Read pokoot TOWUNÖT 46 Bible Online

TOWUNÖT 46 - pokoot bible

TOWUNÖT 46

¹Kïlenyona kïnam pan lenyini nyu Israel nko tïkuchi cho kitïng löwïr, nyini kitï Persyepa, kutötö amörostin kutö Tororöt nyo pö paponyi Isak.

²Akïngölonchï Tororöt Israel ompö sïwïyagh oghö, akïlenchï, “Yakopo, Yakopo.” Kïngitön lö, “Ooy.”

³Atolapay kïlenchï Tororöt, “Ochan Tororöt, Tororöt nyo pö papongu, mewagh röytenö wïyö Misri, ompöwölo oghinyi saka aichangitï ilïkwï pipö punton.

⁴Owetan nko nyi Misri, ayokunyi ngat. Airöpösenyi kïsïwïyi Yosep.”

⁵Kïweghö Yakopo Persyepa. Kwipö werkachi nyinte nko monekwa nko korukwa nkarinechay kiyokï Parao kepö nyinte.

⁶Kuwï kyakikwa nko tïkukwa cho kisïch ompö koro Kanan, akipka Misri Yakopo nko monechi löwïr,

⁷werkachi nko tipichi nko kukötinechi.

⁸Nka chï kaynötut pö monïngo Israel cho kipa Misri, Yakopo papongwa nko Rupen poretyenyi,

⁹werpö Rupen kï: Anok nko Palu nko Esron nko Karmi.

¹⁰Werpö Simion kï: Yemuel nko Yamin nko Oad nko Yakin nko Soar nko Syaul wero chepö Kanan.

¹¹Werpö Lawi kï: Kersyon nko Koat nko Merari.

¹²Werpö Yuda kï: Syela nko Peres nko Sera (wölo kiwonyö Er nko Onan ompö koro Kanan). Werpö Peres kï: Esron nko Amul.

¹³Werpö Isakar kï: Tola nko Pua nko Yasyup nko Syimron.

¹⁴Werpö Saplon kï: Sered nko Elon nko Yaaleel.

¹⁵Werpö Lea cho kiyichï Yakopo ompö Mesopotamia kïmi nko cheptanyi Dina, kï 33.

¹⁶Werpö Kad kï: Sepon nko Aki nko Syuni nko Espon nko Eri nko Arod nko Areli.

¹⁷Werpö Asyer kï: Imna nko Ispa nko Ispi nko Peria nko cheptöngwa Sera. Werpö Peria kï: Eper nko Malkiel.

¹⁸Achï werpö Silpa nyo kitö Lapan cheptanyi Lea. Kïyichï Yakopo monïng 16.

¹⁹Werpö Rael koko Yakopo kï: Yosep nko Penchamen.

²⁰Kiyï Yosep ompö koro Misri Manase nko Epraim, nyo kiyichï Asenat, chepö Potipera tïsinto Eliopolis.

²¹Werpö Penchamen kï: Pela nko Peker nko Aspel nko Kera nko Naaman nko Ei nko Ros nko Mupim nko Upim nko Ard.

²²Werpö Rael cho kiyichï Yakopo kï taman nko angwan löwïr.

²³Wero Dan kï: Usyim.

²⁴Werpö Naptali kï: Yaaseel nko Kuni nko Yeser nko Syilem.

²⁵Werpö Pila nyo kitö Lapan cheptanyi Rael, kï monïng mut nko odeny löwïr cho kiyichï Yakopo.

²⁶Pich löwïr cho kipka Misri nko Yakopo cho kile monechi kegh akimeyitnye chi koruko werkö, ki pich 66 löwïr.

²⁷Kikïyichï Yosep karachïna odeny ompö koro Misri, pich cho pö ka Yakopo cho kipka Misri ki 70.

²⁸Kiyonta Yakopo Yuda kïwö wölo mi Yosep, tökuporchï nyinte ore nyo wetöy Kosyen. Kitï nyu korononi kikuro Kosyen.

²⁹Kinap kegh nyu Yosep kwigh nkarinyi akïpusta kïwö kïtarok kwanta Israel ompö Kosyen akuporchï kegh nyinte, kïtarok akukonköy akïlok nyo kogh ompö katïnyi.

³⁰Atolapay Kïlenchï Israel Yosep, “Kanya ye nyu ameghan ompöwölo kasïwan ante lö techinyi satate.”

³¹Kïlenchï Yosep werkökwa nko koto kwanta, “Opustenan owetan olenchini Parao, ‘Köpkonchanïn werköcha nko kato paponyan kïmïkul cho kapkana koro Kanan.’

³²Akï pipö kyak chane akörongwï tukakwa nko tïkukwa löwïr cho kötïng.”

³³Ato kurokwa Parao akïtepekwa lö, “Ne pöghisyenkwa?”

³⁴Olenchï, “Pipö tïch mötworiku, kïngeta otini kichicha mïnkech nko ye, acha lapay nko papotïnecha, atamuka amanga koro Kosyen.” Ompöwölo kitaghate chi anka tïkwïl nyo yokuyöy kyak ompö Misri.