Read pokoot 1 PÖYTOGHÏ 5 Bible Online

1 PÖYTOGHÏ 5 - pokoot bible

1 PÖYTOGHÏ 5

¹Otini kilïm Iram pöytoghinto Tiro lö kiketö Solomon paytagh akeyila mwagh atökïmïl ngacharuto kwanta Daudi, kïyonta pikachi wölo mi Solomon, ompöwölo kitïng kongotnön Iram nko Daudi ato le tagh.

²Kïlenyona kïyonta Solomon pich wölo mi Iram akïlenchï,

³“Inkïtönyi lö melö kimï paponyan Daudi ntökïtek Kö pö ECHOTYON Tororötïnyi, ompöwölo kiporyeghö pungkachi cho kiwitwit nyinte, ntökïtenö kutö ECHOTYON nyinte owesyö nyo kirïnta pungkachi löwïr.

⁴Wölo kokonanïn ye nyu ECHOTYON Tororötïnyan kalya ompö wop anka tïkwïl. Möminye punyon anta kïgh nyo gha.

⁵Kïlenyona kamachan ye nyu otekyï ECHOTYON Tororötïnyu Konyi nyo kiyomisyï nyinte paponyan Daudi lö, ‘Werïngu nyo otöninan ngacharu paytagh kïmïlinyi nyo teköy köyoni ompö Kaynatenyan.’

⁶Kïlenyona yontena piköku kïpa Lepanon atökïtörwanïn tarakit. Ighöy chane ighisyononi nko piköchan, oghokinan piköku ropïyen cho kemwowunyi. Ompöwölo inkïtönyi lö menkïtcha piköchan kïtöröy ket le akwa pipö Sidon.”

⁷Otini kilïm Iram ngalechoni pö Solomon, kïngarak nyoman akïlö, “Nya kïsala ECHOTYON asisete, nyo kitö Daudi worö nyo ngöghom nyo muköy kïpöytoy pich cho chang cho teno chï!”

⁸Atolapay kïyonta Iram chi wölo mi Solomon nyo kilenchï, “Konyorwan ye ngalechoni kemwowunyi, aghan kïgh anka tïkwïl nyo kemwaghanyi. Okonunan mpawtina tarakit nko saypras.

⁹Mïlmïluno piköchan wölnö le Lepanon ntökwitï nanam. Akekötuno mïkong ompö nanam ntökwitï atoni kemwaghanyi, atolapay ketyak ompö atoni atenyonönyi chenga. Machatenyan nyu, kï tönönyi omisyö piko katanyan.”

¹⁰Kïlenyona kutö Iram Solomon mpawtina tarakit nko saypras cho teno chini kimököy.

¹¹Kutö Solomon Iram köny anka tïkwïl nkanun tanin 2,000 cho pö omisyeto piko konyi nko mwaghpa arol liten 400,000.

¹²Kutö ECHOTYON Solomon ngöghomnyö lenyini kökakuyomisyï nyinte. Kimi kalya kwenu Iram nko Solomon, atolapay kwam mis chane kwodeny.

¹³Kikir Solomon pich cho le sekey cho le 30,000 kïpkana koro Israel kïmïkul,

¹⁴akïyonta pïchay kïpa Lepanon. Kikïyontoy pich Lepanon cho le elpun taman arawa anka tïkwïl kiporchini kegh pösyö. Kïlenyona kïpa chane Lepanon arawa akonga, kumpur kaw aro odeny. Ki Adoniram nyo kighyongchini sekeyichoni.

¹⁵Kitïng Solomon pich cho 80,000 cho kipötöy koghïn ompö komos nko 70,000 cho kisïtöy.

¹⁶Kimi pich cho le 3,300 cho kighyongchini ighisyononi kighöy pïchoni.

¹⁷Kimwatïta pöytoghintö kepï, koghïn cho echön cho pö olyot nyo wow cho kitoro Kö pö Tororöt.*

¹⁸Kupat pipö Solomon cho le tekï nko cho pö Iram nko cho pö kanasyanta Kepal koghïn nko pïrompur cho kïteko Kö pö Tororöt.