Read pokoot TOWUNÖT 9 Bible Online

TOWUNÖT 9 - pokoot bible

TOWUNÖT 9

¹Kusoyön Tororöt Noa nko werkachi akïlenchï, “Osïch monïng cho chang tösisyö atanyïghita ngwïny.

²Wöyokwa tyonkïn tïkwïl cho echön nko cho mïnkech nko törit nko kaghagh lapay, nyökoritu chane ompö akwa, opöytokwa chane lapay.

³Lïku omisyenkwa tyonkïn lapay cho sötote, kïle wölanye kyokonokwa onkïy, okonokwa choni tïkwïl kïlïkwï omisyenkwa.

⁴Wölo tömam chi peny nyo mi kisön, ompöwölo mi söpon kisön ori.

⁵Ato pörisyö chi, kepöröy nyinte, anka tïkwïl nyo mïltoy kisön, ato kö chi anta tyony, otökan. Otöninan nyarïl chi anka tïkwïl nyo ighöy werïngwa kïma.

⁶Kïtïghöy chi anka tïkwïl nyo pöröy chitö anka, ompöwölo kikigh chi ompö körkeyïn pö Tororöt.

⁷“Oyiyö tösisyö lasiny atanyïghita ngwïny.”

⁸Kïlenchï Tororöt Noa nko werkachi,

⁹“Oman ye mumenyan nko nyi nko pich cho rïpkokwa

¹⁰nko tyonkïn lapay cho kikigh cho sötote, törit nko kyak tïpö wudïn löwïr cho kipkana meli nko akwa.

¹¹Kokïninian mumenyan nko akwa ye nko piko arenkwa tïkwïl lö melö towuronan puseryon ngat tyonkïn lapay cho sötote amelö tökuwuröy puseryonta ngat ngwïny.”

¹²Atolapay kïlö Tororöt, “Anyï machey pö mumenyan nyo kokïninian nko akwa nko tyonkïn lapay cho sötote cho mi nko akwa ompö pïnwöy cho pkonöy:

¹³Otöninan kïtompïl wölo mi poltoy. Atökïlïkwï nyoni macheypa mumenyan nko ngwïny.

¹⁴Kïkany ato okonwan polta nyo lumöy wölnö le mïröt asöchikwa kïtompïl wöloni,

¹⁵ananan nyu mumenyan nko akwa nko tyonkïn lapay cho sötote amelö tökungwïnöy ngat puseryonta kuwuröy tyonkïn lapay cho sötote.

¹⁶Nyini körumunö kïtompïlyö poltoy osïwïyan atolapay ananan mumanoni pö kokay mi kwenunyan nko tyonkïn lapay cho sötote cho mi ngwïny.

¹⁷Macheyunyan nyoni nyo oghan nko tïkwïn löwïr cho sötote cho mi ngwïny.”

¹⁸Achï werpö Noa cho kingetunö meli, Syem nko Am nko Yapet. Ki Am nyo kile papoto Kanan.

¹⁹Kighömï pich ngwïny kïmïkul kïngetunö werchoni le sömök pö Noa.

²⁰Kutor Noa kïlïkwï ngorinto par, kïngor para sapipun,

²¹kïkany otini kigha nyinte kumi sapipun akïtamas, kïrï emenyi kïchïrut.

²²Nyini kisïwa Am, papoto Kanan lö kichïrut kwanta, kïlït sany akïwö kïmwochï werkökwa chay le odeny.

²³Atolapay kïcheng Syem nko Yapet sïra akuwusö puwayikwa kwodeny akïpegha löt akuyenö papongwa nyo kimi kichïrut akitopönöy konyikwa wölnö le löt, akimasïwacha wölini kichïrut papongwa kïlïkwï.

²⁴Otini kingeta tamasa Noa, kunkïtï kïgh nyo kigh werïnyi nyo mïnïng,

²⁵kïlö, “Olenchinan Kanan ipïyïs! Ilïkwï sekeyonto werkökwo.

²⁶Nya kusoyön ECHOTYON Tororötïnyan, Syem! Nya kïlïkwï Kanan sekeyonto Syem.

²⁷Nya kwigh Tororöt ka Yapet kïpöroyit, nya kïmang nyinte emeni Syem, akïlïkwï Kanan sekeyonto Yapet.”

²⁸Otini kiwonyö puseryonta, kïtöpö ngat Noa könyis 350.

²⁹Kïlïkwï könyiswo Noa löwïr könyis 950 atolapay kïma.