Read pokoot 1 PÖYTOGHÏ 12 Bible Online

1 PÖYTOGHÏ 12 - pokoot bible

1 PÖYTOGHÏ 12

¹Kiwö Reopoam kutang Syekem wölini kituyechï pipö Israel atökuyil nyinte kïlïkwï pöytoghin.

²Nyini kilïm Yeropoam wero Nepat ngalechoni, akitökïmi nyinte kïwïnyo kegh koro Misri akwompö Solomon, kïmïlegha Misri lawel.

³Kïyonta pïchay pö ortïnechay kimi okumpö löt chi lawel wölo mi Yeropoam, atolapay kïpa chane löwïr wölo mi Reopoam akïlenchï,

⁴“Kitungenecha papongu nïkisïntin cho echön, wölo ato ighanyi kïkwïkwïsitu, kepöghisyewuchanyi.”

⁵Kuyokyï Reopoam pïchay lö, “Opïswante osis sömök kwïle tomölyongwan.” Kïpechï kegh pïchay.

⁶Atolapay kïwö Reopoam akïngalan nko poy cho kiruröy paponyi pöytoghin Solomon akïtep chane lö, “Ononekwa lö oyokyinan chane lö ne?”

⁷Kuyokyï pïchay lö, “Ato iyokyinyi chane kuten aicham ighchï chane nyo karam aintöghoghchï chane ompö or nyo karam, kïpöghisyewunyi chane ompö kighanat.”

⁸Wölo melö kitökïyang Reopoam ngalechoni, nyinö kitöteröy, kïwö wölo mi chumwak cho kile kongotichi cho kiruröy nyinte,

⁹akïlenchï, “Acho le akwa, ononekwa lö ne ompö pïchï mököy kemïnïngitöy nïkisïntöngwa nyo kitö paponyan?”

¹⁰Kuyokyï chumwakchay lö, “Lenchinö chane, tïrusitu mornenyan nyo mïnïng kïsir kapkörmönto paponyan.

¹¹Ki nïkis rötutyeto paponyan, wölo nïkisitu nyinyan tya. Kimungenokwa nyinte syaritin, wölo omungenokwa syaritin cho ngwonöch tya.”

¹²Nyini kiwonyö osiswö sömökï kwitï Yeropoam nko pïchay löwïr wölo mi Reopoam lenyini kökikuyomis nyinte chane.

¹³Kuyokyï pöytoghintonay pïchay ompö köromnyö akuchal ngalechay kimwochï poyï nyinte,

¹⁴kïrïp ngal cho kimwochï chumwak nyinte. Kïlenchï pïchay, “Kikonokwa paponyan nïkisïntin cho nïkisöch, wölo okonokwa cho nïkisöch tya. Kimungonekwa syaritin wölo omungenokwa syaritine cho ngwonöch tya.”

¹⁵Ki machata ECHOTYON nyoni kigh ngal cho kökimwochï Yeropoam wero Nepat ompö kuti werkoyon Aiya nyo pö Syilo. Nka nyoni kïgh nyo kigh pöytoghintononi kïtagh ngal cho kimwochï poyï nyinte.

¹⁶Wölo otini kisïwa pïchay lö melö kiyang pöytoghintonay ngalekwa, kuyokyï nyinte lö, “Apakaytena Daudi nko konyi, melö kïtïngetecha kïgh nyonikïny nyo kökiporöy tagh nko wero Yese. Kepechinö kegh, kemïlisyenö kestonicho cho kïchï pipö Israel! Ichïpo kongu onkït, we Daudi!” Kïlenyona, kïpechï kegh pipö Israel kestonikwa.

¹⁷Wölo kïpayta Reopoam pipö Israel cho kimöngöy kanastina Yuda löwïr.

¹⁸Atolapay kïyonta pöytoghintö Yeropoam Adoram nyo kighyongchini ighisyewut cho pö kichikyin kïwö wölo kimi pïchay pö Israel, wölo kïwira pïchay nyinte koghïn ntökïma. Nyini kilïm Reopoam ngalechoni, kïlany nkarinyi lawel akuperta kutang Yerusalem.

¹⁹Kïwöch kegh pipö Israel cho kimöngöy okumpö ewu löt nko pipö ara Daudi nko ye.

²⁰Nyini kilïm pipö Israel lö kimïlegha Yeropoam koro Misri, kïkur nyinte ompöwölo kituyegho chane akwigh nyinte kïlïkwï pöytoghinto Israel, wölo melö kimi chi nyo kichomnyö nko pipö ara Daudi kïpoto pipö Yuda opïn.

²¹Nyini kitïta Reopoam Yerusalem, kïghamït askarin cho köromöch 180,000 cho kipkana pipö Yuda nko cho pö Penchamen. Kimököy kïwetöy kïporyegho pïchay kimi okumpö löt pö pipö Israel.

²²Wölo kïmwochï Tororöt werkoyon Syemaya

²³kutötö ngölyontonï wölo mi Reopoam wero Solomon, pöyoghinto Yuda nko pipö Yuda löwïr lö lentöy Tororöt,

²⁴“Mapa opöryeghö werkökwo pipö Israel. Akanya kïmïla chi anka tïkwïl katanyi, ompöwölo keghisyö ngalechoni ompö machatenyan.” Kïter nyu pïchay ngala ECHOTYON akïmïlonchö kestonikwa.

²⁵Nyini kiwonyö pörchonay, kïtek ngat pöytoghinto Yeropoam kanasyanta Syekem ompö kutïng pö Epraim akïmang wöloni. Atolapay kïngeta atoni akïwö kïtek kanasyanta Penuel.

²⁶Kunonchï kegh Yeropoam lö, “Nkï töptoy mïlo paytaghtanyan kö pö Daudi ato pa pïchï kïropchï amörostin ECHOTYON ompö Kö pö Tororöt* nyo mi Yerusalem, kïwöghökisyö nyu chane kutang wölo mi Reopoam pöytoghinto Yuda kïpayta chane, atolapay kïparanïn nyu.”

²⁸Kïkany kïngalan nko kirurichi kumuchö, kwigh nyinte körkeyïntino mogh odeny ompö koltin akuporchï pipö Israel akïlenchï, “Kyapekwa Yerusalem asagh ompö osis cho chang. Achï, we pipö Israel tororötinekwa cho kimïtunenokwa koro Misri!”

²⁹Kutö anka Petel, kutö anka Dan.

³⁰Kwigh nyu pïchay ngokï otini kipa kïsagha körkeyïntinechoni Petel nko Dan.

³¹Kïwechï tïkwïl Yeropoam kïtek wölo kïsogho wölo le kutïngkot akïkïl tïsï ompö ortïn walaka cho melö pö ara Lawi.

³²Kuyomis pich löwïr Yeropoam kïrip asis nyo wow nyo pö saghat ompö asispa taman nko mut, nyo pö arawa mut nko sömök, kïle wölo kilata otöptino pipö Yuda. Kutötö Yeropoam amörostin asisoni wow kikïtuyegho kanasyanta Petel nyo kïsoghöy moghechay pö koltin kwigh nyinte, akutö tïsï Petel cho kipöghisïyi ompö atay kïsogho kitek nyinte.

³³Kiwetöy Yeropoam Petel kutötoy ropöwontenyi ompö ato kïpelo amöros asispa taman nko mut nyo pö arawa mut nko sömök.