Read pokoot 2 SAMWEL 2 Bible Online

2 SAMWEL 2 - pokoot bible

2 SAMWEL 2

¹Nyini kiwonyö choni, kïtep Daudi ECHOTYON lö, “Owan apusta atang kanasyan akonga nyo pö Yuda?” Kïlenchï ECHOTYON nyinte, “Owöy, wïyönyi.” Kïtep Daudi lö, “Owan kanasyante nyono?” Kïlö ECHOTYON, “Kanasyanta Epron.”

² Kïwö Daudi kïpusta wölini nko koruchi kwodeny, Ainoam nyo pö kanasyanta Yesrel nko Apikail nyay kimïl kile koko Napal nyo pö kanasyanta Karmel.

³Kïwï Daudi tïkwïl nko pikachi nko monekwa akïmang kanastina Epron.

⁴Kïpka pipö Yuda akïkïl Daudi kïlïkwï pöytoghintengwa. Nyini kimwochï chane Daudi lö, “Pipö Yapes Kiliad cho kiror Saulö,”

⁵kïyonta Daudi pich kïpa Yapes Kiliad akïlenchï, “Nya kusoyönokwa ECHOTYON, ompö köromnyö nyo kyoghchikwa Saulö pöytoghintengwo otini kyarorakwa nyinte!

⁶Ye nyu nya kuporwokwa ECHOTYON chomnyogh nyo möminye söröm! Oghwokwa tïkwïl kïgh nyo karam ompö kïgh nyo kaghakwa.

⁷Osïkö ye nyu owesyö anyökönitu, ompöwölo kikïma pöytoghintenkwa Saulö, akikïkïlanïn pipö Yuda alïkwan pöytoghintengwa.”

⁸Kumït Apner wero Ner nyo kile yetïn pö lïko Saulö Isposyet wero Saulö kutang Maanaim.

⁹Akwigh nyinte kïlïkwï pöytoghinto Kiliad nko Asyurin nko Yesrel nko Epraim nko Penchamen nko koro Israel kïmïkul.

¹⁰Kitïng Isposyet wero Saulö könyis tömönut angwan otini kitor kïpayta Israel, kipayta ompö könyis odeny. Wölo kïrïp pipö Yuda Daudi,

¹¹kïpayta nyinte chane ompö Epron könyis mut nko odeny nko aro mut nko akonga.

¹²Kïweghö Apner wero Ner Maanaim nko mötwori Isposyet wero Saulö kutang Kipyon.

¹³Kïwö Yoap wero Seruya nko mötwori Daudi akuryama ngarpïlu Kipyon nko chane, kïtöpö söpïchtö anka kareranta anka nyo pö ngarpïlunay kïtöpö anka kareranta anka.

¹⁴Kïlenchï Apner Yoap, “Nya kïngetï mïrön cho ngörï akïporyö ompö tawunyo.” Kïlö Yoap, “Nya kïporyö.”

¹⁵Kïngetï cho le taman nko odeny cho pö Isposyet wero Saulö nyo pö ara Penchamen nko taman nko odeny cho pö Daudi.

¹⁶Kïnam chi anka tïkwïl punyontenyi möt akïpïsïkö chok kamasunyi, kupïtyö nyu chane kwodeny. Kïlenyona kekurö atoni, “Wuw pö Chokon,” nyo mi Kipyon.

¹⁷Kingwanit poryot asisoni nyoman, kïrïnta pipö Daudi Apner nko pipö Israel.

¹⁸Kimito atoni werpö Seruya cho le sömök, Yoap nko Apisyay nko Asael. Kipïrtït Asael le cheptirkich.

¹⁹Kïyon Asael Apner akimerosnye kamas nko kamas.

²⁰Kura Apner löt akïlö, “Nyi nyete so Asael?” Kïlö, “Owöy ani nyete.”

²¹Kïlenchï Apner nyinte, “Waghakena tanga okumpö ewu tagh anta okumpö löt, aiyon akonga ompö pipö lïk aichenga tïkuchi löwïr.” Wölo melö kipïstö Asael kïyon Apner.

²²Kïlenchï Apner Asael ngat, “Nyapanena merïpanïn, pö ne aparinyi? Muko lö ne ntoporyan nko werïnkwa Yoap?”

²³Wölo melö kicham kïpïstö kïyon nyinte, kïlenyona kïwaghaka Apner akïtor Asael mu kurel patagh. Kupït Asael akïmeghchï otini kimi. Akï chi anka tïkwïl nyo kitï otini kimeghchï Asael, kï kighyö akïtangany.

²⁴Wölo kïyon Yoap nko Apisyay Apner, ntökïröytochï asis kamaspa Ama nyo lekïto Kiya ompö or nyo wetöy kutöngöy surkwen pö Kipyon.

²⁵Kutuyö kegh pipö ara Penchamen nko Apner kïlïkwï lïk akonga akïtïpï psach ompö kutïng parak.

²⁶Atolapay kïkur Apner Yoap akïlenchï, “Kïporyot so le nyete kokay? Mesïwïyenyinye lö ghöyitu sörömunyi? Ipïsyinenyi piköku kïyonöy werkökwa nko oyï?”

²⁷Kïlö Yoap, “Owolwolan ompö kaynata Tororöt lö, ntömengalananyi kötö tökïrïpöy piköchan werkökwa ntökwit asïyech tökwoghö.”

²⁸Kïkut Yoap kontï, kuporï lö mökïminye poryot, kïpïstö pïchay kïrïp pipö Israel amelö kitö kïporyö ngat.

²⁹Kïwö Apner nko pikachi aghononi kïyech akuwer Arapa akwoghyö Yordan, kwitïta Maanaim kïtomö kughyö asis.

³⁰Kïmïlegha Yoap wölay kiyonchï Apner akutuyö pikachi, kimömicha pipö Daudi cho le 19 amelö kiyit Asael.

³¹Wölo kipar pipö Daudi pipö Penchamen 360 cho kimi nko Apner.

³²Kïsït Yoap nko pikachi por pö Asael akïpa kïrorchï möt pö kwanta nyo mi Petleem. Atolapay kïpa oghö kïyech ntökwit Epron tökwoghö.