Read pokoot 2 SAMWEL 1 Bible Online

2 SAMWEL 1 - pokoot bible

2 SAMWEL 1

¹Otinö kökikïma Saulö, kungwïn Daudi kumpur Siklak osis odeny otini kimïlegha poryot kuwany pipö Amalek.

²Kungwïna chi asisto sömök möngo Saulö nyo kipalpal sïrokachi akutö kegh terïtyon möt, atökuporï nyarïltanyi, akïkïtïngchï Daudi ompö konyït.

³Kïtep Daudi nyinte lö, “Ingwïnonyi onö nya?” Kïlö chichay, “Kachïwïtan möngo pipö Israel.”

⁴Kïlenchï Daudi nyinte, “Mwowante lö kigha ne?” Kïlö chichay, “Karyagh pich ompö poryot akikïpar chane cho chang, kakïpar Saulö tïkwïl nko werïnyi Yonatan.”

⁵Kïtep Daudi chichay kepï ngalechay lö, “Inkïtenyi ne lö kikïma Saulö nko werïnyi Yonatan?”

⁶Kïlenchï, “Kyomitan kutïng pö Kilpoa, akimi Saulö kïtököntoy ngotïnyi, kïrich nyinte pung tya cho kipegho nkaritin nko angoletin.

⁷Kïwaghaka nyinte akuros lötunyi, kïsïwanïn, kïkuranïn, ongitönön lö, ‘Yoy.’

⁸Kïtepanïn nyinte lö, ‘Ichinyi ngo?’ Olenchan nyinte, ‘Ochan chi pö Amalek.’

⁹Kïlenchanïn nyinte, ‘Nyonö wanganïn, ompöwölo omitan nyarïl kwen, kïrkegh kötosöpan.’

¹⁰Kïlenyona owan apar nyinte, ompöwölo kyonkïtön lö kimeghöy nyinte nyo mötïny otini kepït. Achengan tenta nyo kimi mötïnyi nko apököy nyo kimi ewunyi akopkan ye wölo imitenyi.”

¹¹Kïkarer Daudi sïrokachi akïkarer pikachi sïrokökwa tïkwïl

¹²akïriryö ompö Saulö nko werïnyi Yonatan nko pipö ECHOTYON cho pö Israel, ompöwölo kikïpar chane cho chang.

¹³Kïtep Daudi chichay kömwowï ngalechay lö, “Ingwïnonyi onö?” Kïlö, “Ochan pïnotyon nyo pö pipö Amalek.”

¹⁴Kïlenchï Daudi chichay, “Kalïkwï ne tömewaghanyi para chi nyo le kïlana ECHOTYON?”

¹⁵Kïkur Daudi chi ompö pikachi akïlenchï, “Para nyinte.” Kepar chichay.

¹⁶Kïlenchï Daudi nyinte, “Ominyi kisönköku, ompöwölo kemwaghenyi kutingu lö, ‘Kaparan chi nyo le kïlana ECHOTYON.’ ”

¹⁷Kïrirchï Daudi Saulö nko werïnyi Yonatan ompö tumï.

¹⁸ Kikikirchï tumï pö kïwang kitapu Yasyar atökenet pipö Yuda.

¹⁹“Kakïpar kintöghoghicha ompö kutïngkoti Israel! Kewonyö nyökonköcha cho pö lïk!

²⁰Makany kelïma Kat anta ortïna Askelon, atömöngörekyö tipö Pilisti, atömökwol kegh koru sompen.

²¹“Heywey, kutïngkoti Kilpoa, nya kupotenok rop nko röyön anta paren cho okwoghöch! Kikisïmnyonö wöloni longo nyakan amelö kitökeyil longo Saulö.

²²“Kyam kïwanti Yonatan kisön pö pungkachi, kïpïghyö choko Saulö, sunet pö nyökon.

²³“Ki karam Saulö nko Yonatan akichömöy pich chane! Melö kipesyö chane meghat anta söpon. Kipïrtït chane kïtïl sich aki owesöch kïtïl ngötuny.

²⁴“Orirchinö Saulö akwa tipö Israel, nyo kikonokwa sïro cho pïröch cho pö olyot nyo wow akïminenokwa koltin.

²⁵“Kimeghö nyökon ompö poryot! Kima Yonatan ompö kutïngkot.

²⁶“Oriran akwompö nyi werïnyo Yonatan, kyochöminyi nyoman, ki wow chomnyengu ompö ani, kitïlöy chomnyo kor.

²⁷“Kimeghö nyökon cho pö lïk, akunyorisyö karikwa pö poryot!”