Read pokoot 2 PÖYTOGHÏ 10 Bible Online

2 PÖYTOGHÏ 10 - pokoot bible

2 PÖYTOGHÏ 10

¹Kitïng Aap werkachi cho le 70 cho kimöngöy kanasyanta Samaria. Kïlenyona kukirchï Yeu palaltin yetïntino kanasyanta Yesrel nko poy nko pich cho kighyongchini monïngo Aap lö,

²“Otini konyorukwa palalyantanï, akwompöwölo omitekwa nko werpö echotyontenkwa, atïngetekwa nkaritin nko angoletin nko kanastin cho tekote nko kari lïk,

³akïla nyu akonga ompö werpö Aap nyo kikenet lasiny atö kïtöpö ngacharu kwanta atökïpayta, atolapay agh kegh atoporyechinö kato echotyontengwo.”

⁴Wölo kuwöghisyö pïchay pö Samaria akïlö, “Akemukecha lö ne keporyone nko Yeu nyo kimemï pöytoghintö Yoram anta pöytoghintö Aasia kïrïnta?”

⁵Kïlenyona kïyonta chi yetïn nyo kighyongchini kö pö paytagh nko nyo kighyongchini kanasyan, kïmi nko pich cho kighyongchini werpö Aap kïlenchï Yeu, “Kïchicha mötworiku, akeghecha kïgh anka tïkwïl nyo kemwowechanyi. Möminye chi nyo kïkïlecha kïlïkwï pöytoghin, igha kïgh anka tïkwïl nyo karam ompö nyi.”

⁶Kukirchï Yeu pïchay palalyan anka kïlenchï, “Ato omitekwa okuntönyan amitekwa psach okonyïtanïn, opï mötöwöyi werpö pöytoghin Aap löwïr, wölete le Yesrel asïyech ato teno nyete.” Kimpuröy werpö pöytoghin Aap kï 70 nko pipö kanasyanta Samaria cho echön cho kinömöy chane.

⁷Nyini kinyorï pïchay palalyantanay, kïpar werchay löwïr kï 70 akutö mötöwöyi köröpon akwipchï Yeu nyo kimi Yesrel.

⁸Nyini kikïmwochï Yeu lö kikepï mötöwöyi werpö Aap, kïmwatïta ketïkum mötöwechoni ompö woptin odeny ompö kuka kanasyan akïtïpï atoni ntökwitïta asista nyo pö odeny.

⁹Nyini kiyech ato le asïyech, kïwö kutang aranay pö kanasyan akïlenchï pich, “Melö kigheghchinokwa, ani nyo kyowök echotyontenyu pöytoghin Yoram apar, wölo ngo nyo kapar pïchï löwïr?

¹⁰Nkïtunö nyu lö möwetönye ngwïny ngölyon anka tïkwïl nyo kimwa ECHOTYON ompö pipö ara Aap. Kegh ECHOTYON kwitïta kïgh nyo kimwa ompö mötworintenyi Eliya.”

¹¹ Atolapay kïpar Yeu pikö walaka löwïr cho pö ara Aap cho kimöngöy Yesrel nko pikachi cho echön löwïr nko tïlyayichi nko tïsichi, möminye nyo le ompö akonga nyo kingötï.

¹²Atolapay kïweghö Yeu Yesrel kutang Samaria, otini kimi pan, kwitïta ato kimöngöy mösöwö.

¹³Kïtuyeghö Yeu pipö ara Aasia pöytoghinto Yuda ompö atoni. Kïtep pïchay lö, “Ochikwa ngo nya?” Kuyokyï pïchay lö, “Kïchicha pipö ara Aasia, akemicha pan kepetöy Yesrel atöketakwesa monïngo pöytoghin Aap nko cho pö koko pöytoghin.”

¹⁴Kïlenchï Yeu pikachi, “Anama chane kïsöpchot!” Kenam pïchay akepörchï pïrïm nyo lekïto ato kimöngöy mösöwö. Ki pich chane löwïr 42 amelö kichïwït nyo le ompö akonga.

¹⁵Nyini kïngeta Yeu atoni, kïtuyö nko Yeonadap wero Rekap, nyo kingwïn kïtaroch nyinte, kutakwes Yeu nyinte akïtep lö, “Ighönaninyi le otini oghöninyi nya?” Kuyokyï Yeonapad lö, “Owöy.” Kïlö Yeu, “Ato lenyoni, ale ewungu.” Kïnam kegh morïn, kungarak Yeu nyinte kïpus nkarinyi,

¹⁶akïlenchï, “Nyonö nko ani atesïwena wölo ochömtonan ECHOTYON.” Kïpegha chane kwodeny nkarinay kutang Samaria.

¹⁷Nyini kitïta Samaria, kïpar Yeu pipö ara Aap löwïr, möminye ompö akonga nyo kingötï, kïrïp kegh nko ngölyonto ECHOTYON nyo kimwa mötworintenyi Eliya.

¹⁸Atolapay kïkur Yeu tuyo pipö Samaria löwïr, akïlenchï, “Kipöghisyechï pöytoghintö Aap Paal nyo tangogh, wölo opöghisyechinan nyo le ani tya.

¹⁹Nyo omwowokwa ye lö okurunö werkoyi Paal löwïr kïpka yi akurï pich löwïr cho soghöy nyinte nko tïsichi löwïr. Möminye chi nyo le ompö akonga nyo kïpïstoy. Ompöwölo kighchinecha Paal ichon nyo wow nyoman, kïpöröy chi nyo melö kengwïn.” Wölo kigh Yeu lenyoni ompö lïs, atökumï kïpar pich löwïr cho soghöy Paal.

²⁰Kïlenyona kïmwochï Yeu pich löwïr lö, “Otïlilö kegh pich cho osoghöy Paal!” Kemwatïta lenyaye.

²¹Kïyonta Yeu pich kïghömï koro Israel kïmïkul. Kïkurotö pich löwïr cho kisoghöy Paal. Kïpka pïchay löwïr, möminye nyo le ompö akonga nyo kingötï. Kïpka akïlït köyay pö Paal pö saghat, kïnyïghï chane köyay pö Paal kïngata söröm ntökwit sörömu anka,

²²kïmwochï Yeu chi nyo kighyongchini sïro cho kïpöghisyechinegho Paal lö, “Nomchinö chi anka tïkwïl sïra nyo kïsogho Paal.” Kunomchï nyinte pïchay sïro.

²³Nyini kiwonyö, kïwö Yeu akïlït köyay nko Yeonadap wero Rekap akïlenchï pïchay kimi kïsoghöy, “Aros lö pich cho soghöy Paal opïn cho omitekwa tïkwïl, mopïsyï chi orinkwa nyo soghöy ECHOTYON!”

²⁴Atolapay kïwö nyinte nko Yeonadap kïropta amörostinekwa cho kipelöy ompö Paal. Kutö nyinte askarin köyoni sany cho le 80 akïlenchï, “Apar pïchoni mi ori löwïr, ato chi nyo köpïstö nyo le ompö akonga kïchïwït, kepöröy nyinte!”

²⁵Nyini kiwany Yeu kïropta amörostinechay kïpelöy, kïlenchï yetïntinechi, “Ape olïtö kö apar chane lömïs amakany kïchïwït ompö akong!” Kïpar askarinechay pïchay lömïs akuchutï mïntïruchkö kïpka sany. Atolapay kïlïtöy pïchay pö Yeu kot nyo pö saghat nyo pö ori,

²⁶akuchutï pchörï nyo kimi köyoni pö Paal akïpel.

²⁷Kïlenyona kunyar köyay kïsogho Paal akwigh kïlïkwï kö pö samï nko nyete le ye.

²⁸Lenye nyoni wölo kinyarta Yeu Paal ompö Israel.

²⁹Wölo melö kipïstö Yeu ngoki Yeropoam wero Nepat nyo kigh pipö Israel kïsagh mogh nyo kikigha koltin ompö Petel nko Dan.

³⁰Kïlenchï ECHOTYON Yeu, “Keghanyi nyo karam otini kerïpanyi ngalechan ipar pipö ara Aap. Nyo omwowunyi ye nyu lö oghan werïngu nyo pö pïnta nyo pö angwan kïlïku pöytoghinto Israel.”

³¹Wölo melö kirïp Yeu ECHOTYON Tororöt pö Israel ompö mïkulöwunyi kïmïkul, melö kipïstö ngoki Yeropoam nyo kigh pipö Israel kwigh ngokï.

³²Kïmutïta ECHOTYON osiswechoni koro Israel kareran. Kirïnta pöytoghintö Asael koroswo Israel löwïr,

³³cho kimi lalwa Yordan antakwagh okumpö kongasis nko koro Kiliad nko nyo pö Kad nko nyo pö Rupen akïnam koro Manase kareran, kïngata Aroer nyo mi mpöghoghyo Arnon, nyoni kï Kiliad nko Pasyan.

³⁴Kirote ighisyewut löwïr cho kigh pöytoghintö Yeu nko owesyenyi kitapu Otöptino pöytoghi Israel.

³⁵Kïrapas Yeu, ketïpchï Samaria, kuker werïnyi Yeoaas kïpayta.

³⁶Kipayta Yeu Israel ompö Samaria könyis 28.