Read pokoot 2 SAMWEL 5 Bible Online

2 SAMWEL 5 - pokoot bible

2 SAMWEL 5

¹Kïpka ortïna pipö Israel löwïr wölo mi Daudi ompö Epron akïlenchï, “Kïchicha kisönköku kegh.

²Kintöghoghchinyi pipö Israel ompö poryot ompö osis cho kipöytoy Saulö. Kïlenchinyi ECHOTYON, ‘Ilïkunenyi pöytoghinto piköchan Israel.’ ”

³Kïpka nyu poyi Israel löwïr Epron wölo mi pöytoghintö, kwam muma Daudi nko chane ompö tawu ECHOTYON ompö Epron akïkïl Daudi kïlïkwï pöytoghinto Israel.

⁴ Kitïng Daudi könyis tömönut sömök otini kitor kïpayta, kipayta nyinte ompö könyis tömönut angwan.

⁵Kipayta Yuda ompö Epron könyis mut nko odeny nko aro mut nko akonga, kïpayta ompö Yerusalem Israel kïmïkul nko Yuda ompö könyis 33.

⁶Kïwö Daudi nko pikachi kupokyï Yerusalem akïporyeghö pipö Yepusi cho kimöngöy korononi. Kïlenchï pipö Yepusi nyinte, “Memukenyinye nterïntecha, ompöwölo muköy chepkörotonoy nko mwolöytin kïyoninyi.” Kinonöy chane lö, “Memukönye Daudi ntökïrïntecha.”

⁷Kïnam Daudi kanasyanta Sayon,* nyoni kï kanasyanta Daudi.

⁸Kïlö Daudi asisoni, “Ekïmito chi yete nyo reyöy pipö Yepusi le ani nya? Ngo nyo muköy kïpöröy chane? Nya kïwö nyinte kïrïp aranoni pö pögh akïpar chepkarotinechoni nko mwolöytinechoni.”[2] Nka nyay kïmwoghöy lö, “Mölïtöcha chepkarotin nko mwolöytin Kö pö ECHOTYON.”

⁹Kïmang Daudi kanasyantanay akekurö kanasyanta Daudi. Kitek Daudi kanasyante kuwit kïngata wölay kikïtïp[3] kutang ori.

¹⁰Kïtasa owesyo Daudi, ompöwölo kimi ECHOTYON Tororöt Kimuktoghin nko nyinte.

¹¹Kuyoktö Iram pöytoghinto Tiro pich wölo mi Daudi cho kipöy tarakit nko pich cho le teki korïn, atökïtekyï Daudi katanyi.

¹²Kisöwï Daudi lö kikwigh ECHOTYON nyinte kïlïkwï pöytoghinto Israel akusoyön paytaghtanyi akwompö pikachi Israel.

¹³Kwip Daudi koru walaka cho chang ompö Yerusalem otini kikungwïna Epron, kïtösisyö monïngo Daudi cho le tipïn nko wor.

¹⁴Chï kï kaynötut pö monechi cho kikïyichï Yerusalem: Syamua nko Syopap nko Natan nko Solomon

¹⁵nko Ipar nko Elisyua nko Nepek nko Yapia

¹⁶nko Elisyama nko Elyada nko Elipelet.

¹⁷Nyini kilïm pipö Pilisti lö kakïkïl Daudi kïlïkwï pöytoghinto pipö Israel, kïpa löwïr kïyar Daudi, kïlïm Daudi, kïwö kutang wölay tekate.

¹⁸Kïpka pipö Pilisti kïtoyechï mpöghoghyo Repaim.

¹⁹Kïtep Daudi ECHOTYON lö, “Owan oporyeghö pipö Pilisti? Itöninyi chane morichan?” Kïlenchï ECHOTYON nyinte, “Wïyönyi, otönan chane moriku.”

²⁰Kïwö Daudi kutang Paal Perasim akïrïnta pipö Pilisti ompö wöloni, akïlö, “Kepuktö ECHOTYON pungköchan le atay chutöy puseryonta chemuserya.” Kïlenyona kekurö atoni Paal Perasim.[4]

²¹Kïpïsyï atoni pipö Pilisti körkeyïntinekwa, kïsït Daudi nko pikachi.

²²Kïpka ngat pipö Pilisti kïtoyechï mpöghoghyo Repaim.

²³Otini kitep Daudi ECHOTYON, kïlenchï ECHOTYON Daudi, “Mepustegha wölo le tawungwa, wölo wita okumpö löt aingwïna okumpö keti kapïrïmen.

²⁴Akï nyini kelïmanyi kighumöto kelyon ompö paraku ket, ipokyï chane, ompöwölo köwö ECHOTYON tawungu atökïporyeghö lïko pipö Pilisti.”

²⁵Kwigh Daudi lenyini kimwochï ECHOTYON, kïpar pipö Pilisti kïngata Kepa ntökwit Keser.