apkana nyu kepara nyinte akewirchï pïrïm akemwagh lö kam tyompö wuw, tökesïwena nyu wölo lïku kirwotïtoghkachi.”

²¹Wölo otini kilïm Rupen, kïsörunö nyinte ewunekwa, kïlenchï, “Mökepar nyinte.”

²²Kïlenchï Rupen werkökwa, “Mökemïlta kisön, kewirchinö nyinte pïrïmponï mito surkwen, wölo mökeghchï nyinte kïgh nyo gha.” Kimwa lenyoni nyinte tökuyoda nyinte wölo mi paponyi.

²³Kïkany otini kitï Yosep wölini kimi werkökwa kengwïsa sïrenyi nyay koghöch ewunö kiloköy nyinte,

²⁴kumït nyinte akïwirchï pïrïm. Ki tïryal pïrïmpononi ki puryö pögh cho kimi ori.

²⁵Atolapay kumpur ngwïny tökwomisyö, kïkany kïtopöntö yona, kïsïwa pipö Ismael cho kipkono Kiliad kutöngöy Misri, kimi nko tamasayikwa cho kikösönöy tïkwïn cho ngutoy nyo karam cho pö olyot nyo wow nko mwowöy cho lata mankoy cho kïnyïro por.

²⁶Atolapay kïlenchï Yuda werkökwa, “Tösu ne ato kïtïghöcha werïnyo akewïny lö melö acha cho kakïpar?

²⁷Akanya kyaltena pat kyolchinö pïchï pö Ismael amökeghchï nyinte kïgh nyo gha ompöwölo kïtupchecha nko nyinte akechicha por akonga nko nyinte.” Kïterchï werkökwa lenyoni.

²⁸Atolapay kuwerï atoni mïnchïrïs cho kipkono koro Midyan, kuchïtunö werkökwa Yosep pïrïmponay akwolchï pipö Ismael ompö ropïyeni silpa tömönut odeny, kumït nyinte kïwö Misri.

²⁹Kïkany kïlö Rupen amïla wölaye le kö pö pögh kïlö atomï mökïminye Yosep, kïkarer sïrokachi ompö nyarïl.

³⁰Kïmïla wölo mi werkökwa akïlenchï, “Melö tökïmi monïngay pïrïm! Oghan ne ye nyu?”

³¹Atolapay kïcheng sïranay pö Yosep akïtïgh aran akulut sïranay kisönchay pö aran.

³²Akwip sïranay wölo kimi kwanta akïlenchï, “Kakïnyorucha sïranï rose köny atesïwena lö ekïsïreto werïngu nya anta ewo.”

³³Kïkany kuros kïlö, “Owöy, sïrenyi nyete! Kinam tyompö wuw nyo körom akïtïgh. Kikyam werïnyan Yosep nyo mötïny.”

³⁴Kïkarer Yakopo sïrokachi akulak sarankwachtin akïlokyï werïnyi osis cho chang.

³⁵Kïnget werkachi tïkwïl nko tipichi kïpa kïsagh nyinte kïsï, wölo kimachamnye nyinö kitöchömöy kïlö, “Owetan ngwen otini tomitan orirchini werïnyu.” Kïlenyona, kulet tagh kïrirchï werïnyi.

³⁶Kïpechï pïchay pö Midyan ompö wölini le Misri kwolchï Yosep Potipa nyo kile yetïn pö Parao, nyo kiwowö askarin cho le ripï.