Read pokoot 2 SAMWEL 20 Bible Online

2 SAMWEL 20 - pokoot bible

2 SAMWEL 20

¹Kimi chi nyo gha nyo kikïkuro kaynenyi Syepa wero Pikri nyo pö ara Penchamen, kïkut kontï akïlö, “Mökïtïngetechanye kareran ompö Daudi amelö kïtïngöcha mïlat ompö wero Yese. Nya kïwö chi tïkwïl emenyi, akwa pipö Israel!”

²Kïpegha pipö Israel löwïr wölo mi Daudi akïrïp Syepa wero Pikri, wölo kïrïp pipö Yuda Daudi pöytoghintengwa kïngata Yordan ntökwit Yerusalem.

³Kungwïn Daudi katanyi nyo mi Yerusalem. Kutö Daudi chemïnïngwenichi* kö akonga chay kipïsyï Yerusalem kïrip kata chane. Kitö omisyö, wölo melö kiwö kïrï nko chane. Kïmang chane wöloni le mïsïktin ntökïtenö kïmeghö.

⁴Kïlenchï pöytoghintö Amasa, “Kurunö pipö Yuda aingwïn nko chane atowonyö osiswö sömökï.”

⁵Kïwö Amasa kïngalan nko pipö Yuda, wölo kuropï ompö osiswechay kikïmwochï nyinte kungwïn.

⁶Kïlenchï Daudi Apisyay, “Ighwecha nyo gha Syepa wero Pikri kïtïl Apsolom, kïlenyona chenga mötworichan airïp nyinte atömöyörchï kegh kanastin cho tekote akïkonï kömpölelyö.”

⁷Kïlenyona kïwö Yoap nko pipö Keret nko Pelet nko nyökon löwïr kïpegha Yerusalem nko Apisyay kïrïp Syepa wero Pikri.

⁸Nyini kit chane ghat nyo wow nyo mi Kipyon, kungwïn Amasa kïtarok chane. Kiloköy Yoap sïra poryot akirata angwa muyenyi nko chok nyo mi mïlenyi nyo kirötyï mu, akwotini kiwetöy kïchïnta.

⁹Kïlenchï Yoap Amasa, “Pöghisyö nya, werïnyo?” Kïnam Yoap tamughya Amasa ompö ewunyi nyo pö tagh atökukonköy.

¹⁰Wölo kimasïwanye Amasa rotwö nyo kimi ewu Yoap, kïpara Yoap nyinte rotwonay mu kïchïnu kwan, kïma panini mökuyokyïnye kegh Yoap ngat. Kïrïp Yoap nko Apisyay werïngwa Syepa wero Pikri.

¹¹Kughyongö chi akong nyo pö Yoap por pö Amasa akïlö, “Chi anka tïkwïl nyo chömöy Yoap anta Daudi, irïp Yoap.”

¹²Kimi por pö Amasa or kwen akïnyïghï kisön. Akï chi anka tïkwïl nyo kiwerï atoni, kï kighyö akuros. Nyini kisïwa chichay pö Yoap lö kighyö pich löwïr, kïsït por pö Amasa ompö or kutang wuw akuyenö sïra.

¹³Otini kikïsïtö poray or kwen, kuwer nyu pich löwïr kïrïp Yoap kïyarata Syepa wero Pikri.

¹⁴Kuwerata Syepa ortïna pipö Israel löwïr ntökwit kanasyanta Apel Pet Maaka, kutuyö kegh pipö Pikri akïrïp kïlït kanasyan nyinte.

¹⁵Kïpka pïchay löwïr kimi nko Yoap akuwit nyinte ompö Apel nyo pö Pet Maaka akutïkum nyïngwïny ompö kanasyan akutor kïpal nayatu kanasyan atökïrul.

¹⁶Kïkursyö korka nyo chïrer ompö kanasyan akïlö, “Atera! Atera! Omwochinö Yoap kungwïn yi angalanan tïkwïl.”

¹⁷Kungwïn Yoap ato lekïto nyinte, kïtep kokonay lö, “Ichinyi Yoap nya?” Kïlö, “Owöy, ochan.” Kïlenchï nyinte, “Terwante.” Kïlö Yoap, “Owöy, oteran.”

¹⁸Kïlö kokonay, “Kikimwoghöy köny lö, ‘Wïyö tepena ngölyontengu kanasyanta Apel,’ akigh chane lenyoni.

¹⁹Tïngeto kanasyantencha payasat akï karam ompö Israel. Aimökenyi ye nyore kanasyan nyo le yoto Israel. Ompö ne temökenyi pöre mïlana ECHOTYON?”

²⁰Kïlö Yoap, “Ewo, moghanye kïgh nyo lata nyoni kokay, momukanye onyorey anta apar!

²¹Melö lata nyoni. Wölo mi chi nyo pö kutïngkoti Epraim nyo kïkuro Syepa wero Pikri, nyo kömököy kïporyegho pöytoghin Daudi, okonunö nyinte onkït atopïstan kanasyante.” Kïlenchï kokonay Yoap, “Kïwirunyi mötïnyi kungïrï nayatu kanasyan.”

²²Kïwö kokonay akïmwochï pich löwïr kïgh nyo kitat nyinte ompö ngöghomnyenyi kesil möt pö Syepa wero Pikri akewirchï Yoap kungïr nayatu kanasyan. Kïkut Yoap kontï, kïnget pich akïpa kestonikwa. Kïmïla Yoap Yerusalem wölo mi pöytoghintö.

²³Kighyongchini Yoap pipö lïk cho pö Israel, kughyongchini Penaya wero Yeoyada pipö Keret nko Pelet,

²⁴kughyongchï Adoram sekey, Yeosyapat wero Ailud nyo kile komöninto tïkwïn,

²⁵ki kikirinte Syepa, kï tïsi Sadok nko Apyatar.

²⁶Kï tïsin Ira nyo ngwïno Yair nyo pö Daudi tïkwïl.