Read pokoot 1 PÖYTOGHÏ 20 Bible Online

1 PÖYTOGHÏ 20 - pokoot bible

1 PÖYTOGHÏ 20

¹Kïghamït pöytoghintö Pen Adad nyo pö Sirya piko lïkenyi kïmïkul nko pöytoghï walaka 32 kïmi nko angoletinekwa nko nkarinekwa akïsetï kanasyanta Samaria tökupokyï.

²Kïyonta pich wölo mi pöytoghintö Aap nyo pö Israel kïpa kïlenchï, “Kölö pöytoghintö Pen Adad,

³‘Lïku chichan silpeniku nko koltineku nko koruku cho pïchighöch nko moneku tïkwïl.’ ”

⁴Kuyokyï Aap pïchay lö, “Ape omwochinö echotyontenyan, pöytoghin Pen Adad lö, kachaman lenyoni, ochan nyenyi nko kïgh anka tïkwïl nyo otïngetan.”

⁵Kïmïlisyö ngat pïchay wölo mi Aap akïlenchï kölö Pen Adad, “Kyoyonwan kut wölo imitenyi lö omökan kari silpa nko koltin löwïr nko koruku löwïr nko moneku tïkwïl.

⁶Wölo koyonwan ye pikachu kïpka kïsakas kongu nko koriko mötworiku atökïpka kïcheng kïgh anka tïkwïl nyo kacham chane. Itu chane ato teno nyete asïyech.”

⁷Nyini kilïm Aap lenyoni, kïkur kintöghoghï löwïr cho pö korenyi akïlenchï, “Arose nyu lö anyï chi nyo mököy ngal. Kölenchanïn omököy koruchan nko monïnge nko kari silpa nko koltine, achaman choni.”

⁸Kuyokyï kintöghoghichay nko pikö löwïr lö, “Mecham ngalechi anta iter nyonikïny.”

⁹Kïlenyona kuyokyï Aap pïchay kiyonï Pen Adad lö, “Ape omwochinö echotyontenyan Pen Adad lö, kachaman tïkuchay kemwowunyi tagh wölo kataghan cho pö odeny.” Kïpa pïchay wölo mi Pen Adad akïmïlonchö nko ngölyonte anka,

¹⁰nyo ngwïno Pen Adad, nyo kilö, “Nya kïparanïn tororötinö ato moyokwanye pich wölo imitenyi cho nyoröy kanasyantengu pö Samaria kupot!”

¹¹Kuyokyï pöytoghintö Aap lö, “Ape omwochinö pöytoghin Pen Adad lö melö nyoghöy chi nyo setöy kïkwolöy kegh, poto otini kewonyö poryot.”

¹²Nyini kilïm Pen Adad ngalechay pö Aap otini kimi nko pöytoghichay walaka kïgheghsïyi ompö emenikwa, kïmwochï piko lïkenyi kïtïpï kïpsach atökupokyï kanasyantanay. Kwigh kegh pïchay.

¹³Kungwïn werkoyon wölo mi pöytoghinto Aap akïlenchï, “Kölö ECHOTYON, ‘Meway söpïchï wow tenö nyï! Otöninan chane moriku asisete, atenkïtunö lö ochan ECHOTYON.’ ”

¹⁴Kïtep Aap lö, “Akï ngo nyo ngörokecha?” Kïlö werkoyontonay, “Kömwochï ECHOTYON mïrön pö lïk cho ghyongchini koros.” Kïtep ngat pöytoghintonay werkoyontonay lö, “Akï ngo nyo toghu porye nya?” Kïlenchï, “Nyi.”

¹⁵Kïlenyona kïkur pöytoghintö Aap mïrön pö lïk cho kighyongchini koros. Ki pich 232 chane löwïr. Atolapay kïghamït pipö Israel cho pö lïk cho le 7,000 cho kipa nko mïrönchoni pö lïk.

¹⁶Kupoktö pïchay keghyö asis, otini kimi kïgheghsïyi ompö emenikwa Pen Adad nko pöytoghichay le 32 kipka kungarak nyinte.

¹⁷Kïpa mïrönchay pö lïk pö Aap kuntaghogh. Nyini kisïwa pich cho le mïrön cho kiyonta Pen Adad, kïpa kïmwatïta lö mi pipö lïk cho kisetunö Samaria.

¹⁸Kïlö Pen Adad ape anama chane amïtï kïsöpchot kïrkegh köpkonöy poryot anta köpkonöy lö tökyama mis.

¹⁹Kuntöghoghchï mïrönchay pö lïk ghyongchini koros poryonay, kïmi pipö Israel cho pö lïk kïrïpöy chane löt,

²⁰Kïpar chi anka tïkwïl punyontenyi nyo kiporyot tïkwïl. Kïryagh pipö Sirya, kïrïp pipö Israel kïyonta chane, wölo kupertegha Pen Adad angole nko pikachi cho kipegho angoletin.

²¹Kïrïnta pöytoghintö Aap ompö poryononi, kïnam angoletin nko nkarino pipö Sirya otini kiwany kïpar chane nyoman.

²²Kïwö ngat werkoyontonay wölo mi pöytoghintö Aap akïlenchï, “Wïyö ghamïta piko lïkengu ategha kegh, ompöwölo tökïmöröy pöytoghinto Sirya or nyo poryegheninyi ngat könyinï ngwïnöy.”

²³Kurur pöytoghin Pen Adad yetïntinechi lö, “Pö tororötino Israel komos, nka nyoni kirïntecha chane. Wölo kïrïntocha chane nyo mötïny ato kïporyecha nko chane ompö wölo le tömkö.

²⁴Kïlenyona yona pöytoghichay le 32 aitö otini kömi chane yetïntino pipö lïk.

²⁵Atolapay ikir pipö lïk walaka cho karkegh nko chay kapegheninyi aikonecha angoletine nko nkarine nko pich cho karkegh nko chanye kitïngetenyi atökeporyenöcha nko pipö Israel ompö wölo le tömkö. Kïrïntocha chane nyo mötïny.” Kïterchï pöytoghintö Pen Adad chane akïrïp kirurötengwa.

²⁶Ato mi könyito odeny, kïghamït piko lïkenyi akïpa kutang kanasyanta Apek atökïporyeghö pipö Israel.

²⁷Keghamït pipö Israel tïkwïl aketö kari poryot. Kïpa chane akïpa ntökïlekïtitu nko pipö Sirya, wölo kilata askarina lïko pipö Israel ocheywo ngaror cho kikïchagh kïlïkwï odeny ato kikongityö nko cho pö Sirya cho kighömï kore kïmïkul.

²⁸Kïwö werkoyonta wölo mi pöytoghintö Aap akïlenchï, “Lentöy ECHOTYON, ‘Ompöwölo kölö pipö Sirya ochan Tororöt nyo pö wölo le komos, amelö ochan Tororöt nyo pö wölo le tömkö, okoninyi rïntagh nyo wow asisete, atenkïtunönyi nko piköku lö ochan ECHOTYON.’ ”

²⁹Kïtopön kegh pipö Israel nko cho pö Sirya ompö osis mut nko odeny, ato mi asispa mut nko odeny, ketor poryonay. Kïpar pipö Israel pungkökwa cho le 100,000 cho kipegho kelyön lömïs ompö asis akonga.

³⁰Kupertoy cho kingötï kutang kanasyanta Apek, kïrulchï nayatu kanasyantanoni chane cho le 27,000. Kuperta tïkwïl Pen Adad akïwïnya kegh kö akonga nyo mi wölo le löt.

³¹Kïlenchï mötworichi, “Kakïlïmacha lö, tïng kisyonöt nyo wow pöytoghi Israel. Nyo mïchini kelakacha sarankwachtin akerötyï pörköy kotwonicho akepa wölo mi pöytoghinto Israel. Töptoy syonchininyi akïsörunyi.”

³²Kïlenyona kïkörmönchï kegh pïchay sarankwachtin, akïrötyï pörköy kotwonikwa akïpa wölo mi pöytoghinto Israel akïlenchï, “Kasaghinyi mötworintengu Pen Adad lö meparante.” Kuyokyï Aap chane lö, “Kichö tökïsöpöy so nyinte? Karkegh nyinte nko werïncha!”

³³Kuros mötworichay pö Pen Adad lasiny tökunkïtï lö mwoghöy man. Otini kimwa Aap ngölyontononi, kilö pïchay, “Owöy, Pen Adad, werïnkwa!” Kïlenchï Aap pïchay, “Amïtuna nyinte.” Nyini kikimïtï Pen Adad, kïkur Aap kïpus nkarinyi kïweghö.

³⁴Kïlenchï Pen Adad pöytoghin Aap, “Oyokunyi kanastinechanya kichenga paponyan papongu. Imukenyi towune ompö Damaska woptin cho kigho mïnchïrïsnön cho le cheku, kïle wölanye kigh paponyan ompö Samaria.” Kuyokyï Aap lö, “Kopïstinyi ye nyu ompö ngalechoni.” Kwam chane mis ompö atoni akïpïstö Aap nyinte kïwö.

³⁵Kungwïn chi akong nyo pö ara werkoy akïmwochï werkoyonte anka lö paranïn. Wölo kïtagh,

³⁶kïlenyona kïlenchï, “Ominyi ngötïny otini kengetenyi yeteyi, ompöwölo kepenyanyi ngölyonto ECHOTYON.” Kïkany otini kipesyö chane, kïtuyö nko ngötïny, kwam nyinte.

³⁷Kïwö werkoyontonay wölo mi chitö anka akïlenchï, “Kaykay wirante!” Kïwir chichay kïlïkwï kotyon.

³⁸Kïkartegha werkoyontonay ananka moyokachi cho kimi tokochunyi atökïwïng akïwö kughyongö or akïkany pöytoghinto Israel nyo kiweröy.

³⁹Otini kimi kuweröy pöytoghintonay, kïkur nyinte werkoyontonay akïlenchï, “Kyomitan poryot otini kimïtwanïn askaryon chi akonga nyo le naman akïlenchanïn, ‘Irip chichï, tömötöp ntökuperta, ato chïwït kï nyi nyo kïpörinyi anta manyona ighokunenyi ropïyen kilen tömönut sömök.’

⁴⁰Wölo otini kyomitan osïngo tïku walaka kuperta chichay!” Kuyokyï pöytoghinto Israel chichay lö, “Kemutanyi ngaleku nyinte, lecha choni ye nyu.”

⁴¹Kutyak werkoyontonay anankanay karata tokochunyi, kunkïtï nyu pöytoghintonay lö kichö werkoyon.

⁴²Kïlenchï werkoyontonay pöytoghin, “Kölö ECHOTYON, ‘Ompöwölo kepïstenyi chi kïchïwït nyo komwowunyi lö para, nyi ye nyu nyo ikonu söpontöngu akepöröy piko lïkengu, ompöwölo kepïstenyi piko lïkenyi kïchïwïtyö.’ ”

⁴³Kïmïla pöytoghintonay katanyi Samaria nko nörekyö nko nyïtat nyo wow.