Read pokoot TOWUNÖT 43 Bible Online

TOWUNÖT 43 - pokoot bible

TOWUNÖT 43

¹Kïtas tagh kömöy kïngwanit ompö koro Kanan,

²kïkany otini kiwonyö omisyonay kikipunö koro Misri, kïlenchï Yakopo werkachi, “Omïlisyenö Misri ngat atape olwecha omisyö kite.”

³Wölo kïlenchï Yuda kwanta, “Kirirwecha chichoni wowö korononi nyoman lö, ‘Mosïwïyanïkwanye ato mamïtukwanye werïnkwa nyo mïnïng.’

⁴Nyo ato ipïsunyi werïncha kïwö nko acha, kepetecha nyu kyolu omisyö.

⁵Wölo ato mechömunyinye kïwö nko acha, kïmelö kïpetecha wölini, ompöwölo kimwowecha chichoni lasiny lö, ‘Mosïwïyanïkwanye ato mamïtukwanye werïnkwa nyo mïnïng.’ ”

⁶Kïlö Israel, “Kilö ne tokonanïkwa nyarïl omwochï chichoni lö kitökïmi werïnkwa anka?”

⁷Kuyokyï chane lö, “Kiteptepecha chichoni nyoman ngaleko piköcha. Kitepecha lö, ‘Tökïsatate paponkwa? Atïngetekwa werïnkwa anka?’ Keyokyicha nyu kïrïp kegh nko teputkachi. Kimi ngo nyo kinkït lö kilenchinecha, ‘Ape amïtuna werïngwo?’ ”

⁸Kïlenchï Yuda paponyi Israel, “Pïswante owö nko nyinte tökepe lawel kyala omisyö tömökiwonyö löwïr ompö kömöy, nyi nko acha nko monïnge chï mïnkech.

⁹Nya kïlïkwï ani nyo oghyongchini nyinte. Ighokaninyi nyinte. Ato moyokwanye nyinte ntesïweghenyi konyiku, ikany onyorwan kigheghchin kokay,

¹⁰ompöwölo ntömökeropucha, kötökakepkancha akemïlonchö panto odeny.”

¹¹Kïlenchï papongwa Israel chane, “Ato mïchini kïlïkwï nyoni, agh nyu le nyï. Opchinö ompö mïlotwekwo wowïnoni tïkwïn cho pïchighöch nyoman cho pkono korenyo kïlïkwï ropöw. Opchinö nyinte mwowöy cho ngörï nko kumat kite nko tïkwïn cho ngutoy cho onyïn nko akwa mlosi.

¹²Anamata ropïyen kïnyïl odeny cho mïchini ompöwölo mötïnye keyoda ropïyenichay kikitö mïlotwekwa, ompöwölo töptoy kiwutyeghö chane.

¹³Apa tïkwïl nko werïngwo, wölini mito chichoni,

¹⁴osoghan Tororöt Kimuktoghin kusoyönokwa tökusyonchokwa chichoni, tökutyokwokwa werïnkwa nyay ratate nko Penchamen. Wölo omwoghan nyï le ani lö, ato kewonyeghenanïn monïngö, kuwonyö!”

¹⁵Kïlenyona, kwip pïchay ropöwekwa akwip ropïyen kïnyïl odeny chay kipö tagh akïpa nko werïngwa Penchamen, kutang Misri. Kïpa ntökwitïta wölo mi Yosep.

¹⁶Nyini kisïwa Yosep Penchamen kïmi nko chane, kïlenchï chi nyo kighyongchini konyi, “Mïta pïchï kïpa konyan aiyenchï tany chane aigh omisyö ompöwölo omisïyan nko chane omisyo pöghet.”

¹⁷Kwigh chichay lenyini kakïmwochï. Kumït toyechay kïpa kö pö Yosep.

¹⁸Nyini kisïwa chane lö kakimïtech kö pö Yosep, kïmïghyö akïngölonchinö lö, “Kakimïtwecha wölete ompö ngalechanya pö ropïyen kikiyokwecha atakinya kikïpkanacha panta nyanya pö tagh tökïnyorï ngölyon nyo kïsïkocha kigheghchin tökïkörchecha kö tökïsarenecha sïkïröyicho, atolapay kwighecha kelïkuna sekeykachi.”

¹⁹Kïlenyona kïpa wölo mi chichoni kighyongchini kö pö Yosep akïngölonchï ompö atolekïtö kukat,

²⁰lö, “Kaykay, echotyon, kikïpkanacha wölete panto tagh kyal omisyö,

²¹kïkany ketacha ato le kö pö to, ketyakacha mïlotwecho, kelecha kiros kesïwecha lö mito ropïyeni chi anka tïkwïl kutito mïlenyi, nka nyete kakiyokucha ye.

²²Akepucha ngat ropïyeni walaka cho kyolocha omisyewut. Amelö kinkïtöcha chichoni kiyokyï ropïyenichoni mïlotwecha.”

²³Kuyokyï chichay lö, “Melö kïgh, mowöghisyö nyonikïny. Tororötïnkwa nko Tororöt pö paponkwa nyo keyokwokwa ropïyenikwo. Ani nyo kyacheng ropïyenikwa.” Atolapay kumïtï Simion kïtuyö nko chane.

²⁴Kumït nyu chichoni pïchay kïpa kö pö Yosep, akutö chane pögh kuwunö kelyekwa, kïkany kïpagh sïkïröyikwa,

²⁵kïpechï werko ompö Yosep kutö kïpsach tïkukwa cho kiropchini Yosep ompöwölo kökikemwochï lö omisïyi Yosep nko chane.

²⁶Otini kitï Yosep kaw, kwipchï pïchoni nyinte ropöwekwa cho kipuno korengwa, kïkïtïngchï ntökwit ngwïny ompö konyït.

²⁷Kïmak kunkïtï wölo kitöptö chane, atolapay kïtep lö, “Mi pöghisyö paponkwa nyaya kiyosit kyomwowanïkwa ngalechi? Tökïsatate nya?”

²⁸Kuyokyï lö, “Mito pöghisyö mötworintengu, paponcha, tökïsatate.” Kungïrukisyö ompö tawunyi ompö konyït.

²⁹Kïlö Yosep otopön tagh kïsïwa Penchamen werïngwa, werto kame, kïlö, “Nka nyete so werïnkwa nyo mïnïng, nyay kyomwowanïkwa?” Kuyokyï lö, “Osoghan Tororöt kusyonchinyi werïnyu!”

³⁰Kïweghö Yosep atoni panini ompöwölo kitörenguno lok konyichi ompöwölo kisyonchï tya werïngwa, kïwö akïlït konyi akïlok.

³¹Otini kiwang kuwun tokochunyi, kukil kegh akïngetunö köyay akïmwatïta kepï omisyö.

³²Ketö omisyo Yosep woptanyi onkït, ketö nyo pö werkökwa woptöngwa. Kikigh lenyoni tïkwïl nyo kipö pipö Misri cho kyomisïyi nko nyinte, kikitö pipö Misri omisyengwa woptöngwa ompöwölo melö kikïchömchini pipö Misri kwomisïyi nko pipö Eprania.

³³Kïtïpï werchay wölo mi Yosep kïrïp kegh nko yiyengwa, kïngetunö poretyengwa ntökwit töwoniontengwa. Kïpechï kuros kegh ompö töngönchin.

³⁴Ketö pïchoni omisyö nyo kimi mesa Yosep, wölo ketö Penchamen kïnyïl mut cho pö werkökwa walaka. Kïlenyona kïgheghsyö akïngörekyö nko Yosep.