Read pokoot 1 PÖYTOGHÏ 11 Bible Online

1 PÖYTOGHÏ 11 - pokoot bible

1 PÖYTOGHÏ 11

¹Kicham Solomon kor cho le to cho chang, chepö Parao anka ompö koruchoni. Kwip nyinte tipö pipö Moap nko cho pö pipö Amon nko cho pö pipö Edom nko cho pö pipö Sidon nko cho kipkono koro pipö Ititi.

²Melö kiyang nyinte kiyomisöto Tororöt nyo kitagha pipö Israel kwip tipö pich walaka, ompöwölo kighöy nyoni pikachi kupotyö akwigh chane kïsagh tororötin walaka, wölo kip pat chane kïsamta.

³Kwip Solomon kor 700 cho kile tipö pöytoghï, akïtas ngat chemïnïngwen* cho le 300. Koruchoni cho kigh Solomon kïpïstö Tororöt,

⁴nyo otini kiyosit, kunet chane nyinte kïsagh tororötino pich cho le to. Amelö kitökïcham Solomon ECHOTYON Tororötïnyi le wölo kilata paponyi Daudi.

⁵Kisagh Astoret tororöt pö pipö Sidon nyo kile korka nko Molek, tororöt pö pipö Amon nyo lilu.

⁶Kigh Solomon ngokï ompö tawu ECHOTYON amelö kirïp nyinte ECHOTYON le kwanta Daudi.

⁷Kitek okumpö kongasispa Yerusalem ato kïsogho Kemos, tororöt pö pipö Moap nko ato kïsogho Molek, tororöt pö ghöyityö nyo pö pipö Amon.

⁸Akïtekyï koruchi cho le to wölo kïsogho atökïpela köröstin akutö amörostin cho ropchini tororötinekwa.

⁹Kïnörekyï ECHOTYON Tororöt pö Israel Solomon ompöwölo, kïrkegh kökikururchï nyinte Solomon kïnyïl odeny, akïrirchï lö ghochitu ngala ato rïp nyinte tororötino pich cho le to,

¹⁰wölo melö kiter nyinte ngala ECHOTYON.

¹¹Kïlenyona kïnörekyï ECHOTYON Solomon akïlenchï, “Osöroninyi pöyunötengu nyo mötïny, atönön mötworintengu, ompöwölo kerïpönyi Muma nyo kyam nko nyi aipenyanyi kirurutköchan.

¹²Wölo metucha ngalechoni ghach otini tesöpenyi akï ompö papongu Daudi, wölo kipuntoy ato pöytoy werïngu.

¹³Wölo melö ochengonan nyinte paytaghta kïmïkul, opïsinan nyinte kïpöytoy pipö kö akonga ompö mötworintenyan Daudi nko ompö kanasyanta Yerusalem, kanasyantanaye kakïlan kïlïkwï nyinyan kegh.”

¹⁴Kïlenyona, kwigh ECHOTYON Adad nyo pö ara paytaghpa Edom kïlïkwï Solomon.

¹⁵Kikany ato le tagh, ato kirïnta Daudi koro Edom, kïwö Yoap akïtïp pich cho kikïpar. Kipar nyinte chi anka tïkwïl nyo le mïrön nyo pö Edom,

¹⁶ompöwölo kimpur Yoap nko pipö Israel löwïr aro mut nko akonga ntökïtenö kunkïtï lö kipar chane mïrön anka tïkwïl nyo pö Edom

¹⁷wölo kiperta Adad nko pipö Edom walaka nko mötwori paponyi, kutang Misri. Kitökïmonïng nyo mïnïng osiswechoni Adad.

¹⁸Kïngeta koro Midyan akïpa ntökwitïta Paran, kïnomnyotö nko pikö walaka ompö Paran akïpa ntökwitïta Misri. Akwotini kimi Misri, kutö Parao pöytoghinto Misri nyinte kö akïmwatïta ketö omisyö akeporchï par.

¹⁹Kichomnyeghö Parao Adad ntökuyilchï orötanyi nyo mïnïng ompö Tapenes.

²⁰Kïyichï kokonay Adad worö nyo kikurö kaynenyi Kenupat, nyo kikïnama kö pö Parao.

²¹Nyini kilïm nyu Adad ompö Misri lö kirapas Daudi akima Yoap tïkwïl, kïlenchï Parao, “Pïswante owan korenyo.”

²²Kuyokyï Parao lö, “Ompö ne temökenyi mïlone? Ne kitö nyini körörchinyi temökenyi mïlone?” Wölo kïsagh Adad lö, “Pïswaninyi owan pat.”

²³Kwigh Tororöt ngat Reson wero Elyada kïlïkwï punyonto Solomon. Kökikupertegha Reson echotyontenyi, pöytoghin Adadeser nyo pö Sopa,

²⁴kökighamït nyinte pipö lïk cho le chelölos akïlïkwï yetïntöngwa atanya kimi Daudi kïpöröy pipö Sopa akïrïnta Adadeser akïpar pöytoghï löwïr cho kiwitwit nyinte wop löwïr. Ato mi löt kïwö Reson nko pikachi akïmang Damaska, akwotini kimi korononi kwigh pikachi nyinte kïlïkwï pöytoghinto Sirya.

²⁵Kilïkwï Reson punyonto Israel atanye kipöytoy Solomon, kusus chane tya le wölo kida Adad tïkwïl. Kïlenyona kïpayta Reson Sirya akïwöch Israel.

²⁶Chi akonga nyo kiwöch pöytoghin Solomon kï mötworintenyi Yeropoam wero Nepat nyo kingwïno Sereda koro Epraim. Kikuro kame Seruya nyo kile mïsïk.

²⁷Anyï wölini kingwïnta wökononi. Kimi Solomon atoni kunyïghitöy nyïngwïny okumpö kongasispa kanasyanta Yerusalem akemi kekïnöy nayatu kanasyantanoni.

²⁸Ki chumwak Yeropoam nyo awes. Otini kïsïwa Solomon wölo kilata nyinte, kutö kughyongchï ighisyewut löwïr cho pö kichikin ompö pipö Manase nko cho pö Epraim.

²⁹Kimi asis akong ato kirutoy Yeropoam kutöngöy Yerusalem, kïtuyö nko werkoyon Aiya nyo kingwïno Syilo. Kiryama chane kwodeny wölo le paren ompö arawet. Kiloköy Aiya atoni sïrenyi nyo rel,

³⁰Kïngwïs Aiya sïrenyi nyini tökïrel akïmutmut kïlïkwï taman nko odeny.

³¹Atolapay kïlenchï Yeropoam, “Ipö karerantin cho le taman, ompöwölo lentöy Tororöt pö Israel, ‘Ochengonan Solomon paytagh akoninyi paytena pipö ortïn taman.

³²Wölo otukyinan Solomon kïpöytoy pipö or akonga ompöwölo kosyonchan mötworintenyu Daudi, asyonchï kanasyanta Yerusalem nyo kakïlan kïlïkwï kanasyantenyu ompö koro Israel kïmïkul.

³³Oghan le nyete ompöwölo kataghanïn Solomon akïsagh tororötino pich cho le to, cho lata ompö Asterot tororöt pö pipö Sidon nyo le korka nko Kemos tororöt pö pipö Moap nko Molek tororöt pö pipö Amon. Kapeny Solomon kirurutköchan akwigh ngokï amelö kötökïrïp ngalechan le paponyi Daudi.

³⁴Wölo kïrkegh kegh nyinte lenyoni, kïmelö osöronan nyinte paytaghta kïmïkul, wölo oghan nyinte kïsïch owesyo paytaghat ompö osiswechi löwïr, ompöwölo osyonchinan mötworintenyu Daudi nyo kyakïlan nyinte akïrïp kirurutköchan löwïr.

³⁵Oghan kïgh akonga, osöronan werïnyi paytagh, akoninyi Yeropoam paytena ortïn taman,

³⁶wölo opïsinan wero Solomon kïpayta or akonga, atökungwïna pöytoghintö kö pö Daudi kokay nyo pöytoy Yerusalem, atökïlïkwï kitömöwon nyo lïwchini kanasyantanoni kyakïlan atökesaghenanïn.

³⁷Kïlenyona, oghinyi Yeropoam oghinyi lïkune pöytoghinto pipö Israel atepaytena kor kïmïkul nyo ichömenyi.

³⁸Ato iteranyi ngalechan aitöpö kïrïp kegh nko ngalechan, aighaninyi angarakan airïp ompö terchin kirurutköchan le mötworintenyan Daudi, otöponan nko nyi kokay. Ochïchiman paytaghtangu kïkil ompö koro Israel le wölo kyoghchan Daudi.

³⁹Onyörilan kong pipö ara Daudi ompö Solomon wölo melö kinyörilöy chane kokay.’ ”

⁴⁰Kïlenyona, kïmach Solomon kïpar Yeropoam, wölo kuperta Yeropoam akurïpchï koro Misri, akïtöpunö ka pöytoghin Sisak ntökïtenö kïrapas Solomon.

⁴¹Kirote ighisyewut löwïr cho kigh pöytoghintö Solomon ompö ngöghomnyenyi kitapu Ighisyewut pö Solomon.

⁴²Kipayta Solomon koro Israel ompö Yerusalem könyis tömönut angwan.

⁴³Kirapas aketïpchï kanasyanteto kwanta Daudi, kuker werïnyi Reopoam kïpayta.