Read pokoot 1 PÖYTOGHÏ 13 Bible Online

1 PÖYTOGHÏ 13 - pokoot bible

1 PÖYTOGHÏ 13

¹Kiweghö werkoyonta Yuda kutang Petel nyo kingölonchï ECHOTYON. Kwit otini kimi Yeropoam kughyongo ato kïpelo amöros atökutötö amörostanyi.

²Kïchïp chichay ato kïpelo amöros akïlö, “Heywey otï kïpelo amörostin! Heywey otï kïpelo amörostin! Lentöy ECHOTYON, ‘Kïyiyöy monïng ompö ka Daudi nyo kïkuro Yosia akï nyinte nyo tötoy tïsï cho pöghisyechini tororötin walaka le amörostin ompö nyi. Pelo yete nyu chichoni koyo pich löwïr.’ ”

³Kulet tagh werkoyontonay kïlö, “Anyï machey nyo poru, körero ato kïpelo amöros akïtoyö orechi. Atonkïtunökwa lö, ECHOTYON nyini kamwa ngalechoni.”

⁴Nyini kilïm pöytoghintö Yeropoam lenyoni, kungut werkoyontonay akïlö, “Anama nyinte!” Panini lawel kïmeyta ewunyi, amelö kitökumï kïnyakïm ngat.

⁵Akïpanini lawel kïkarera ato kïpelo amöros akïtoyö orechi kïrïp kegh nko ngölyontonay pö ECHOTYON kimwa werkoyontö.

⁶Kïlenyona kïlenchï pöytoghintonay werkoyontonay, “Kaykay soghwante ECHOTYON Tororötïngu kusop ewunyan!” Kïsagh werkoyontonay ECHOTYON, kïsöp ewunay.

⁷Kïlenchï pöytoghintonay werkoyontonay, “Nyonö kepe katanyan kyomisyenö atokonïn ropöwon.”

⁸Wölo kuyokyï werkoyontonay lö, “Kïrkegh kekonaninyi kareran nyo pö mökosyengu, kïmelö owetan nko nyi anta omisïyi anta agheghsyö.

⁹Ompöwölo kataghenanïn ECHOTYON am omisyö anta ogheghsyö anta amïla aranoni kangwïnan.”

¹⁰Melö kitökïmïla nyu nyinte aranini kingwïna, wölo kuwer are anka.

¹¹Kimi osiswechoni werkoyonta nyo le poyon nyo kimöngöy Petel. Kïpka werkachi akïmwochï nyinte ngala töngönchin cho kigh werkoyontonay ngwïno Yuda ompö Petel nko ngal cho kimwochï pöytoghin Yeropoam.

¹²Kïtep pontonay lö, “Aköwö chichoni or ne?” Kuporchï chane aranini köwö chichay pö Tororöt kingwïna Yuda.

¹³Atolapay kïlenchï werkachi, “Orötwonte sïkïryenyan.” Kwigh chane lenyoni akïlany

¹⁴kïwö kïrïp werkoyontonay ngwïno Yuda. Kïnyorï nyinte kumungo ket, kïtep lö, “Ichinyi werkoyontonay kengwïna Yuda nya?” Kuyokyï lö, “Owöy, ani nyoni.”

¹⁵Kïlenchï pontonay le werkoyon nyinte, “Kemïlisyenö kepe katanyan kyomisyenö.”

¹⁶Wölo kuyokyï werkoyontonay pö Yuda lö, “Mowetanye nko nyi anta katangu omisiyi, momanye kïgh anta aghegh pögh ompö koronï,

¹⁷ompöwölo kimwowanïn ECHOTYON lö meam kïgh anta ighegha pögh koronï. Akïtaghenanïn amïla aranini kyangwïnan.”

¹⁸Kïlenchï werkyontonay pö Petel nyinte, “Ochan tïkwïl werkyon le nyi, kömwowanïn malaykayanta ECHOTYON lö, wïyö mïtuna nyi kïmïla aitö omisyö.” Wölo ki putin werkoyontononi le poyon.

¹⁹Kïlenyona, kïmïla werkoyontonay kingwïno Yuda ka werkoyontonay le poyon pö Petel akwomisyö nko nyinte.

²⁰Akwotini kimi chane kwomisïyi, kungwïnchï ngölyonto ECHOTYON werkoyontonay le poyon

²¹nyo kilenchï werkoyontonay pö Yuda, “Kölö ECHOTYON kepenyanyi kiyomisötenyi amelö keghanyi kïgh nyo kömwowunyi nyinte.

²²Otï kemïlenyi aiyomisyö aigheghsyö ompö wölo kitagheninyi nyinte. Kïlenyona nyu ominyi ngötïny amelö kïtïpchininyi pïrïmpotiko papotïneku.”

²³Otini kiwany kwomisyö, kïrötyï werkyontonay le poyon werkoyontonay kingwïno Yuda sïkïryenyi.

²⁴Akwotini kimi pan, kïtuyö nko ngötïny kwam ngötïnyay chichay. Kimi portanyi arawet akimi sïkïryenyi nko ngötïnyay tïkwïl kughyongo kamasunyi.

²⁵Kïpka pikö walaka akuwer atoni akïsöchï poray pö chi arawet nko ngötïny nyo kighyongo kamasunyi. Kïpa pïchay kimwatïta ompö kanasyanta Petel.

²⁶Nyini kilïm werkyontonay le poyon ngalechoni, kïlö, “Werkoyontonay kipeny ngölyonto ECHOTYON nyoni! Nka nyoni köyonï ECHOTYON ngötïny kwam nyinte, kïrïp kegh nko ngölyonto ECHOTYON.”

²⁷Atolapay kïlenchï werkachi, “Akarkara sïkïryenyan.” Kwigh chane lenyoni.

²⁸Kïweghö pontonay sïkïryenyi ntökïtuyeghö poray pö werkyon mi arawet kwen akitökïmi ngötïnytö nko sïkïrye kughyongo kamasunyi.

²⁹Kïsït werkyontonay le poyon poray sïkïryenyi akïmïla kutang Petel atökïrirchï akïror.

³⁰Kirorchï pïrïmpenyi akirirchï nko werkachi akimi kïlentöy, “Heywey werïnyo! Heywey werïnyo!”

³¹Nyini kiwany kïlenchï werkachi, “Ato arapasan, ororchanïn ato lekïto pïrïmponï pö werkoyon.

³²Ompöwölo itïtoy ngala cho kimwa nyinte ompö ECHOTYON kïchïp ato kïpelo amöros ompö Petel nko woptine walaka tïkwïl wölo kïsogho körkeyïntin ompö koro Samaria.”

³³Melö kitökïpïstö Yeropoam ortïnechi cho ghach, kitas tagh kïkïl tïsï kïpkana pich kïtïkon atökïpöghisyeghö ato kïsogho körkeyïntin. Kikïl nyinte chi nyo kimököy kïlïku tïsin.

³⁴Kilïkwï ngokichoni ompö okuntanyi cho kiwany nyinte nko piko orengwa ompö ngwïny.