Read pokoot 1 PÖYTOGHÏ 7 Bible Online

1 PÖYTOGHÏ 7 - pokoot bible

1 PÖYTOGHÏ 7

¹Kitek Solomon katanyi ompö könyis taman nko sömök.

²Atolapay kïkurö kot anka, “Kö pö Wuw pö Lepanon.” Ki wow köyoni nyoman, ki miten 44 köghïntö, kï miten 22 töpesïntö, kï miten 13.5 kutok. Kikïteka pchörino tarakit akemurtö pïrompur ompö ortïn angwan akelochï parakuto pchörinechoni.

³Atolapay kemurtö pïrompur 45, pchörin taman nko mut cho le töroryon sömök.

⁴Kimi tïrisyen cho le töroryon sömök akitopönöy kegh.

⁵Kitïng kukoti nko tïrisyen cho pö köyoni pölöw cho karkegh woptine löwïr. Kikït tïrisyen töroryon sömök kïtopön kegh ompö nayat anka tïkwïl.

⁶Atolapay kwigh kö nyo pöro nyo pö pchörin. Ki miten tömönut odeny nko odeny koghïntö, kï miten taman nko sömök nko nïsï töpesïntö. Kitïng köyoni paranta nyo pöro, nyo kikïteka pchörin.

⁷Atolapay kwigh kö nyo pöro nyo pö paytagh, nyo kikïkurö kö pö Kirwok, köyoni nyo kirwokyinegho Solomon pich. Kikiluma köyoni tarakit kïngeta nyini le ngwïny ntökwit monchök.

⁸Kikïteka tarakit konyi nyo kimöngöy, nyo kimi lötu köyay pö kirwok. Kïtek ngat Solomon kot anka nyo karkegh nko köyoni kimöngöy nyinte, atökïpöyit korkenyi chepö Parao.

⁹Kikïteka korichoni löwïr koghïn cho pö olyot nyo wow, kïngeta otini kikitorö ntökwit monchök. Kikïnya kepat koghichoni akemuta mïsïmenö kïrïp kegh nko wölini kikipimta.

¹⁰Kikïteka koghïn cho echön akï pö olyot nyo wow kitoröto köyoni. Kingata koghichoni miten sömök nko nïsï koghïntöngwa, kï miten angwan walaka.

¹¹Kimi parakungwa koghi walaka cho pö olyot nyo wow cho kikipat kïrïp kegh nko kipimatengwa nko pïrompurtino tarakit.

¹²Kitïng köyoni pö ori, nayat nyo kikitö pïrompur pö tarakit otini kewer ortïna sömökï cho pö koghïn.

¹³Kïyonta pöytoghintö Solomon chi wölo mi Uram, nyo kimöngöy Tiro.

¹⁴Ki wero mïsïk nyinte nyo pö ara pipö Naptali, kimöngöy kwanta Tiro kïtomö kïrapas. Ki tïngan kwanta ompö kitangata taghoy. Kighöy Uram ighisyö anka tïkwïl ompö chïreryö. Kïcham nyinte asistanka kïwö wölo mi pöytoghintö Solomon, atökughyongchï ighisyewutkachi löwïr cho pö taghoy.

¹⁵Kwigh Uram pchörino taghoy odeny, ki miten mut nko sömök koghïntö kï miten cho ngata mut kuwit, akutö taghochoni otini kïlïto Kö pö Tororöt.*

¹⁶Akwigh ngat taghoy odeny walaka cho mïnkech. Kingata miten odeny koghïntö akutö paraku pchörinechay.

¹⁷Kimina sïrïmtin kuwitwit pchörï anka tïkwïl, wölo le mötït. Kikitö sïrïmtin mut nko odeny pchörï anka tïkwïl.

¹⁸Atolapay kwigh kari taghoy cho lata makumanka* töroryon odeny cho kitö kuwitwit pchörinechay.

¹⁹Kikigh karichoni taghoy aketö pchörinechoni, kikigh kïpïchighöchitu le tapïkoy cho pito pögh, kingata koghïntö miten odeny.

²⁰Kimi kari taghoy cho kikitö paraku pchörin odeny kuwitwit. Akimi makumankenichay cho le 200 ompö töroryon odeny cho kiyen karichay pö taghoy.

²¹Kutö Uram pchörin odeny kuka Kö pö Tororöt. Kitö anka okumpö tagh akïkurö Yakin[1] kïkurö nyo mi okumpö löt Poas.[2]

²²Kimi taghoy cho lata tapïkoy pö pögh pchörinechay wölo le möt. Kïlenyona nyu kuwonyö ighisyonay pö pchörin.

²³Kïtek Uram tanki pögh nyo pö tay nyo le miten odeny kïröytö, kï miten angwan kïmïrtö, kï miten taman nko sömök kuwit.

²⁴Kiwit katpa tankinoni karïn cho lata mïkon, cho kile töroryon odeny.

²⁵Kitöpö tankinoni paraku eghina taghoy cho le taman nko odeny, cho kighyongöy kïtopönöy kegh töronkwöyikwa akikïtat kïpeghategha sömök. Kitopön sömökï okumpö löt, kïtopön sömökï okumpö tagh, kïtopön sömökï okumpö tagh kïtopön sömökï okumpö kongasis.

²⁶Tïrusïnto tankinoni kï milimiten 75 kilata rinkiryenyi nyo pö kikompa, kilata tapïk nyo pito pögh. Kinyïghiti pögh ngarpïlunoni cho ngata liten 40,000.

²⁷Kwigh Uram nkaritin taman cho pö taghoy, cho kingata koghïnto anka tïkwïl miten odeny aki karkegh töpesïntö tïkwïl, ki ngata mita akonga kutok.

²⁸Anyï wölo kikida nkarinechoni. Kitïng mpawtin cho töpölol cho kikarkegh koghïntö nko töpesïntö.

²⁹Kikïmina körkeyïntino ngötuny nko kir nko kerupimtin.* Aketö paraku pölöwechoni nko toye nko kir cho kikïmina tapïkoy parak nko toye.

³⁰Kitïng nkaritö anka tïkwïl kelyön angwan nko mori cho pö kari taghoy akikïtighö kari taghochoni woptine tïkwïl nyo pö otupö keryama pölöwechoni.

³¹Kimi pölöwontö nyo lïmum nyo kitighöy otupononi, kingata kwenu mita koghïntanyi, ki pankase atole parak: akïwö ori nyo lekïto mita akonga, akemina tapïkoy wölo le sany, akikarkegh kamaswekwa tïkwïl ompö koghïn nko töpesïntö ki melö kiwit.

³²Kimi kelyechoni witwitöy le angwan ngwïnyi karïn nyo kikïrötyï kelyechoni kwodeny akekany kïtuyechï karïnanoni kikimurtö atökïlïkwï nyo ghyongo nkarinoni.

³³Kikarkegh kelyechoni witwitöy nko cho pö nkarino lïk.

³⁴Kitïng nkari anka tïkwïl tiwöw cho kitigho kegh ompö luchtinechi angwan.

³⁵Akimi paraku ngachar anka tïkwïl pörköyö nyo kiwit nyo ngata sentimiten 22 nyo kiwit nkaritö anka tïkwïl: kitighöy chane karïn cho kinomnyö nko nkaritö kïlïkwï kïgh akonga.

³⁶Kikïmina körkeyïntino kerupim nko cho pö ngötuny nko cho pö sos pölöwe löwïr nko kimurtöwe cho kikïteka nkarinechoni ompö pöroyïn anka tïkwïl nyo kirumunö nkaritinechoni nko nyu tapïkoy cho pito pögh cho kikïmin kuwit.

³⁷Anyï nyu wölo kikighta nkarinechï, ki karkegh nkarinechoni löwïr ompö wowïn nko wölo kikïtekta.

³⁸Atolapay kupat Uram ngat otupöy taman akïkany kïpöyit otupö anka tïkwïl nkari akonga. Ki ngata miten odeny koghïntö nyo pö kwen akikösönöy pögh cho ngata liten 800.

³⁹Kïkany kïtïpï nkarine mutï okumpö tagh nyo pö köyay pö Tororöt, kutö chay walaka le mut kïtïpunö okumpö löt, kutö nyu tankinay ato le kwenu ewu tagh nko kongasis.

⁴⁰Kigh Uram ngat otupöy nko kichikeni ngayam nko otupöy cho mïnkech. Kiwany nyu Uram ighisyonay kighchï pöytoghin Solomon ompö Kö pö Tororöt. Achï tïkwïn cho kigh nyinte: pchörin odeny otupöy odeny cho le mötöwo pchörinechoni kari walaka odeny cho pö netin cho kiyen otupöyichay kari taghoy 400 cho lata makomanka cho kikïchagh kïnyïl odeny akemina netinechay, aketö paraku otupöyi kwodeny nkarin taman nko pakulinekwa tanki nko eghina taghoy taman nko odeny cho tighöy tanki tören nko kichikeni ngayam nko otupöy Kighchï Uram pöytoghin Solomon tïkuchoni löwïr töketeka Kö pö Tororöt. Kikigha tïkuchoni löwïr kari taghoy.

⁴¹

⁴²

⁴³

⁴⁴

⁴⁵

⁴⁶Kigha pöytoghintononi tïkuchoni nyïngwïtyan nyo nïkis nyo mi lalwa Yordan kwenu Sukot nko Saretan.

⁴⁷Kïpakachta Solomon karichoni löwïr, melö kipim nyinte, ompöwölo ki chang nyoman: melö kimi chi nyo kimuköy kunkïtu nïkisïntöngwa.

⁴⁸Kwigh ngat Solomon kipïchat anka tïkwïl nyo pö ECHOTYON kimina koltin ato kïpelo amöros akïmina koltin mesa nyo kitöni makatyan nyo kipöy tawu Echotyon

⁴⁹akïmina koltin cho pïchighöch karïn cho ghyongo tatïna kimi mutï okumpö tagh, kïmi mutï okumpö löt, ompö kot nyo mi ori akemina tapïkay nko tatïn nko nömöwo koltin

⁵⁰nko kikompen nko makasin nko otupöy cho mïnkech nko mïkong nko kïsakeni koltin cho pïchighöch nko pateni koltin cho pïchighöch nko kukoti kö nyo pö ori, nyoni kï Wölo Tïlil Tya* nko kukotiko kot nyo pö ori nyoni kï Kö pö Tororöt.

⁵¹ Nyini kiwany Solomon ighisyö nyo kitek Kö pö Tororöt, kwipï ori tïkwïn cho kökikusoyön paponyi Daudi, choni kï silpa nko koltin nko kari walaka cho kïpöghisyegho ompö köyoni, akïkomönchï köyoni kïlïkwï kaplawachtina Kö pö Tororöt.