Read pokoot 2 SAMWEL 4 Bible Online

2 SAMWEL 4 - pokoot bible

2 SAMWEL 4

¹Nyini kilïm Isposyet wero Saulö lö, kikïpörchï Apner kanasyanta Epron, kïma mu nyinte akïmïghyö pipö Israel löwïr.

²Kitïng Isposyet pikachi odeny cho kile yetïntino lïk, kikïkuro anka Paana, kekurö anka Rekap, werpö Rimon, chi nyo pö ara Penchamen nyo ngwïno kanasyanta Peerot. (Kiyitote Peerot lö pö ara Penchamen ompöwölo,

³kiryagh pipö Peerot kutang Kitaim, akïlïkwï pïnot ompö wöloni nko ye.)

⁴Kitïng Yonatan wero Saulö werïnyi nyo kikïkuro Mepiposyet. Kitïng könyis mut otini kituna ngala megha Saulö nko Yonatan kanasyanta Yesrel. Kïsït chepö monïng akurïpteghö, otini kimi kurïpöy, kuchunta monïngay kusïnkwala.

⁵Kïwö Rekap nko Paana werpö Rimon, chi pö Peerot, kutang wölo mi Isposyet, kwit wölini keghyö asis, kïnyorï nyinte mi kumungöy.

⁶Kïnyorï ripinto kukat nyo kitïghöy nkanun kinam rïwöntö, kïlï Rekap kö nko werïngwa Paana.[1]

⁷Kïnyorï Isposyet rïwöy pöröyenyi, kïpar akïnïk kat. Kïcheng mötït akïpa kïyech kuwer mpöghoghyo Arapa.

⁸Kwipchï mötay Daudi nyo kimi Epron akïlenchï, “Anyï möt pö Isposyet wero Saulö punyontengu nyay kiyöröy söpontöngu, kökoninyi asete ECHOTYON pöroyïn we pöytoghin tökisyenö ompö Saulö nko monechi.”

⁹Kïlenchï Daudi Rekap nko Paana werpö Rimon, chi pö Peerot, “Owolwolan ompö kaynata ECHOTYON nyo kïsörunenanïn kömpölelut löwïr,

¹⁰lö, ‘Odenan chi anka tïkwïl wölo kyadan chi nyo kinonöy lö omwowanïn ngal cho karamach lö, kikïma Saulö. Kyanaman nyinte aparan ompö Siklak, kïlïkwï nyoni ropöwontenyi ompö ngalechi choni karamach.’

¹¹Ghöyitu tya ye nyu ompö pich cho ghach cho kapar chi nyo mötïngnye lelut ato mi rïwön, omeghokwa ye nyu le nyinte.”

¹²Kïmwochï Daudi pikachi kïpar chane akïtör morikwa nko kelyekwa akuwusyï kamasu ngarpïlu Epron, wölo kïcheng möt pö Isposyet akïtïpchï pïrïmpo Apner ompö Epron.