Read pokoot 2 SAMWEL 15 Bible Online

2 SAMWEL 15 - pokoot bible

2 SAMWEL 15

¹Otini kiwonyö ngalechï kïyörchï kegh Apsolom nkaritin nko angoletin nko pich cho le tömönut mut cho kipa tawunyi.

²Kingetöy Apsolom tökwoghö akughyongö kuka kanasyan, ato kimi chi nyo kingwïnöy wölo mi pöytoghintö nyo kitïng ngölyon nyo kimököy kïsat pöytoghintö, kikuröy nyu Apsolom akïtep nyinte lö, “Iponyi or ne ompö Israel?” Kïnyïl kuyokyï chichay lö, “Opoyan aranay syom.”

³Kïlenchï Apsolom nyinte, “Pö man ngaleku, wölo möminye chi nyo kakïl pöytoghintö tökïterunyi ngaleku.”

⁴Kïlö ngat Apsolom, “Ntökochan mutinto ngal akungwïn chi wölo omitan nyo tïng syala anta ngölyon kötö oghchinan man.”

⁵Otini kimukyï chichay kïkïtïngchï Apsolom, kïnam chichoni akïsïkwïr akïchïchïn.

⁶Kighchï lenyoni Apsolom pipö Israel löwïr cho kipka wölo mi pöytoghintö tökïnyorï mantangwa, kïlenyona kïcham chane Apsolom.

⁷Otini kiwonyö könyiswö angwanï, kïlenchï Apsolom pöytoghin, “Osominyi lö pïswante owö Epron opuntö ayomis nyo kyowolwolchan ECHOTYON.

⁸Ompöwölo kyowolwolchan ECHOTYON atay kyomitan Kesyur nyo mi Sirya lö, ‘Ato yodanïn nyinte owan Yerusalem, owetan osoghöy nyinte.’ ”

⁹Kïlenchï pöytoghintö nyinte, “Wïyö ompö kalya.” Kïwö nyu kutang Epron.

¹⁰Kïyonta Apsolom pich ompö sison kïghömï koro Israel akïlenchï, “Nyini kalïmakwa kontï, olö, ‘Kalïkwï Apsolom pöytoghin ompö Epron!’ ”

¹¹Kïpa nyu pich cho le 200 nko Apsolom ompö Yerusalem. Kipa chane akimenkïtcha tötut pö Apsolom.

¹²Otini kimi Apsolom kutötoy amöros, kïyonta chi kïwö kanasyanta Kilo kïkurï Aitopel nyo kile kirurinto Daudi. Kïtösisyö pich cho kimi nko Apsolom cho kimököy kïwöghököy Daudi.

¹³Kungwïn chi akïmwochï Daudi lö, “Kikïrïp pipö Israel löwïr Apsolom.”

¹⁴Kïlenchï Daudi mötworichi cho kimi nko nyinte Yerusalem, “Angeta lawel akeryagh, ato omököy kechïwïtena Apsolom. Akwïskusa atömetï lawel akïrïntecha akïpar pich löwïr ompö kanasyan.”

¹⁵Kïlenchï mötworichi pöytoghin, “Mi mötworiku kïpsach kwigh kïgh anka tïkwïl nyo imwoghenyi.”

¹⁶Kïlenyona kïwö pöytoghintö, kïrïp nyinte monechi löwïr, kïpïstö chemïnïngwenichi* cho le taman kïrip kata.

¹⁷Kïwö pöytoghintö nko pikachi löwïr akughyongö kö nyo pö söröm.

¹⁸Kuwer tawunyi mötworichi nko pipö Keret löwïr nko cho pö Pelet löwïr nko pipö Kit cho le 600 cho kipkana Kat nko nyinte.

¹⁹Kïtep pöytoghintö Itay nyo pö pipö Kit lö, “Ompö ne tewetenyi nko acha? Mïlena aiwö itöpö nko pöytoghin, ompöwölo ichinyi pïnotyon nyo keperunö tegha korengu.

²⁰Lekït ato kötengwïnenyi, mömïchininye aghinyi westenö nko acha, akwanyï monkïtönye wölo owetöy? Mïlena nko piko korengu, nya kuporwokwa ECHOTYON chomnyenyi nko mantanyi.”

²¹Wölo kïlenchï Itay pöytoghin, “Owolwolan ompö kaynata Echotyo nko nyi lö, owetan nko nyi wölini iwetenyi, ato kö meghat anta söpon owetan.”

²²Kïlenchï Daudi Itay, “Wera nyu.” Kuwer Itay nyay pipö pö Kit nko pikachi löwïr nko monechi.

²³Kirir chi anka tïkwïl otini kimi Daudi kïwetöy nko pikachi. Kwoghyö pöytoghintö champilwa Kidron, kïrïp pikachi nyinte löwïr kïpa kutang surkwen.

²⁴Kungwïn Apyatar tïkwïl nko Sadok nko Tïsï cho kipöy Santuku Muma,* kutö ngwïny Santuku Muma ntökïtenö kïpegha pich kanasyan löwïr.

²⁵Kïlenchï pöytoghintö Sadok, “Yodena nyu Santuku Muma kutang kanasyan. Ato aghan kïgh nyo chömöy ECHOTYON kïtenö osis kuyokwanïn atasïwan ngat santuku nko otini kakitö.

²⁶Wölo ato mwowanïn lö, ‘Mochöminyinye,’ kwigh nyinte nyu le ato köchömöy.”

²⁷Kïlenchï pöytoghintö Tïsin Sadok ngat, “Mïlena tanga kanasyan ompö kalya, nyi nko Apyatar nko werïngu Aimaas nko Yonatan wero Apyatar.

²⁸Okönyokwa ompö wölo kyoghyegho lalwa ompö surkwen ntonyorwan lökoy cho opukwa.”

²⁹Kïlenyona kuyoda Sadok nko Apyatar Santuku Muma kutang Yerusalem akïtïpïyö wölini.

³⁰Kipusta Daudi kutang kutïng pö Arol akïriröy akimötïngnye kwegh akuyenote mötïnyi atökuporï lö mi nyarïl. Kuyen pich löwïr mötöwekwa cho kimi nko nyinte akïpusta akïriryotoy.

³¹Kemwochï Daudi lö, “Mi Aitopel nko pïchay kinyoryö nko Apsolom.” Kïlö Daudi, “Osoghinyi ECHOTYON lö, waghaka kiruröto Aitopel kïlïkwï sölwontön.”

³²Nyini kit Daudi kutïng parak, wölo kïsogho Tororöt, kwitï Usyay nyo pö pipö Arkit kïnyorï kuloköy sïrokachi cho kipolisyö akitö terïtyon mötïnyi kuporï nyarïltanyi.

³³Kïlenchï Daudi nyinte, “Ato iwenyi nko ani, ilïkunenyi nïkisïn ompö ani.

³⁴Wölo ato imïlenyi kanasyan ailenchinyi Apsolom, ‘Olïkunan mötworintengu we pöytoghin le ato kyochan mötworinto papongu ompö osis cho kiwer, kïlenyona olïkunan ye mötworintengu.’ Irïnteghwaninyi kiruröto Aitopel.

³⁵Mito Tïsï Sadok nko Apyatar wölini. Kïlenyona kïgh anka tïkwïl nyo kelïmenyi kö pö pöytoghin, imwochï chane.

³⁶Mito chane nko Aimaas wero Sadok nko Yonatan wero Apyatar, iyonunyi chane kïpka wölo omitan nko ngölyon anka tïkwïl nyo kelïmanyi.”

³⁷Kungwïn Usyay kongo Daudi kutöngwï kanasyan, otini kimi Apsolom kïlïtöy Yerusalem.