Read pokoot 1 PÖYTOGHÏ 22 Bible Online

1 PÖYTOGHÏ 22 - pokoot bible

1 PÖYTOGHÏ 22

¹Kimi kalya kwenu pipö Israel nko pipö Sirya ompö könyis odeny cho kirïpta,

²wölo kungwïn könyito sömök pöytoghintö Yeosyapat nyo pö Yuda akïrutochï pöytoghin Aap nyo pö Israel.

³Kïtep Aap yetïntinechi lö, “Monkïtökwanye so lö kanasyantenyo Ramot Kiliad? Kwompö ne nyu tökïtomö kechengenacha pöytoghinto Sirya, akwanyï nyincha?”

⁴Kïtep Aap Yeosyapat lö, “Iwetenyi nko ani keporyeghenö Ramot Kiliad?” Kuyokyï Yeosyapat lö, “Omitan psach nko askarinechu nko angoletinechu.

⁵Wölo nyagha tepa ECHOTYON.”

⁶Kïlenyona kïkur Aap werkoy cho ngata 400 akïtep lö, “Owan opokyï Ramot Kiliad anta ewo?” Kuyokyï werkoyichay lö, “Wïyönyi, koninyi Echotyon owesyö nyo irïnteghonyi chane.”

⁷Wölo kïtep Yeosyapat lö, “Akïmi werkoyonte anka nyo kimukecha ntöketepa ngölyonto ECHOTYON nya?”

⁸Kuyokyï Aap lö, “Mito akong nyo kïkuro Mikaya wero Imla, wölo lilanïn kïgh nyinte nyoman, ompöwölo möminye kïgh nyonikïny nyo karam nyo ngoröy nyinte ompö ani, ngorchinanïn nyinte ngal cho ghach.” Kuyokyï Yeosyapat lö, “Ewo, pöytoghin memwoghöy lenyona.”

⁹Kïlenyona kïmwatïta Aap pöytoghinto Israel kemïtï Mikaya lawel.

¹⁰Kimi pöytoghichoni kwodeny kïtïpisot ngöcherwekwa cho pö paytagh, akwomisïyi ompö sanypa kuka kanasyanta Samaria ato kinyero pagh. Kilach chane sïrokökwa cho pö paytagh kïmi werkoyichay kïngorsïyi ompö tawungwa.

¹¹Kwigh Sedekia wero Kenana kuyo Karïn, akïlenchï Aap, “Kölö ECHOTYON, ‘Iporyeghonyi pipö Sirya ompö kuyechï airïntonyi chane nyo mötïny.’ ”

¹²Kïcham werkoyichay löwïr lö, “Wïyö aipokyï Ramot Kiliad, koninyi ECHOTYON owesyö nyo irïntegho chane.”

¹³Kimi atoni yetïnay kikïyonta kïwö kïkurï Mikaya kïsoghöy nyinte lö, “Icham lö nyoru Aap rïntagh, ompöwölo kikïngor werkoyi walaka löwïr lenyoni.”

¹⁴Wölo kuyokyï Mikaya nyinte lö, “Omwoghan ngal cho mwowanïn ECHOTYON kïpoto, motösanye walaka kwam chi Tororöt!”

¹⁵Otini kitïta Mikaya tawu pöytoghin Aap, kïtep pöytoghintö nyinte lö, “Mïchinecha kepe kepokyinö kanasyanta Ramot Kiliad anta ewo?” Kuyokyï Mikaya lö, “Ape opokyinö ompöwölo konokwa ECHOTYON rïntagh nyo wow!”

¹⁶Wölo kïlenchï Aap nyinte, “Komwowunyi kïnyïl cho chang lö ato ingölonöy nko ani ompö kaynata ECHOTYON kïmïchini mwaghanyi ngala man?”

¹⁷Kuyokyï Mikaya lö, “Kasïwan pipö Israel cho pö lïk kitoytoyö ompö kutïngkot le kechir cho puryö mösöwon. Atolapay kïlö ECHOTYON, ‘Mötïngcha pïchï kintöghoghin, nya kïmïlonchö chane kestonikwa ompö kalya.’ ”

¹⁸Kïlenchï Aap Yeosyapat, “Olentan komwowunyi lö möngorönye chichï kïgh nyonikïny nyo karam ompö ani, kïpoto nyo gha onkït?”

¹⁹Kïlö Mikaya, “Tera ngölyonto ECHOTYON ngat! Kyasïwan ECHOTYON kïtöpo ngacharunyi ompö yïm nko malaykenichi löwïr cho kighyongöy kuwit nyinte.

²⁰Kïlö ECHOTYON, ‘Onyorunan ngo nyo wetöy kïlïsöy Aap atökupokyï Ramot Kiliad atökepörchï wölini?’ Kïmwa malaykeni walaka ngölyon anka kïmwa walaka ngölyonte anka.

²¹Kungwïn malaykayan akong nyo kilenchï ECHOTYON, ‘Ani nyo olïsöy nyinte!’

²²Kïtep ECHOTYON lö, ‘Ompö or ne?’ Kuyokyï lö, ‘Owetan olïsöy werkoy pö Aap löwïr atökïmïr putintön.’ Kïlenchï ECHOTYON, ‘Nya kïlenyoni, kasïwan nyoman lö imukenyi.’ ”

²³Kïlenyona kïlö Mikaya, “Kikutö ECHOTYON werkoyiku mïkulögh nyo le lïsin. Kamwa nyinte lö imeghenyi.”

²⁴Atolapay kïwö werkoyontö Sedekia wero Kenana wölo mi Mikaya akurapach matany akïlenchï, “Kïngeta oyï ato kangetenanïn mïkulöwu ECHOTYON akungwïn kïngölonunyi?”

²⁵Kuyokyï Mikaya lö, “Inkïtunenyi otini kewenyi iwïnga kegh kot nyo pö ori.”

²⁶Kïlö pöytoghintö Aap, “Anama Mikaya, amït wölö mi Amon nyo kipöytoy kanasyantanoni nko wölo mi Yoas wero pöytoghin.

²⁷Omwochinö chane kïrötyï nyinte chela apagha makatyan nko pögh ntökïtenö amïlan ompö kalya.”

²⁸Kuyokyï Mikaya lö, “Ato imïlenyi ompö kalya, inkïtunenyi lö melö kingalan ECHOTYON nko ani!” Atolapay kïlenchï pïchay löwïr, “Ilïm chi anka tïkwïl ngalechï komwowokwa!”

²⁹Kïlenyona kïwö Aap pöytoghinto Israel nko Yeosyapat pöytoghinto Yuda kupokyï kanasyantanay pö Ramot Kiliad.

³⁰Kïlenchï Aap Yeosyapat, “Owengan kegh otini mi poryot kuletöy tagh, wölo lakanyi sïroköku cho pö paytagh.” Kïwö nyu pöytoghintonay pö Israel poryot akulak sïro walaka tömökinkïtï nyinte.

³¹Kökimwochï atoni pöytoghinto Sirya yetïntinechi pö lïk cho kighyongchini nkarinechi lö mapar chi anka tïkwïl kïpoto pöytoghinto Israel.

³²Nyini kisïwa chane Yeosyapat kïlö pöytoghinto Israel nyini, kïpa nyu kïporyeghö. Wölo kutegh Yeosyapat

³³kunkïtï nyu chane lö melö pöytoghinto Israel, kïpïstö akïmïlonchö.

³⁴Wölo kusamta askaryonto Sirya kotöt nyo kiwö kïnyak pöytoghin Aap, kïwut otini kituyeghö sïrenyi nyo pö karïn. Kïlenyona kïlenchï mötworintenyi nyo kimi nkarinyi, “Kikekotönanïn! Waghaka nkaritö atoweghan wölï kïporyegho!”

³⁵Kula poryot lakat asisoni, keghamït pöytoghin Aap ompö nkarinyi kïparta wölö mi pipö Sirya, kuyit akïghömï kisön nkarinyi wölo le to. Ato mi ato le mönon kïma Aap.

³⁶Otini kiröytö asis kemwochï pipö Israel cho pö lïk lö, “Wïyö chi tïkwïl katangu!”

³⁷Kïlenyona nyu kïma pöytoghintö Aap, kep portanyi akepa ketïpchï kanasyanta Samaria.

³⁸Kemwata nkarinyi kö pö pögh nyo mi Samaria, akïmela kukïdinö atoni kisönkachi akuwunö kegh cheporestin kïrïp kegh nko ngölyonto ECHOTYON nyo kimwa.

³⁹Kirote ighisyewut löwïr cho kigh pöytoghintö Aap kitapu Otöptino pöytoghi Israel. Wölo kitekta konyi akïmina kela pelöw nko ngat wölo kitekta kanastin cho chang.

⁴⁰Otini kima Aap, kïmïl werïnyi Aasia kïpayta.

⁴¹Kitor Yeosyapat wero Asa kïpayta Yuda könyi angwan nyo pö paytaghpa Aap pöytoghinto Israel,

⁴²ato kitïng nyinte könyis 35. Kipayta ompö Yerusalem könyis 25. Kikuro kame Asupa chepö Syili.

⁴³Kigh nyinte nyo karam le kwanta Asa ompö tawu ECHOTYON. Kirïp kirurut pö ECHOTYON löwïr wölo melö kinyar wölo kïsogho körkeyïntin, kulet tagh nyu pich kutötö amörostin cho kïpelöy nko tïkwïn cho ngutoy cho onyïn.

⁴⁴Kyam mis Yeosyapat nko pöytoghinto Israel.

⁴⁵Kirote ighisyewut löwïr cho kigh pöytoghintö Yeosyapat nko owesyenyi nko poryewut kitapu Otöptino pöytoghi Yuda.

⁴⁶Kiyona kore ptakalis löwïr cho le mïrön cho kipöghisyegho ato kïpelo amörostino körkeyïntin cho kimi kïngeta kïtökïpöytoy paponyi Asa.

⁴⁷Amelö kitïng pöytoghin koro Edom, wölo kipöytoy chi nyo kirïptoy pöytoghin nyo kikïl pöytoghinto Yuda.

⁴⁸Kigh pöytoghinto Yeosyapat melino Tarsis cho kipetöy koro Opir kïchengu koltin. Wölo melö kitïta ompöwölo kunyorisyeghö Esyonkeper.

⁴⁹Kïlenchï Aasia wero Aap Yeosyapat, “Nya kïpegha piköchan nko cheku melin,” wölo kïtagh Yeosyapat.

⁵⁰Kïma Yeosyapat, aketïpchï pïrïmpeto kukötinechi ompö kanasyanta Daudi. Kïmïl werïnyi Yeoram kïpayta.

⁵¹Kilïkwï Aasia wero Aap pöytoghinto Israel ompö Samaria, könyi 17 nyo pö paytaghpa Yeosyapat, pöytoghinto Yuda. Kipayta nyinte könyis odeny.

⁵²Kigh nyinte ngokï ompö tawu ECHOTYON le kwanta Aap nko kame Yesepel nko pöytoghin Yeropoam cho kimït pipö Israel kwigh ngokï.

⁵³Kisagh nyinte Paal* akïpöghisyechï le paponyi nyo kimi tawunyi. Kwigh ECHOTYON Tororöt pö Israel kïnarek.