Read pokoot 1 PÖYTOGHÏ 17 Bible Online

1 PÖYTOGHÏ 17 - pokoot bible

1 PÖYTOGHÏ 17

¹Kimi werkoyonta nyo kikuro Eliya nyo kingwïno chi pö Tispe ompö Kiliad. Kungwïn akïmwochï pöytoghin Aap lö, “Omwowunyi ompö kaynata ECHOTYON Tororöt pö Israel nyo opöghisyechinan lö melö tökïmi röyöntö anta rop ompö könyis cho pkonöy ntökïtenö omwowan lö ropönöy.”

²Atolapay kïlenchï ECHOTYON Eliya,

³“Ngetena aiwö itang wölnö le okumpö kongasis atewïngena kegh champilwa Kerit nyo mi lalwa Yordan okumpö kongasis.

⁴Igheghenyi pögheko lalwanoni. Oyokunan kukayoy kwipunyi omisyö ompö atoni.”

⁵Kwigh Eliya lenyini kimwa ECHOTYON akïwö kïtöpö champilwa Kerit nyo mi okumpö kongasis pö lalwa Yordan.

⁶Kïghegha pögh champilwanay akwipchï kukayoyï nyinte makatyan nko peny asis anka tïkwïl, tökwoghö nko nangat.

⁷Kïkany kuwer osiswö cho te, kïteny champilwanay ompöwölo melö kitökïropan.

⁸Atolapay kïlenchï ECHOTYON Eliya,

⁹“Ngeta ye nyu aiwö itang kanasyanta Sarepat nyo lekïto Sidon aitöpö wöloni. Komwochan korka nyo le mïsïk nyo möngöy wöloni kïkoninyi omisyö.”

¹⁰Kïlenyona kïnget Eliya akïwö kutang Sarepat. Nyini kitïta kuka Kanasyan kïsïwa mïsïk nyo kimi kïrïngöy kwen. Kïlenchï, “Kaykay konante pögh aghegh.”

¹¹Akwotini kiwetöy kïchengu pöghechay, kïkur Eliya ngat akïlechï, “Kaykay ipkante tïkwïl makatyan kite.”

¹²Kuyokyï kokonay lö, “Omwowunyi nyoman ompö kaynata ECHOTYON Tororötïngu nyo satate lö, melö otïngetan makatyan nyonikïny. Kïgh nyo otïngetan kï pïsya cho pö römut cho mi tïwan nko mwaghpa orolwö nyo le kite nyo mi tokögh. Kangwïnan yete osup kwen atop kaw atagh makatyan nyo omöy nko werïnyu. Lïku nyoni omisyencha nyo pö söröm, atomuchö kekoryecha.”

¹³Kïlenchï Eliya kokonay, “Mesus kegh, letanyi tagh igha omisyengwo, wölo inyagh ighwanïn makatyan kite aman, ateghanyi nyu nyingwo.

¹⁴Ompöwölo lentöy ECHOTYON Tororöt pö Israel, ‘Mewonyeghocha pïsya tïwananï amewonyeghonye mwagh toköwunoni kïtomö kwitï asisoni oyokunan rop.’ ”

¹⁵Kwigh kokonay lenyini kimwochï Eliya, kumï chane kwam omisyonay ompö osis cho chang.

¹⁶Melö kiwonyeghö pïsya tïwananoni amelö kiwonyeghö mwagh tïkwïl toköwu lenyaye kimwochï ECHOTYON Eliya.

¹⁷Ato mi asistanka kuchir weray pö kokonay, kïtasa kuchir ntökïma.

¹⁸Kïlenchï kokonay Eliya, “Ompö ne teghwaninyi le nyï akwanyï ichinyi chi pö Tororöt? Kichö ingwïnanyi wölï so atenonchinö Tororöt ngokichan nka nyï kötïgh werïnyan?”

¹⁹Kïlenchï Eliya, “Ale montö.” Kïchenga monïngay ewuneko kame akwip kutang konyi nyo kimöngöy ompö koropa akumïkonchï pöröyunyi.

²⁰Atolapay kïsagh ompö kut nyo wow lö, “Heywey ECHOTYON Tororötïnyu, kölö ne teghchinönyi kokonï le mïsïk le nyï akwanyï kapaghanïn nyinte nyoman akïripanïn? Kölö ne tetïghönyi werïnyi?”

²¹Atolapay kïkapapan Eliya poray pö monïngay kïnyïl sömök akïsoghöy kïlentöy, “Heywey ECHOTYON Tororötïnyu, igha monïngï kïsöp!”

²²Kïlïm ECHOTYON saghata Eliya, kutor monïngay kumuny ngat akïsöp.

²³Kïsït Eliya monïngay kïröytö wölini kame akïlenchï, “Rose köny lö kisöp werïngu.”

²⁴Kuyokyï kokonay lö, “Konkïtwan ye nyu lö ichinyi werkoyon akï ngölyon anka tïkwïl nyo imwowunenyi kungwïno wölo mi ECHOTYON.”