Read pokoot 1 PÖYTOGHÏ 21 Bible Online

1 PÖYTOGHÏ 21 - pokoot bible

1 PÖYTOGHÏ 21

¹Kitïng chi nyo kikuro Napot parenyi nyo pö sapipun nyo kimi Yesrel nyo kilekït nko ka pöytoghin Aap Pöytoghinto Samaria.

²Kïlenchï Aap Napot asistanka, “Omökan ikonaninyi parengu nyo pö sapipun atawaghakan kïlïkwï parenyan nyo pö onkïy, ompöwölo lekïto katanyan. Okoninyi pare anka nyo karam tya nyo pö sapipun anta ato ichömenyi, olan ompö olyot nyo wow.”

³Wölo kïlenchï Napot, “Kyamïlan papotïnecha paranete, kïlenyona memukonye okoninyi.”

⁴Kïmïla nyu Aap katanyi nko nörekyö nko nyïtat nyo wow, ompöwölo kilenchï Napot nyinte, “Melö olunyi par nyo kyamïlan kukötinechu.” Kïwö kïrï pöröyunyi akïwïny tokochunyi akïtagh kwomisyö.

⁵Kïtep korkenyi Yesepel lö, “Ompö ne tenarekanyi le nyï aitagh iyomisyö?”

⁶Kïlö Aap, “Ompö kïgh nyo kömwowanïn Napot. Komökan otöni nyinte ropïyen cho kolentan tala parenyi nyo pö sapipun, anta ato kömököy otönan nyinte pare anka wölo kïtaghenanïn choni kwodeny!”

⁷Kïlenchï Yesepel, “Melö ichinyi so pöytoghinto Israel? Ngeta aingwïn iyomisyö aingarak, ompöwölo okoninyi paranoni pö Napot pö sapipun mi Yesrel.”

⁸Kukir Yesepel palaltin ompö kaynata Aap akïghïkchï ghïchutkachi palaltinechoni, atolapay kutötö kepchï poy nko kintöghoghi cho kimöngöy Yesrel.

⁹Kimwochï pïchoni ompö palalyantenyi lö, “Omwochinö pich löwïr kïkïrur asis akonga atökegh kokwö akonyït Napot.

¹⁰Atolapay ayar pich odeny, kïpka kïmïrchï put lö köchïp nyinte Tororöt nko pöytoghin tïkwïl. Atamïtakwa nyu nyinte kanasyan sany atökewira koghïn ntökïma.”

¹¹Kwigh nyu poyï nko kintöghoghi Yesrel löwïr kïrïp kegh nko ngala Yesepel.

¹²Kïkur pich löwïr kïkïrur asis akonga atökegh kokwö kutö Napot kïtöpö ato mi pipö konyït.

¹³Kïmïrchï put pïchay le odeny nyinte ompö tawu pïchay löwïr lö, kichïp nyinte Tororöt nko pöytoghin, kïlenyona kemït Napot kïlït kanasyan sany akewira koghïn ntökïma.

¹⁴Atolapay kïyonta chi wölo mi Yesepel kïlenchï kikïma Napot.

¹⁵Nyini kilïm Yesepel ngalechoni kïlenchï Aap, “Kikïma Napot, wïyö chenga parenyi nyay pö sapipun kitagh kwolunyi.”

¹⁶Kïwö Aap panini kutang paranay atökïcheng.

¹⁷Kïlenyona kïlenchï ECHOTYON werkoyon Eliya nyo ngwïno Tispe,

¹⁸“Wïyö wölo mi pöytoghintö Aap nyo pö Samaria. Inyorchinenyi nyinte para Napot nyo pö sapipun, anyete karik kïcheng.

¹⁹Mwochinö nyu nyinte lö, kolö ECHOTYON, ‘Kichö otini keparanyi chi, iwechinyi ichenga tïkuchi tïkwïl so?’ Mwochinö nyinte lö kolan, ‘Melo kukïdinö kisönköku otini kamela kisön pö Napot.’ ”

²⁰Nyini kisïwa Aap Eliya kïlenchï, “Heywey kenyorwaninyi punyontenyu?” Kuyokyï Eliya lö, “Owöy kangwïnan, atenyorunönyi chïpöto ECHOTYON ompöwölo kitötenyi kegh igh ngokï ompö tawu ECHOTYON.

²¹Kïlenyona mwoghöy ECHOTYON lö, ‘Opunyi nyarïl. Owonginyi lömïs. Opörinyi nko chi anka tïkwïl nyo le mïrön nyo pö arenkwa, nyo mïnïng nko nyo le poyon!

²²Körökegh asïyech piko arenkwa nko cho kipö ara Yeropoam wero Nepat nko pipö ara pöytoghin Paasya wero Aiya, ompöwölo keghaninyi anarekan aimït pipö Israel kwigh ngokï.’

²³Kïkany ngala Yesepel, kölö ECHOTYON omo kukïdinö panyechi kanasyanta Yesrel.

²⁴Ato mi chi anka tïkwïl nyo pö arengwa nyo kömeghchï kanasyan, kwomöy kukïdinö, kwam mötonywö cho kömeghchï wölo le sany.”

²⁵Melö kimi chi nyo kyalta kegh kwigh ngokï ompö tawu ECHOTYON, le Aap. Ompöwölo kicham kwigh machata korkenyi Yesepel.

²⁶Kigh ngokï cho ghach otini kïsagh körkeyïntin, cho kisoghöy pipö Amori cho kiyona ECHOTYON korononi ato le tagh atökïcheng pipö Israel.

²⁷Otini kiwany Eliya kïngalan, kïkarer Aap sïrokachi akïngwïs akulach sarankwachtin. Melö kitökwomisyö atoni wölo kisïch nyarïl nyo wow.

²⁸Kïlenyona kïlenchï ECHOTYON Eliya,

²⁹“Kesïwenyi wölini karïng kegh Aap kïlïkwï ompö tawunyan? Melö topunan ye nyu kinyaratanoni otini tökïsöpöy nyinte ompöwölo kegh nyinte lenyoni, wölo opunan osisweko werkachi. Atoni ato owonyan pipö ara Aap.”