Read pokoot 2 SAMWEL 16 Bible Online

2 SAMWEL 16 - pokoot bible

2 SAMWEL 16

¹Nyini kitïl Daudi kite paraku kutïng, kuryam nko Sipa mötworinto Mepiposyet nyo kirongu sïkïröy cho kikösönu makatin cho le 200 nko mori sapipun cho le 100 cho mi akwa nko akwa cho pö osiswo kömöy nko takal nyo kinyïghï dipay.*

²Kïlenchï pöytoghintö Sipa, “Ompö ne tepunönyi tïkuchï?” Kïlö Sipa, “Pö sïkïröyi pipö kö pö pöytoghin cho pegho, kïpö makatine nko akweko osiswo kömöy piköku cho omöy, kïpö dipay* pich cho koghochö ompö surkwen.”

³Kïtep pöytoghintö nyinte lö, “Mi onö Mepiposyet?” Kïlenchï Sipa pöytoghin, “Kedong nyinte Yerusalem ompöwölo kölö, ‘Konanïn asete pipö Israel paytaghpa paponyan.’ ”

⁴Kïlenchï pöytoghintö Sipa, “Kïgh anka tïkwïl nyo pö Mepiposyet kï nyengu ye.” Kïlö Sipa, “Okonyïtinyi we pöytoghin, nya aghan kïgh nyo ichömenyi kïtenö osis.”

⁵Otini kit Daudi Paurim, kungwïn chi akong nyo pö ka Saulö nyo kïkuro Syimey wero Kera akïchïp Daudi.

⁶Kïwira koghïn Daudi nko mötworichi nko pikachi löwïr cho le nyökon cho kingap nyinte.

⁷Kïchïpisyö Syimey akïlentöy, “Wïyö! Wïyö! Pörintonï! Möminye kinyiwutyö nyo itïngetenyi!

⁸Ketak ye ECHOTYON kisön cho kimïlteghenyi kö pö Saulö aichengenyi ngacharu, ketö ye nyu ECHOTYON paytagh mori werïngu Apsolom. Akï ghöyitye kï nyengu ompöwölo kemïltenyi kisön.”

⁹Kïlenchï Apisyay Daudi nyo kile kame Seruya, “Ompö ne tökïchïpinyi kukïyï le nyï? Kanya owan asil möt.”

¹⁰Wölo kïlenchï pöytoghintö Apisyay nko werïngwa Yoap, “Melö lata nyona werpö Seruya, töptoy chïpisïyi nyinte ompöwölo kömwochï ECHOTYON lö, ‘Chïpö Daudi.’ Ngo nyu nyo mwoghöy lö, ‘Ompö ne takwigh nyinte le nyï?’ ”

¹¹Atolapay kïlenchï Daudi Apisyay nko mötworichi löwïr, “Atomököy ye nyo le werïnyan kïpöranïn, lentöy ne nyu chichï pö ara Penchamen! Opïstenö nyinte kïchïpisyö, ompöwölo kömwochï ECHOTYON nyinte.

¹²Töptoy sïwïyi ECHOTYON kichoputköchan asete akïkonanïn köromnyö ompö chïpötonï pö asete.”

¹³Kïtas tagh Daudi nko pikachi, kïmi Syimey kïropöy wölo le kamas akïchïpöy nyinte kwiso nyïngwïny.

¹⁴Kwoghochö pïchay löwïr kipetöy nko Daudi otini kit Yordan,[8] akumungö atoni.

¹⁵Kïpka pipö Israel nko Apsolom kutöngwï Yerusalem nko Aitopel tïkwïl.

¹⁶Kungwïn Usyay chi pö Arkit, kongo Daudi wölo mi Apsolom akïlenchï, “Itokwï, we pöytoghin! Itokwï!”

¹⁷Kïlenchï Apsolom Usyay, “Kalïkwï ne chomnyengu ompö kongengu Daudi? Ompö ne tömewenyi nko nyinte?”

¹⁸Kïlenchï Usyay Apsolom, “Ewo, ompuran nko nyinte nyo kikïl ECHOTYON nko pïchï löwïr nko pipö Israel löwïr alïkwan nyenyi.

¹⁹Opöghisyechinan ngo nyu? Atomelö nyi wero echotyontenyan le ato kyopöghisyechan papongu, opöghisyewunyi ye.”

²⁰Kïtep Apsolom Aitopel lö, “Irurechanyi keghacha ne?”

²¹Kïlenchï Aitopel Apsolom, “Wïyö rïwö nko chemïnïngweniko* papongu chay kedong kïrip kata atökunkïtï Israel kïmïkul lö kelïkunyi punyon ompö papongu. Atökïnyorï owesyö pich cho imitenyi tïkwïl.”

²²Ketekyï Apsolom ema ompö paraku kö, kïwö Apsolom kïrï nko chemïnïngweniko paponyi kïsïwïyi pipö Israel löwïr.

²³Kirïp Daudi nko Apsolom ngölyon nyo kimwowï Aitopel osiswechoni kïkarkegh nko nyo kimwowï Tororöt.