Read pokoot 2 SAMWEL 6 Bible Online

2 SAMWEL 6 - pokoot bible

2 SAMWEL 6

¹Kutuyö ngat Daudi pipö Israel 30,000 cho le nyökon.

²Kïwö Daudi nko pïchay löwïr cho kimi nyinte tïkwïl kutang Paala nyo mi Yuda, atökwipï Santuku Muma nyo kïkurtegho kaynata Tororöt Kimuktoghin nyo mi paytaghtanyi kwenu kerupimtin.*

³Kïsïtunö kö pö Apinadap nyo kimi kutïng akutö nkari nyo tökïrel. Aki Usa nko Aio werpö Apinadap cho kikötöy nkaritö

⁴akimi Aio kuntöghogho Santuku.

⁵Kïmi Daudi nko pipö Israel löwïr kïnyolöy akïtumchini ECHOTYON ompö owesyengwa kïmïkul, akitïng pilimpin nko pïkantis nko kwïrkwïris nko kari walaka cho pö tumwöy.

⁶Nyini kit chane ghatya pagh nyo pö Nakon, kïchityö eghinechay, kïnam Usa Santuku Muma.

⁷Kïnarek ECHOTYON ompö Usa akïtïgh nyinte, ompöwölo kighïtö ewunyi kïnam Santuku Muma, kïmeghchï nyinte kamasu Santukunoni.

⁸Kinarek Daudi ompöwölo kitïgh ECHOTYON Usa, akekurö atoni Peres Usa[5] nko ye.

⁹Kuwagh Daudi ECHOTYON asisoni, akïlö, “Osïtan lö ne Santuku Muma kanasyantenyu?”

¹⁰Melö kimököy nyu Daudi kïsïtöy Santuku Muma kutang kanasyantenyi. Kïrop kamas akïsïtï kö pö Oped Edom nyo le chi pö Kit.

¹¹Kïtöpö Santuku Muma kö pö Oped Edom chi pö Kit ompö aro sömök, kusoyön ECHOTYON nyinte nko katanyi.

¹²Kemwochï pöytoghin Daudi lö, “Kesoyön ECHOTYON kö pö Oped Edom nko kïgh anka tïkwïl nyo le nyenyi akwompö Santukunay pö Muma.” Kïwö Daudi kïsïtunö Santukunay kö pö Oped Edom kutöngwï kanasyantenyi ompö ngörekyö.

¹³Nyini kipa pïchay kelyön mut nko akonga kisïtöy Santuku Muma, kutö Daudi ECHOTYON amöros nyo pö kirïk nko sunet.

¹⁴Kïnyolchï Daudi ECHOTYON ompö owesyenyi kïmïkul akinonoghchï muyenyi sïra katani nyo pö tïsï.

¹⁵Kïsïtï Daudi nko pipö Israel löwïr Santuku Muma akuteghyot akïkutöy kontin.

¹⁶Nyini kitï Santuku Muma kanasyanta Daudi, kurumï Mikal chepö Saulö tïrisya akïsïwa pöytoghin Daudi kïnyolöy akudöngonyöy ompö ECHOTYON, kïsas nyinte nyoman.

¹⁷Kïsïtï chane Santuku Muma akutö ema nyo kökikïtek Daudi kutö Daudi ECHOTYON amörostin cho kïpelöy nko cho pö pöghisyö.

¹⁸Nyini kiwang Daudi kutötö amörostin cho kïpelöy nko cho pö pöghisyö, kusoyön pich ompö kaynata ECHOTYON Kimuktoghin.

¹⁹Akïchöghchï chi anka tïkwïl ompö söpïch pö Israel cho kile mïrön nko kor makatyan nyo mïnïng nko peny kite nko makatyan nko akwa makany. Kïwö nyu chi anka tïkwïl katanyi.

²⁰Kïmïla Daudi atökutakwes piko katanyi. Kungwïn Mikal chepö Saulö akïtarok nyinte akïlenchï, “Wechï kökwol kegh asete pöytoghinto pipö Israel akïnganyta kegh ompö tawu tipïn cho le mötwori pikachi le ato portoy sölwöy chïrutnönengwa!”

²¹Kïlenchï Daudi Mikal, “Konyolchinan ECHOTYON nyo kikïlanïn aker papongu nko konyi alïkwan pöytoghinto pipö ECHOTYON Israel, kïlenyona onyolchinan ECHOTYON.

²²Otöninan ye nyu kegh arasï tya kïtïl nyoni ntasasan kegh, wölo konyïtanïn tipichona tya.”

²³Kimösïknye monïng Mikal nyay le chepö Saulö ntökïrapas.