Read pokoot TOWUNÖT 4 Bible Online

TOWUNÖT 4 - pokoot bible

TOWUNÖT 4

¹Kirï Adam nko korkenyi Awa, kïsïkisyö Awa akïyï Kain. Kïlö Awa, “Kosïkön monïng nyo le worö ompö kingarakata ECHOTYON.”

²Atolapay kïyï worö anka nyo kikïkuro Apel. Ki pöghinto kechir Apel, kï ngorinto par Kain.

³Kïkany kuwer osiswö cho te, kwipchï Kain paghechi ECHOTYON kïlïkwï ropöwon.

⁴Kwipchï Apel tïkwïl ECHOTYON poretay cho pö kechiryechi, kïyeng akïropta panye cho karamach kïlïkwï amöros. Kïcham ECHOTYON Apel nko amörostanyi,

⁵wölo kïtagh Kain nko amörostanyi. Kïnarek Kain nyoman akusïngirö ompö kilïl.

⁶Kïlenchï ECHOTYON Kain, “Ompö ne tenarekanyi, akwompö ne tesïngirenönyi ompö kilïl?

⁷Ntökeghanyi nyo karam, kötö kïtokinyi. Wölo ato ighenyi nyo gha, kïmito ngokï kukat kusyepinyi. Pïrchini kïpöytoninyi, wölo mïchini rïntenanyi.”

⁸Atolapay kïlenchï Kain werïngwa Apel, “Kepe wölinate.” Kïkany otini kitïta wölini kupulchï Kain werïngwa Apel akïtïgh.

⁹Kïtep ECHOTYON Kain lö, “Mi onö werïnkwa Apel?” Kuyokyï lö, “Eso! Kochan so ripinto werïncha?”

¹⁰Kïlenchï ECHOTYON, “Ne nyini keghanyi nya? Rirchinanïn kisönko werïnkwa cho mi nyïngwïny.

¹¹Kïlenyona, köchïpeninyi ye nyïngwïny! Amelö tengorenyi nyïngwïny ngat, ompöwölo kangany kutinyi kïtak kisönko werïnkwa otini kiparanyi nyinte.

¹²Mengwïnonye kïgh nyïngwïtyantanoni ato ilenyi okötkötöy kösïgh, imöngenyi ngwïny ompö sowsowönöt.”

¹³Kïlenchï Kain ECHOTYON, “Wow kichopatanoni tya nyo momukanye okösönöy.

¹⁴Keyonenaninyi asisete kor wölo mi nyïngwïtyanta nyo akwagh alowitwan nko nyi. Kalïkwan ye nyu kitwopöno ngwïnyinï, chi nyo puryö wölo töponuno akwoto töp chi anka tïkwïl ntökïnyorwanïn kïtïghanïn.”

¹⁵Wölo kuyokyï ECHOTYON lö, “Ewo! Ato tïghinyi chi, ketököy pich cho le mut nko odeny.” Kïlenyona kutö ECHOTYON Kain machey tömötöp chi anka tïkwïl nyo tuyegho nyinte lö opöröy.

¹⁶Kïweghö Kain wölo mi ECHOTYON akïwö kïmang kor nyo kïkuro “Kitwopöt,” nyo mi okumpö kongasis nyo pö Eden.

¹⁷Kïrï Kain nko korkenyi, kïsïkisyö akïyï Enok. Atolapay kïtek Kain kanasyan akïkurteghö kayneto werïnyi Enok.

¹⁸Kïyï Enok werïnyi Irad, kïyï Irad Meuyael, kïyï Meuyael Metusael, kïyï Metusael Lamek.

¹⁹Kwip Lamek kor odeny, Ada nko Sila.

²⁰Kïyï Ada Yapal nyo kilïkwï kuköto pich cho kipöghöy kyak cho kimöngöy kori emen.

²¹Ki Yupal werïngwa, aki nyinte nyo kile kuköto pich cho kile tumï lapay cho kipïtöy pïkantis akïkutöy pkurerun.

²²Kïyï Sila Tupalkain nyo kile kitonginto kari taghoy nko karïn cho sisinchö. Naama kï chepto ompö Tupalkain.

²³Kïlenchï Lamek koruchi, Ada nko Sila, “Atera ngalechan, koruchï pö Lamek, atera kïgh nyo omwoghan. Kotïghön chi ompöwölo körïmanïn, kotïghön karöchïnin, ompöwölo kömunganïn.

²⁴Ato kitököy pich mut nko odeny ompö pörcho Kain, ketököy nyu pich 77 ato tïghanïn chi.”

²⁵Kïsïch koko Adam weri anka. Kïlö kamanay, “Kökonanïn Tororöt monïng nyo le weri tökïtöpö otini kömi Apel, nyanya kïtïgh Kain.” Kïkurö kaynenyi Set.

²⁶Kitïng Set werïnyi nyo kimïnchï kayna Enos. Kingata osiswechoni ato kitor pich kïpöghisyeghö kayna ECHOTYON ompö sowutkökwa