Read pokoot 2 PÖYTOGHÏ 1 Bible Online

2 PÖYTOGHÏ 1 - pokoot bible

2 PÖYTOGHÏ 1

¹Otini kima Aap pöytoghinto Israel, kïtagh pipö Moap pipö Israel.

²Kichïnuna osiswechoni Aasia pöytoghinto Israel konyi nyo pö parak ompö Samaria, akïkasa nyoman. Kïyonta pich kïpa kïtep Paal Sepup, nyo kile tororöt pö pipö Pilisti nyo kimi Ekron atökunkïtunö nyinte lö ekïsöpöy nyinte ompö kösotyononi.

³Wölo kïmwochï malaykayanta ECHOTYON werkoyon Eliya nyo pö koro Tispe kïwö kïnyorï pich cho kiyonï Aasia pöytoghinto Samaria kïtep chane lö, “Ompö ne topetekwa wölo mi Paal Sepup nyo le tororöt pö Ekron atetepa lö ekïlïku ne kösotyo pöytoghinto Israel ompöwölo möminye so Tororöt koro Israel?

⁴Mwochinö pöytoghintononi lö, lentöy ECHOTYON, ‘Melö ingetunonyi pöröyunoni irïwenyi, imeghenyi nyo mötïny!’ ” Kwigh Eliya lenyini kömwochï ECHOTYON,

⁵Kïmïlonchö pïchay wölo mi pöytoghintonay. Kïtep nyinte pïchay lö, “Ompö ne tomïlonchenökwa?”

⁶Kuyokyï lö, “Kakïtuyeghecha chi nyo kölenchecha omïlonchenö atökemwowunyi lö lentöy ECHOTYON, ‘Kölö ne teyontenanyi pich kïpa kïtep ngal Paal Sepup nyo le tororöt pö Ekron? Ompöwölo kelenyi so möminye Tororöt koro Israel? Kïlenyona nyu melö ingetunonyi pöröyunoni irïwenyi, imeghenyi nyo mötïny!’ ”

⁷Kïtep pöytoghintonay lö, “Ki nen chichoni kimwowokwa ngalechoni?”

⁸Kuyokyï pïchay lö, “Kiloköy sampï akukicha kegh angwa mu.” Kïlö pöytoghintonay, “Eliya nyoni nyay pö koro Tispe.”

⁹Kïyonta pöytoghintö yetïn pö askarin tömönut mut kïpa kïnam Eliya. Kïwö ghetintönay kïnyorï mpuröy ato le kutïng. Kïlenchï, “Kurinyi pöytoghintö we chi pö Tororöt.”

¹⁰ Kuyokyï Eliya yetïntönay lö, “Ato ochan chi pö Tororöt nya kungwïna ma yïm akïpelinyi nko piköku!” Kungwïna ma yïm panini akïpel yetïntönay nko pikachi.

¹¹Kïyonta pöytoghintonay yetïntö anka nko askarin tömönut mut kïpa wölaye kimi Eliya kïpa kïlenchï, “Kurinyi pöytoghintö lö rökuno nyete le ye!”

¹²Kuyokyï Eliya lö, “Ato ochan chi pö Tororöt nya kungwïna ma yïm akïpelinyi nko piköku!” Kungwïna ma wölo mi Tororöt panini akïpel ghetintönay nko pikachi.

¹³Kïyonta ngat pöytoghintonay yetïntö anka nko askarin tömönut mut. Kïpusta kutïngay akupïtyï tawu Eliya akïsagh nyinte lö, “We, chi pö Tororöt, syonchante nko pikachu wey, sörunö söponwecha!

¹⁴Anyï ye kikuwany ma nyo kingwïna yïm yetïntinechay le odeny nko pikökwa, wölo syonchecha.”

¹⁵Kïlenchï malaykayanta ECHOTYON Eliya, “Wïyö nko nyinte, mewöghisyö.” Kïlenyona kïwö Eliya nko yetïntönay wölo mi pöytoghintö.

¹⁶Akïlenchï, “Lentöy ECHOTYON, ‘Ompöwölo keyontenyi pich kïpa wölo mi Paal Sepup nyay le tororöt pö Ekron le ato melö kömi Tororöt koro Israel nyo kïtepöy kïgh, melö isöpenyi, imeghenyi.’ ”

¹⁷Kïlenyona kïma Aasia kïrïp kegh nko ngölyonto ECHOTYON nyo kïmwa Eliya. Melö kitïng Aasia worö, kïlenyona kïlïkwï werïngwa Yoram pöytoghin ompö könyi odeny nyo pö paytaghpa Yeoram wero Yeosyapat, pöytoghinto Yuda.

¹⁸Kirote ighisyewut löwïr cho kigh pöytoghintö Aasia kitapu Otöptino pöytoghi Israel.