Read pokoot 2 SAMWEL 9 Bible Online

2 SAMWEL 9 - pokoot bible

2 SAMWEL 9

¹Kïtep Daudi lö, “Ekimito chi nyo kingötï ompö ka Saulö, atoporchan nyinte köromnyö akwompö Yonatan?”

²Kimito mötworintö nyo kipö ka Saulö nyo kikïkurö Sipa, kekur nyinte kïwö wölo mi Daudi, kïtep pöytoghintö nyinte lö, “Ichinyi Sipa nya?” Kïlö, “Owöy.”

³Kïtep pöytoghintö lö, “Ekïmito chi nyo kingötï ompö ka Saulö atoporchan köromnyo Tororöt?” Kïlenchï Sipa pöytoghintonay, “Mi wero Yonatan nyo ngwolöy.”

⁴Kïlenchï pöytoghintö Sipa, “Mi onö nyinte?” Kïlenchï, “Mi kö pö Makir wero Amiel nyo mi Lo Depar.”

⁵Kïyonta Daudi chi kumïtuna nyinte wölini.

⁶Kungwïn Mepipösyet wero Yonatan wero Saulö wölo mi Daudi akungïrukyï nyinte ompö konyït. Kïkur Daudi, “Mepipösyet.” Kïngitön Mepiposyet lö, “Yoy!”

⁷Kïlenchï Daudi nyinte, “Mewöghisyö, ompöwölo oporunyi köromnyö akwompö papongu Yonatan, okoninyi koreto kukötöngu Saulö aiyomisyeghonyi mesenyan kïtenö osis.”

⁸Kungïrukö ngat Mepiposyet ompö konyït akïlö, “Melö ochan ngwangwa kïtïl kukïy nyo kima, ompö ne teghwaninyi nyo karam le nyï?”

⁹Kïkur Daudi Sipa mötworinto Saulö akïlenchï, “Otöninan wero echotyontenyan kïgh anka tïkwïl nyo kipö Saulö nko katanyi.

¹⁰Ongorekwa parenyi, nyi nko werköku nko mötworiku al pagh atökïnyorï nyinte omisyö nyo omöy, wölo omisïyi Mepiposyet nko ani kïtenö osis.” Kitïng Sipa wor cho le taman nko mut nko mötworï tömönut odeny.

¹¹Kïlenchï Sipa pöytoghin, “Oghan ngal löwïr lenyini kemwaghanyi.” Kwomisyö nyu Mepiposyet ompö mesa pöytoghin Daudi le akonga ompö werkachi.

¹²Kitïng Mepiposyet werïnyi nyo mïnïng nyo kïkuro Mika. Kïlïkwï pipö Sipa löwïr mötwori Mepiposyet.

¹³Kïmang Mepiposyet Yerusalem ompöwölo kyomisïyi nko pöytoghin kïtenö osis. Kingwolöy nyinte.