Read pokoot 1 PÖYTOGHÏ 15 Bible Online

1 PÖYTOGHÏ 15 - pokoot bible

1 PÖYTOGHÏ 15

¹Kilïkwï Apiyam pöytoghinto Yuda ompö könyi 18 nyo pö pöytoghin Yeropoam nyo pö Israel.

²Kïpayta könyis sömök ompö Yerusalem. Kikuro kame Maaka chepö Apisyalom.

³Kwigh Apiya tïkwïl ngokichanye kigh kwanta, amelö kitenate mïkulöwunyi ompö tawu ECHOTYON Tororötïnyi le paponyi Daudi.

⁴Wölo ompö Daudi, kutö ECHOTYON Tororöt Apiya worö nyo kilïkwï pöytoghin kuker nyinte atökïpayta Yerusalem atökïrip kanasyantanoni tömökïwir.

⁵Kigh ECHOTYON choni löwïr ompöwölo kigh Daudi nyo karam ompö tawunyi, amelö mi ato kipeny nyinte kirurut pö ECHOTYON kïpoto ngala Uriya chepö Ititi.

⁶Kimi poryot Reopoam nko Yeropoam kïnomnyö ompö osiswo Apiyam löwïr.

⁷Kirote ighisyewut löwïr cho kigh Apiyam kitapu “Otöptino osiswo pöytoghi Yuda.”

⁸Kïrapas Apiyam aketïpchï kanasyanta Daudi. Kuker werïnyi Asa kïpayta.

⁹Kutor Asa kïpayta koro Yuda könyi tömönut odeny nyo pö paytaghpa pöytoghin Yeropoam, nyo pö koro Israel.

¹⁰Kïpayta ompö Yerusalem könyis 41. Ki kokötanyi Maaka chepö Apisyalom.

¹¹Kigh Asa nyo karam ompö tawu ECHOTYON le kukötanyi Daudi.

¹²Kipar nyinte mïrön löwïr cho kile ptakalis akïlasta körkeyïntin cho kigh kwanta.

¹³Akï yona paytagh kokötanyi Maaka, ompöwölo kigh körkeyïn pö arasï nyo pö Asyera* tororöt nyo le korka. Kunyar Asa körkeyïnoni akïpel lömïs ompö mpöghoghyo Kidron.

¹⁴Kïrkegh melö kinyar Asa woptin löwïr wölo kikïsogho körkeyïntin, akïlïkwï chi nyo ghanate ompö tawu ECHOTYON osiswechi löwïr.

¹⁵Kuyokyï Kö pö Tororöt* tïkwïn löwïr cho kökikïngot kwanta kïpöyit ighisyewut pö Tororöt, kïmi nko kari koltin löwïr nko kari silpa nko kari walaka cho kökikïngot nyinte tïkwïl.

¹⁶Kiporyö pöytoghintö Asa nyo pö koro Yuda nko Paasya pöytoghinto koro Israel ompö könyis löwïr cho kipöytoy chane.

¹⁷Kiporyeghö Paasya koro Yuda akutor kïtek nayat nyo kïripsyegho nyo pö Rama atömömi chi nyo lentöy olïtu anta weghö koro Yuda.

¹⁸Kïlenyona kïcheng pöytoghintö Asa silpa nko koltin löwïr cho kingötunö kaplawach pö Köyay pö Tororöt nko konyi akutö pikachi kwip kutang Damaska, wölo mi pöytoghintö Pen Adad nyo pö Sirya, wero Taprimon kuköto Esiyon, akïlenchï,

¹⁹“Osoghinyi lö kechomnyenö le wölanye kilata papotïnecho. Koropunyi silpa nko koltin. Kïlenyona mechomnyenö ngat nko Paasya pöytoghinto Israel, atökunategha pikachi cho pö lïk kïngeta korenyan.”

²⁰Kïcham pöytoghintö Pen Adad somötonay pö Asa akïyonta piko lïkenyi kïpa kïporyeghö kanastina Israel. Kïnam Iyon nko Dan nko Apel Pet Maaka, kor nyo lekïtö nanampa Kalilaya nko koro Naptali kïmïkul.

²¹Nyini kilïm pöytoghintö Paasya ngalechoni kighisyö, kïpïstö, tekatanay pö nayat mi Rama akïwö kïmang Tirsa.

²²Kïyonta pöytoghintö Asa kut kïghömï koro Yuda kïmïkul nyo kimököy chi anka tïkwïl kungarak kïkasan koghïn nko mpawtin ompö Rama cho kipöghisyegho Paasya kïteko nayatu ripsyö. Kïpöghisyeghö Asa koghichoni nko mpawtine kïteka nayat nyo mi Mispa nko Kepa, kanasyan nyo mi koro Penchamen.

²³Kirote ighisyewut löwïr cho kigh Asa nko owesyenyi nko kanastin cho kitek kitapu “Otöptino osiswo pöytoghi Yuda.” Wölo kisinkwala nyinte otini kiyosit, kyam sömewö nyo pö kel.

²⁴Kïrapas nyu Asa, ketïpchï pïrïmpoti pöytoghï ompö kanasyanta Daudi. Kuker werïnyi Yeosyapat kïpayta.

²⁵Kitor Nadap wero Yeropoam kïpayta Israel könyi odeny ompö paytaghpa pöytoghin Asa nyo pö Yuda. Kipayta nyinte könyis odeny.

²⁶Wölo kigh Nadap ngokï ompö tawu ECHOTYON le paponyi akwigh pipö Israel kwigh ngokï.

²⁷Atolapay kïngöghömchï Paasya, wero Aiya nyo kipö ara Isakar, Nadap akïpar nyinte otini kimi Nadap nko lïkenyi kusyepöy kanasyanta Kipeton nyo kipö pipö Pilisti.

²⁸Kepar Nadap könyi sömök ompö paytaghpa pöytoghin Asa nyo pö Yuda. Kïpayta nyu Paasya Israel kuker Nadap.

²⁹Panini lawel, kewany pipö ara Yeropoam löwïr kïrïp kegh nko ngölyonto ECHOTYON nyo kimwagha kuti mötworintenyi, werkoyon Aiya nyo pö Syilo, amelö kingötï nyo le ompö akonga.

³⁰Kilïkwï nyoni ompöwölo kinörekyï ECHOTYON Tororöt pö Israel Yeropoam ompö ngokichi cho kigh nko lelut cho kilelchï pipö Israel.

³¹Kirote ighisyewut löwïr cho kigh pöytoghintö Nadap kitapu Otöptino pöytoghi Israel.

³²Kiporyot kïtenö osis pöytoghin Asa nyo pö Yuda nko pöytoghin Paasya nyo pö Israel, otini kimi chane kïpöytoy.

³³Kilïkwï Paasya pöytoghinto Israel ompö könyi sömök nyo pö paytaghpa Asa wero Aiya nyo pö Yuda, kïpayta ompö Tirsa könyis 24.

³⁴Kigh nyinte ngokï ompö tawu ECHOTYON cho lata cho kigh Yeropoam nyo kigh pipö Israel kwigh ngokï akwompö ngokichi.