Read pokoot 1 PÖYTOGHÏ 1 Bible Online

1 PÖYTOGHÏ 1 - pokoot bible

1 PÖYTOGHÏ 1

¹Otini kiyosit pöytoghintö Daudi nyoman, kuyenö mötworichi nyinte sïro cho nïkisöch, wölo melö kinyorï lölöngyö.

²Kïlenyona kïlenchï mötworichi nyinte, “Nya keyörï mïrar atökïtöpö nko nyi akïripïn akïkonïn lölöngyö.”

³Kïlenyona keyar mïrar nyo pïchigh ompö koro Israel kïmïkul ntökenyorï akonga nyo kikuro Apisyak nyo ngwïno Syunem, kemïtyï pöytoghin.

⁴Ki pïchigh kokononi nyoman, kïrip nyinte pöytoghintonay akïpöghisyechï, wölo melö kirï nko cheponi.

⁵Kïkonï kegh Adonicha wero Daudi nyo kikuro kame Akit akïlö, “Ani nyo olïku pöytoghin.” Kïlenyona kïyörchï kegh nkaritin nko askarin cho pegho angoletin nko pich tömönut mut cho mi kuntöghoghchini nyinte.

⁶Wölo möminye ato kigheghchï kwanta nyinte akïtep lö, “Ompö ne teghenyi le nyï?” Ki pïchigh Adonicha nyoman aki nyinte nyo kirïpöy Apsolom.

⁷Kïngalan Adonicha nko Yoap wero Seruya, kïmi nko Apyatar nyo kile tïsin, kïcham chane kungarak nyinte.

⁸Wölo melö kimi Adonicha nko ompö Sadok nyo kile tïsin nko Penaya wero Yeoyada nko werkoyon Natan nko Syimey nko Rey nko pich cho kile ripi Daudi.

⁹Kïyeng Adonicha kechir nko tïch cho okwoghöch ompö koghpa Moroy, nyo lekïto ngarpïlu Enrokel, akïkur werpö pöytoghin Daudi walaka nko yetïntino pöytoghin nko pipö Yuda kïmïkul atökïpka kwam ichon ompö atoni.

¹⁰Wölo melö kikur Natan nyo kile werkoyon anta Penaya anta ripi pöytoghin anta werïngwa Solomon.

¹¹Kïtep Natan Patsyepa yoto Solomon lö, “Tomönye so lïmanyi lö kilïkwï Adonicha wero Akit pöytoghin, akwanyï tomönye kunkïtï Daudi echotyontencha?

¹²Nyo omökan omwowunyi ngölyon atemuka sörunö kegh aisörï werïngu Solomon.

¹³Wïyö wölo mi pöytoghintö Daudi ailenchï, ‘Echotyontenyu pöytoghin, olentan kiwalwalanyi lö, lïku werïnyan Solomon pöytoghin nyo kerinyi kïtöpo ngacharungu? Kï kölö ne tökïlïkwï Adonicha pöytoghin?’ ”

¹⁴Kïtas Natan kïmwa lö, “Olïtunan nyu otini temitenönyi ngölone nko pöytoghin Daudi, ato kïninian ngaleku.”

¹⁵Kïlenyona kïwö Patsyepa kïlït kö pö pöytoghinto. Ki poyon nyinte nyoman, akimi mïraranay le Apisyak ngwïno Syunem kïpöghisyechini nyinte.

¹⁶Kungïrukeghö Patsyepa tawunyi ompö konyït. Kïtep pöytoghintonay nyinte lö, “Imökenyi ne?”

¹⁷Kuyokyï Patsyepa lö, “Kiwalwalanyi ompö ECHOTYON Tororötïngu lö, lïku werïnyan Solomon pöytoghin nyo keröy kïtöpo ngacharungu.

¹⁸Kwanyï ye mi Adonicha kïpöytoy, amenkïtönyinye.

¹⁹Anyï ye köwechï kïyeng tïch cho okwoghöch nko kechir cho chang, akïkur werköku nko Apyatar nko tïsin nko Yoap nyo ghyongchini askarineku kïpka kwam ichon, wölo mökurnye mötworintengu Solomon.

²⁰Akwanyï inkïtönyi, echotyontenyu pöytoghin lö mi Israel kïmïkul kurosinyi atemwochinö chane lö, ngo nyo töpo ngacharu nyo pö paytagh.

²¹Ato meghanyinye lenyoni ye otini kerapasanyi, keyitanïn nko werïnyan Solomon lö kïchicha wökï.”

²²Otini kitökïmi kamanoni kïngölonöy nko pöytoghin, kïlïtï werkoyon Natan.

²³Kemwochï pöytoghintonay lö mi werkoyon Natan sany, kekurï nyinte kïlïtï kö, nyini kilïtï kungïrukeghö tawu pöytoghin ompö konyït.

²⁴Atolapay kïlö, “Kechömchinyi so, echotyon pöytoghin lö, Adonicha nyo lïku pöytoghin nyo töpo ngacharungu nyo pö paytagh?

²⁵Ompöwölo köwö nyinte asisete kïyeng amörostin cho pö tïch nko mogh cho okwoghöch nko kechir cho chang akïkur werpö pöytoghin löwïr nko pïchay ghyongchini askarin löwïr cho pö lïk, akïmi Apyatar tïsin nko chane. Nyo ato wö chi nyete le ye kïnyoru chane kwomöy ichontöngwa nko nyinte akïmi kuteghyot lö, ‘Isöp nyo kogh, we pöytoghin Adonicha!’

²⁶Wölo melö kikuranïn nyo ochï mötworintengu anta kur tïsin Sadok anta Penaya wero Yeoyada anta mötworintengu Solomon.

²⁷Kichö muköy so echotyontenyan kwighöy kïgh nyo lata nyete amelö mwochini mötworichi lö ngo nyo töpo ngacharunyi pö paytagh?”

²⁸Kïlenyona kïlö pöytoghintö Daudi, “Okurune Patsyepa kungwïn yi.” Kungwïn kamanay akughyongö tawunyi.

²⁹Kïlenyona kuwalwal kegh pöytoghintonay lö, “Kïle otini satate ECHOTYON nyo kisörunenanïn kömpölelutkachu löwïr,

³⁰itïtoy asisete ngalechanya kyoyomisunyi ompö ECHOTYON Tororöt pö Israel lö, lïku Solomon pöytoghin nyo rïpanïn, akï nyinte nyo töpo ngacharunyan nyo pö paytagh.”

³¹Kungïrukö Patsyepa ompö konyït akïlö, “Nya kïsöp echotyontenyan, pöytoghin nyo kogh!”

³²Atolapay kïyonta pöytoghintö Daudi chi kekurï tïsin Sadok nko werkoyon Natan nko Penaya wero Yeoyada. Nyini kitï chane,

³³kïlenchï pöytoghintö, “Amïta mötworichan apa otö werïnyan Solomon kïlany sïkïryenyan kegh amït nyinte kïröytö ntökwit Kion.

³⁴Nyini ketïta atoni kuyil tïsin Sadok nyinte nko werkoyon Natan atökïlïkwï nyinte pöytoghinto Israel. Atolapay akut kontï ateghyö lö, ‘Nya kïsöp nyo kogh pöytoghintö Solomon!’

³⁵Atolapay amïtï nyinte ngat kïpusï, atökïtöpö ngacharunyan. Ompöwölo nyinte nyo töpo ngacharunyan pö paytagh, kakïlan nyinte kïpayta pipö Israel nko cho pö Yuda.”

³⁶Kuyokyï Penaya wero Yeoyada pöytoghin Daudi lö, “Owöy! Nya kïcham ECHOTYON Tororöt pö echotyontenyan lenyoni.

³⁷Le atanye kimi ECHOTYON nko echotyontenyan pöytoghin, kïtöpö nyinte nko Solomon akwigh ngacharunyi nyo pö paytagh kïwowit kïtïl nyo pö echotyontenyan pöytoghin Daudi!”

³⁸Kïlenyona kutö tïsin Sadok nko werkoyon Natan nko Penaya wero Yeoyada nko pipö Keret nko Pelet Solomon kïlany sïkïryonay pö pöytoghin Daudi akumït nyinte ntökwit Kion.

³⁹Kïcheng tïsin Sadok lal nyo pö mwagh nyo kikipunö Ema nyo mi ECHOTYON* akuyila Solomon. Kïkut pïchay kontï panini akuteghyö lö, “Nya kïsöp nyo kögh pöytoghintö Solomon!”

⁴⁰Kïrïp pïchay löwïr Solomon akïmi kïkutotoy pkurerunekwa akïngörekyö nyoman. Kiwowit kiteghatengwa nyo kimï kwigh ngwïny kïpotan.

⁴¹Kïlïm Adonicha nko toyechi cho kimi nko nyinte kiteghatanay otini kimach chane kuwany ichontöngwa. Nyini kilïm chane chöghöto kontï, kïtepsyö Yoap lö, “Poru ne kiteghatanï teno nyï kengwïna kanasyan nya?”

⁴²Wölo otini kitomönye kuwany kïngalan, kwitï Yonatan wero tïsin Apyatar. Kïkur Adonicha nyinte akïlenchï, “Lïtunö kö, ichinyi chi pö man, olentan itïngetenyi lökoy cho karamach.”

⁴³Kuyokyï Yonatan Yoap lö, “Ewo, kinyorisyö ngala! Kegh echotyontenyo pöytoghintö Daudi Solomon kïlïkwï pöytoghin.

⁴⁴Kikïyonta pöytoghintö tïsin Sadok nko werkoyon Natan nko Penaya wero Yeoyada nko pipö Keret nko Pelet kïpa kulang nyinte sïkïryo pöytoghin.

⁴⁵Kïpa ompö tïsin Sadok nko werkoyon Natan akuyila nyinte wölini le Kion, kïpegha atoni akïmïlonchö kutang kanasyan nko ngörekyö nyo wow nyo kigh kanasyante kïpotan. Nka nyoni kiteghatanoni kelïmanyi.

⁴⁶Amelö nyoni onkït, kitöpö Solomon ngacharu paytagh.

⁴⁷Akusoyön ngat pipö ka pöytoghin Daudi akïmwa lö, ‘Nya kwigh Tororötïngu kaynata Solomon kïsala kïtïl kaynatengu!’ Kungïrukö pöytoghintö ompö konyït otini kimi pöröyunyi akïlö,

⁴⁸‘Nya kïsala ECHOTYON Tororöt pö Israel, nyo kiripanïn ntökïsïwa konyichan asisete chi nyo töpo ngacharunyan pö paytagh!’ ”

⁴⁹Kuwöghisyö nyu toyechay pö Adonicha akïpechï kegh. Kïwö chi anka tïkwïl arenyi.

⁵⁰Kuwagh Adonicha Solomon, kïwö akïnam kuyo ato kïpelo amöros.

⁵¹Kemwochï pöytoghin Solomon lö, “Kewagh Adonicha nyinte nyoman, köwö kïnam kuyo ato kïpelo amöros akïlö, ‘Omökan kuwolwolwanïn pöytoghintö Solomon lö, melö pöranïn nyinte.’ ”

⁵²Kuyokyï Solomon lö, “Ato porï kegh nyinte lö chi nyo pö man, kïmelö mi ompö nyo le putyonteto mötïnyi nyo chïnchini ngwïny. Wölo ato kïnyorchï nyinte ghöyityö, kepöröy.”

⁵³Atolapay kïyonta pöytoghintö Solomon pich kïpa kumïtï nyinte kungwïna ato kïpelo amöros. Kungwïn Adonicha akungïrukeghö tawu pöytoghin Solomon ompö konyït, kïlenchï Solomon nyinte, “Wechinö kegh katangu.”