Read pokoot 1 PÖYTOGHÏ 14 Bible Online

1 PÖYTOGHÏ 14 - pokoot bible

1 PÖYTOGHÏ 14

¹Kïkasa osiswechoni Apiya wero pöytoghin Yeropoam.

²Kïlenchï Yeropoam korkenyi, “Waghaka kegh atömenkïtunyi chi lö ichinyi korkenyan, atolapay iwö ntetïta Syilo wölo mi werkoyontö Aiya nyanya kingor lö olïkunan pöytoghinto Israel.

³Ipchinö nyinte makatin taman nko kektin kïmi nko chupa kumat. Werkoyontononi nyo mwowu kïgh nyo igho ompö montönyo.”

⁴Kïlenyona, kïwö kokonay wölo mi Aiya ompö Syilo. Kikiyosit atoni Aiya amelö kitökurosïtoy.

⁵Wölo kökikïmwochï ECHOTYON nyinte ngala rutogh pö koko Yeropoam akïmwochï ngal cho kimwochini nyinte. Nyini kitïta kokonay pö Yeropoam, kwigh kegh kïsisit.

⁶Wölo otini kilïm Aiya ompö kukat kungwïnöy, kïlö, “Lïtunö ori kokonï pö Yeropoam, kölö ne teghanyi kegh sisituna? Otïngetan lökoy cho melö karamach ompö nyi.

⁷Wïyö lenchinö Yeropoam kölö ECHOTYON Tororöt pö Israel, ‘Kyakïleninyi kwenu pich aghinyi lïkuna pöytoghinto piköchan Israel.

⁸Kyasaran pipö ara Daudi paytagh, akoninyi. Wölo melö ketöpenyi le mötworintenyan Daudi, nyo kitekanïn kïnomnyö, amelö kipeny nyinte kirurutköchan, akigh kïgh anka tïkwïl nyo kyomökan nyinte kwigh.

⁹Keghanyi ngokï cho ghach tya kïtïl pöytoghï löwïr cho kimi tawungu. Ketaghaninyi aighanïn anarek tya otini keghanyi körkeyïntino karïn cho kïsoghöy.

¹⁰Opunan nyarïl ompö piko arenkwa ompö tïkuchoni kighanyi opöran piko orenkwa löwïr cho le mïrön, cho mïnkech nko cho echön. Omisan piko konkwa lökïr. Kipuktoy chane löwïr le sïkö.

¹¹Ato meghchï chi anka tïkwïl nyo pö arenkwa kanasyan kwomöy kukïdinö, kïkany anka tïkwïl nyo meghchini wölo le sany kwomöy mötönywö. Ani ECHOTYON nyo komwowï.’ ”

¹²Kulet tagh Aiya kïmwochï koko Yeropoam lö, “Mïlena tanga kaw, nyini kelïtönyi kanasyan, kïma werïngu.

¹³Riryot pipö Israel löwïr ompö nyinte akïtïpöy chane nyinte. Nyinte onkït nyo pö ara Yeropoam nyo kïtïpöy nyo karam, ompöwölo nyinte onkït nyo kacham ECHOTYON Tororöt pö pipö Israel.

¹⁴Töni ECHOTYON pipö Israel pöytoghin nyo wongöy pipö ara Yeropoam.

¹⁵Chopöy ECHOTYON kong pipö Israel akusasak le soywon nyo kisösoko lalwa. Ngöwuno nyinte pipö Israel koronete karam kitö nyinte papotïnekwa akutoyö chane kwoghyö lalwa Yuparet, ompöwölo kigh chane nyinte kïnarek tya otini kigh körkeyïn nyo pö tororöt nyo le korka nyo kïkuro Asyera.*

¹⁶Kechal ECHOTYON pipö Israel ompöwölo kegh Yeropoam ngokï akuntöghoghchï pipö Israel kwigh ngokï.”

¹⁷Kïmïla kokonay pö Yeropoam akïwö ntökwitïta Tirsa, akwotini kimi kïlïtöy konyi, kïma werïnyi.

¹⁸Kïriryö pipö Israel cho chang akïtïp, kïrïp kegh nko ngölyonto ECHOTYON nyo kimwa ompö mötworintenyi werkoyon Aiya.

¹⁹Kirote ighisyewut löwïr cho kigh pöytoghintö Yeropoam nko poryewutkachi nko paytaghtanyi kitapu Otöptino pöytoghi Israel.

²⁰Kipayta Yeropoam könyis 22, kïrapas aketïp kïpayta werïnyi Nadap.

²¹Kitïng Reopoam wero Solomon könyis 41 otini kitor kïpayta Yuda. Kïpayta ompö Yerusalem könyis 17. Kikïl ECHOTYON kanasyantanoni ompö koro Israel atökesagha nyinte. Kikuro kame Naama nyo kipö ara Amon.

²²Kigh pipö Yuda ngokï ompö tawu ECHOTYON akwigh nyinte kïnarek tya kïtïl wölo kida papotïnekwa.

²³Kïtek chane wölo kïsogho tororötino putintön akïtek pchörino koghïn cho le körkeyïntino Asyera atökïsagha wölo le komos nko wölo mi rurwonoy pö ket.

²⁴Wölo nyo gha tya, kimi mïrön nko mïrönkö walaka cho kitïpisot otöp nyo pö cheporesnan otini kipöghisyechini tororötinekwa. Kigh nyu pipö Israel tïkwïl cho ghach tya kïtïl cho kigh pipö Kanan cho kiyona ECHOTYON tawungwa atökïpïsï kïcheng korengwa.

²⁵Kiporyeghö pöytoghintö Sisak nyo pö Misri Yerusalem könyi mut nyo pö paytaghpa Reopoam,

²⁶akïcheng kaplawachtina Kö pö Tororöt* nko cho pö pöytoghin, kïmi nko longoy pö koltin cho kigh pöytoghintö Solomon.

²⁷Ato mi löt kwigh Reopoam longoy pö kari taghoy cho kiker chay pö koltin akutö ripï cho kiripöy ortïneko katanyi.

²⁸Kipöy ripichoni longochoni kïnomnyö otini wetöy kïlïtöy köyay pö Tororöt, atolapay kuyokyï köyay mi ripï.

²⁹Kirote ighisyewut löwïr cho kigh pöytoghintö Reopoam kitapu Otöptino pöytoghi Yuda.

³⁰Kimi osiswechoni poryot Reopoam nko Yeropoam.

³¹Ato mi löt kïrapas Reopoam aketïpchï pïrïmpo pöytoghin ompö kanasyanta Daudi. Kuker werïnyi Apiyam kïlïkwï pöytoghin.