Read pokoot 1 PÖYTOGHÏ 16 Bible Online

1 PÖYTOGHÏ 16 - pokoot bible

1 PÖYTOGHÏ 16

¹Kingwïnchï ngölyonto ECHOTYON werkoyon Yeu wero Anani lö, lenchinö Paasya,

²“Melö kichinyi chi töma kyakïlinyi lïkuna kintöghoghinto piköchan Israel. Wölo anyï ye kerïpanyi ara Yeropoam aimït piköchan kwigh ngokï. Keghanïn ye ngokikwa anarekan.

³Kïlenyona owonginyi nko moneku, kïle wölo kyadan Yeropoam.

⁴Chi anka tïkwïl nyo pö arenkwa nyo kömeghchï kanasyan, kwomöy kukïdinö, kwam mötonywö cho kömeghchï wölo le sany.”

⁵Kirote ighisyewut löwïr cho kigh pöytoghintö Paasya nko owesyenyi kitapu Otöptino pöytoghi Israel.

⁶Kïrapas Paasya aketïpchï Tirsa, kïtöpö werïnyi Ela ngacharu akïpayta.

⁷Kimwochï ECHOTYON werkoyon Yeu kïchil Paasya nko piko konyi ompöwölo kighchï nyinte ECHOTYON ngokï. Kinarek ECHOTYON ompö Paasya ompö ngokï cho kigh le pöytoghin Yeropoam nyo kimi tawunyi. Akï melö ompö choni opïn, wölo ompöwölo kipar nyinte pipö ara Yeropoam.

⁸Kitor Ela wero Paasya kïpayta Israel ompö Tirsa, ompö könyi 26 nyo pö paytaghpa Asa pöytoghinto Yuda. Kipayta Ela könyis odeny.

⁹Kïmar or Simri nyo kighyongchini kareranpa nkarinechi nyo wöghöko pöytoghin. Kimi asistanka pöytoghintö Ela okumpö Tirsa kïghegho kumïn kö pö Arsa, chi nyo kighyongchini kö pö pöytoghin.

¹⁰Kïlït Simri köyay akïpar Ela akïsara paytaghta. Ki könyi 27 atoni nyo pö paytaghpa Asa, pöytoghinto Yuda.

¹¹Otini kilïkwï Simri pöytoghin, kipar mïrön löwïr cho pö ara Paasya, ata kongotichi.

¹²Kïpar nyu Simri kö pö Paasya kïrïp kegh nko ngölyonto ECHOTYON nyo kimwa ompö kuti werkoyon Yeu ompö nyinte.

¹³Kitïta lenyoni ompöwölo kigh Paasya ngokï nko werïnyi Ela otini kigh pipö Israel kupotyö, akwigh ECHOTYON Tororöt pö Israel kïnarek otini kipechï kïsagh körkeyïntin.

¹⁴Kirote ighisyewut löwïr cho kigh pöytoghintö Ela kitapu Otöptino pöytoghi Israel.

¹⁵Kipayta Simri pipö Israel ompö Tirsa osis mut nko odeny ompö könyi 27, nyo pö paytaghpa Asa nyo pö Yuda. Kimi pipö Israel cho pö lïk kuriköy kanasyanta Kipeton nyo pö pipö Pilisti,

¹⁶kïkany otini kilïm lö kawaghach Simri soch akïpar pöytoghinte, kïngörekyö pïchay löwïr akïlö kalïkwï ye nyu Omri nyo le yetïn pö pöytoghinto Israel.

¹⁷Kïngeta Omri Kipeton nko pikachi cho pö lïk akïpa kurich kanasyanta Tirsa.

¹⁸Nyini kisïwa Simri lö kikenam kanasyantanay, kurïp akïwö kïlït konyi nyo pö paytagh wölo le ori wölo aghïgh akïpel köyay pö paytagh, kïnagh nyinte ntökïma.

¹⁹Kigha lenyoni ompöwölo kighchï nyinte Tororöt ngokï le Yeropoam nyo kigh ngokï akwigh pipö Israel kupotyö.

²⁰Kirote ighisyewut löwïr cho kigh pöytoghintö Simri nko wöchut kitapu Otöptino pöytoghi Israel.

²¹Kipesyö osiswechoni pipö Israel kïlïkwï odeny. Kimököy Tipni wero Kinat kïpayta chane, kïmököy walaka Omri.

²²Ato mi löt kïlotisyö chay kikïl Omri. Kïma Tipni kïlïkwï Omri pöytoghin.

²³Ato mi könyito 31 nyo pö paytaghpa Asa nyo pö Yuda, kïlïkwï Omri pöytoghinto Israel, kïpayta könyis taman nko odeny. Kitöpunö Tirsa könyis mut nko akonga cho pö tagh,

²⁴ato mi löt kwala kutïng pö Samaria chi nyo kïkuro Syemer ompö kerpes 6,000. Atolapay kïtek Omri kutïngay nayat nyo kïripsyegho kuwit akïtek orinyi kanasyan nyo kimïnchï kaynata Samaria, kïrïp kegh nko kaynata Syemer nyo kipö kutïngoni ato le tagh.

²⁵Kigh Omri ngokï ompö tawu ECHOTYON kïtïl pöytoghi Israel löwïr cho pö tagh.

²⁶Kirïp nyinte ara Yeropoam ompö ngokichi cho kigh, akwigh ECHOTYON Tororöt kïnarek otini kintöghoghchï pipö Israel nko wölini kintöghoghchï pipö Israel kwigh ngokï akïsagh tororötin walaka cho le körkeyïntin.

²⁷Kirote ighisyewut löwïr cho kigh pöytoghintö Omri nko owesyenyi kitapu Otöptino pöytoghi Israel.

²⁸Ato mi löt kïrapas Omri aketïpchï Samaria, kïmïl werïnyi Aap kïpayta.

²⁹Kilïkwï Aap wero Omri pöytoghinto Israel ompö könyi 38 nyo pö paytaghpa Asa nyo pö Yuda. Kipayta nyinte ompö Samaria könyis 22.

³⁰Kwighchï Aap ECHOTYON ngokï kïtïl pöytoghi Israel löwïr cho kimi tawunyi.

³¹Melö kimïchï nyinte ngokï cho teno cho kigh Yeropoam, wölo kilet tagh kwip Yesepel chepö Etpaal pöytoghinto Sidon akïsagh Paal.*

³²Kïtekyï Paal kö ompö Samaria akïtek ato kïpelo amöros akutö köyoni.

³³Kigh Aap ECHOTYON kïnarek kïtïl pöytoghi Israel walaka löwïr cho kimi tawunyi, otini kigh körkeyïn pö tororöt nyo le korka nyo kïkuro Asyera.*

³⁴Kïtek ngat Iyel nyo ngwïno Petel kanasyanta Yeriko ato kipöytoghin Aap. Kima Apiram poretya Iyel otini kitor nyinte kïtek kanasyanta Yeriko, akïma töwoniontenyi Sekup otini kimi nyinte kïteköy kukotiko kanasyan kïrïp kegh nko ngölyonto ECHOTYON nyo kökimwa ompö Yoswö wero Nun.