Read pokoot TOWUNÖT 48 Bible Online

TOWUNÖT 48 - pokoot bible

TOWUNÖT 48

¹Nyini kiwer chi, kungwïn chi kïlenchï Yosep, “Kasate papongu,” kiwö akumït werkachi odeny, Manase nko Epraim.

²Kïlenchï Yakopo, “Anyï werïngu Yosep kengwïn wölo iminyi.” Kikil kegh akïnget nyu Israel akitöpo pöröyenyi.

³Akïlenchï Yakopo Yosep, “Kengwïnchanïn Tororöt Kimuktoghin ompö Lus koro Kanan akusoyönanïn,

⁴akïlenchanïn, ‘Rosa, okoninyi yiyöt akïpöroyit katangu aghinyi lïkuna söpïch pö pich atöninan koronï moneku cho pkonöy lötungu kïlïkwï nyingwa kokay.’

⁵“Akï ye, lïku chichan werköku kwodeny chï kiyiyunyi ompö koro Misri kïtömö angwïnan, Epraim nko Manase kïlïkwï chichan le ato chichan ompö Rupen nko Simion.

⁶Lïku cheku cho rïpu werchï kïkuro chane kaynata werkökwa ompö kor nyo kitöni chane.

⁷Otini kyomitan ongwïno Padan kïrapas Rael ompö koro Kanan ompö or ato lekïto Eprat, ororchan nyinte or wölini lekïto Eprat.” (Petleem atoni.)

⁸Nyini kisïwa Israel werpö Yosep kïlö, “Ngo chï nya?”

⁹Kïlenchï Yosep kwanta, “Werköchan cho kikonanïn Tororöt ompö wölete.” Kïlenchï, “Osoghinyi lö, mïtuna kïpka yi tösoyönön chane.”

¹⁰Kiköryö konyi Israel ompö yosïn, melö kitökurosïtoy lasiny. Kemïtï nyu Yosep werkachi kïrikyï nyinte, kïtarok akïchïchïn chane.

¹¹Kïlenchï Israel Yosep, “Melö kitö ononan lö tosïwïyan tokochungu, wow Tororöt nyo keporwanïn moneku tïkwïl.”

¹²Atolapay kunaytegha Yosep chane ompö kutïngkoti Yakopo, atolapay kungïrukö kïkïtïng ntökwit ngwïny.

¹³Atolapay kïnam Yosep chane kwodeny, kïnama Epraim ewunyi nyo pö tagh kutang ewu löt nyo pö Israel akïnama Manase ewunyi nyo pö löt kutang ewu tagh nyo pö Israel akumït kïrich kwanta.

¹⁴Kupïluchö Israel ewunechi, kukana ewu tagh möt pö Epraim weri nyo mïnïng, kukana ewu löt Manase, weri nyo le poret.

¹⁵Kusoyön Yosep kïlenchï, “Nya kusoyön Tororöt werchï, Tororöt nyo kipöghisyechï papotïnechan Apraam nko Isak, nyinte nyo kintöghoghwanïn kïngeta otini kyapitan nko ye!

¹⁶Nya kusoyön monechï malaykayan, nyo kisörwanïn ompö ghöyitwok löwïr akekurteghö chane kaynenyan nko nyo pö papotïnechan Apraam nko Isak, oyiyö atösisyö achangitï ompö ngwïny.”

¹⁷Nyini kisïwa Yosep lö kekana kwanta ewunyi nyo pö tagh Epraim möt kïghöchï nyinte, kïchengwï lenyini ewuto kwanta ompö möt pö Epraim akutö möt pö Manase.

¹⁸Kïlenchï Yosep kwanta metö lenyona kö papo, poretye nyï, kanaya ewungu nyo pö tagh mötïnyi.

¹⁹Wölo kïtagh kwanta akïlö, “Onkïtön lö lenyoni werïnyu, lïku nyinte tïkwïl söpïch, akïyetï, wölo yetu werïngwa nyo mïnïng kïtïl nyinte akïchongitu monechi kïlïkwï pipö ngwïny.”

²⁰Kisoyön nyu chane asisoni kïlentöy, “Soyöno Israel kaynötutkökwa pich, nya kwighïn Tororöt le Epraim nko Manase.” Kïlenyona kutö nyu Yakopo Epraim tawu Manase.

²¹Atolapay kïlenchï Israel Yosep, “Rosa, lekït ameghan, wölo mi Tororöt nko nyi akumïtokwa ngat koreto papotïnekwa.

²²Kokoninyi Syekem nyo tïlöy cho pö werkökwa nyo kyopörunan pipö Amori opörunö chokenyan nko kwantinyu.”